Jue Mun 81:1-16
Ɔ ti jue tofuɛ’m be su kpɛn’n i liɛ. Gititi* su. Azafu i jue-ɔ.+
81 Amun kpan aklunjɔɛ kpanlɛ e Ɲanmiɛn m’ɔ ti e wunmiɛn’n i ɲrun.+
Amun kpan kwlalɛ kpanlɛ Zakɔbu i Ɲanmiɛn’n i ɲrun.
2 Amun bo miziki yɛ amun fa klɛn,ɔ nin jru mɔ i nɛn yo fɛ’n, nin miziki bolɛ like ng’ɔ le ɲanman’n.
3 Kɛ anglo’n fi’n, amunbo awɛ,+kɛ anglo ba’n ta kpa’n, e cɛn’n i dilɛ nun’n, amun bo awɛ.+
4 Afin ɔ ti Izraɛli i mmla kun,ɔ ti Zakɔbu i Ɲanmiɛn’n i mmla kun.+
5 Kɛ ɔ́* sínsín Ezipti mɛn’n nun’n,+ɔ kpɛli mmla sɔ’n naan ɔ yo Zozɛfu i wla kpɛnlɛ like.+
N tili sran kun nɛn’n,* sanngɛ n siman sran ng’ɔ kan ndɛ’n:
6 “N yili i wati su trɔ’n,+i sa’m be yacili gbogbo’n nun tralɛ.
7 Ɔ ɲrɛnnɛn blɛ nun’n, a flɛli min, yɛ n deli wɔ.+
N tɛli ɔ su ɲanmiɛn ble m’ɔ kpla’n nun.*+
N sali wɔ Meriba* lɔ nzue’m be nuan lɔ n niannin.+ (Sela)
8 Min nvlefuɛ mun, amun tie, ń má kán sa nga amun yo’n i ndɛ.
Ee Izraɛli, amun waan amun tieman min aniɛn’n.+
9 Nán ɲanmiɛn uflɛ fi tran amun afiɛn,yɛ nán amun koto ɲanmiɛn uflɛ bo.+
10 Min Zoova, n ti amun Ɲanmiɛn.
Min yɛ n fali amun Ezipti mɛn’n nun lɔ n fiteli-ɔ.+
Amun trɛ amun nuan’n nun kpa, yɛ ń gúa nun like lele ɔ́ yí.+
11 Sanngɛ min nvlefuɛ’m b’a tieman min aniɛn’n.
Izraɛli w’a kplinman su kɛ ɔ́ ló i wun mán min.+
12 Ɔ maan n yacili be lɛ be yoli like ng’ɔ o be awlɛn mɔ w’a kete’n nun’n.
Be yoli like nga be bu i kɛ ɔ ti kpa’n.*+
13 Sɛ ɔ ti kɛ min nvlefuɛ’m be tieli min ndɛ’n,+sɛ ɔ ti kɛ be nantili min atin’m be su’n,+
14 nn n guali be kpɔfuɛ’m be ɲin ase,nn n tuli be ɲrun tanndanfuɛ’m be fɔ.+
15 Be nga be kpɔ Zoova’n bé úsu i ɲrun sa tututu,yɛ be agualiɛ’n* ká sɔ tititi.
16 Sanngɛ ɔ́ fá ble kpafuɛ’n ɔ́ fá tá wɔ,*+
yɛ ɔ́ mán wɔ yɔbuɛ nun awɛma nzue lele ɔ ku yí.”+
