Jue Mun 62:1-12
Ɔ ti jue tofuɛ’m be su kpɛn’n i liɛ. Zeditɛn* su. Davidi i jue’mbe nun kun-ɔn.
62 Nanwlɛ, ń trán diin ń mínndɛ Ɲanmiɛn.
Min delɛ’n fin i.+
2 Nanwlɛ, ɔ ti min yɔbuɛ nin min defuɛ, ɔ ti min fiawlɛ kpa.+
N su finman ase dan le.+
3 ?Cɛn onin ko naan amun a yaci sran su tɔlɛ kɛ amún kún i?+
Amun kwlaa amun kun srɛ kɛ talɛ kun mɔ w’a cia’n sa, amun ti kɛ yɔbuɛ talɛ m’ɔ su wa bu’n sa.*
4 Be ti be wun aniɛn naan bé yí i ase naan w’a ɲanman ɲrun kun.
Ato bualɛ’n yo be fɛ.
Be fa be nuan’n be bo muae, sanngɛ be klun lɔ’n be bo sannzan.+ (Sela)
5 Nanwlɛ, ń trán diin ń mínndɛ Ɲanmiɛn,+afin like nga min wla o su’n, ɔ fin i.+
6 Nanwlɛ, ɔ ti min yɔbuɛ nin min defuɛ, ɔ ti min fiawlɛ kpa.
N su finman ase le.+
7 Min delɛ’n nin min aɲrunɲan’n be o Ɲanmiɛn sa nun.
Ɲanmiɛn yɛ ɔ ti min yɔbuɛ kekleke’n niɔn, i yɛ ɔ ti min fiawlɛ’n niɔn.+
8 Klɔ sran mun, maan amun fa amun wla guɛ i su blɛ kwlaa nun.
Maan amun kan ndɛ ng’ɔ o amun awlɛn’n nun’n i kwlaa kle i.+
Ɲanmiɛn ti e fiawlɛ.+ (Sela)
9 Klɔ sran’m be ti aunmuan ngbɛn,be kwlá faman be wla guaman klɔ sran’m be su.+
Kɛ be sie be kwlaa toe su’n, aunmuan ngbɛn bɔbɔ’n ɔ yo nɔnnin tra be.+
10 Nán amun fa amun wla gua like mɔ be de i be wue kekle su’n i su.
Nán amun laka amun wun se kɛ amún fá amun wla gúa awie wualɛ’n su.
Sɛ amun aɲanbeun ninnge’m be sɔn’n, nán amun fa amun awlɛn sie be su.+
11 Ɲanmiɛn kannin ndɛ kpɛ kunngba, n tili i kpɛ nɲɔn kɛ:
Wunmiɛn’n fin Ɲanmiɛn.+
12 Ee Zoova, klolɛ dan’n kusu fin wɔ.+
Afin a fa like nga sran kun yo’n i nuan like mɛn i.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “Amun kwlakwla amun tɔ i su, kɛ wienun-ɔn ɔ ti kɛ talɛ mɔ w’a cia’n sa, kɛ yɔbuɛ talɛ m’ɔ su wa bu’n sa.”
