Jue Mun 17:1-15
Davidi i Ɲanmiɛn srɛlɛ’n kun-ɔn.
17 Ee Zoova, sie ɔ su tie min srɛlɛ mɔ n srɛ wɔ kɛ a di min ndɛ’n i klanman’n.
Fa ɔ ɲin sie i kpanlɛ mɔ n kpan kunndɛ ukalɛ’n su.
Tie min srɛlɛ mɔ gblɛ nunman nun’n.+
2 Di min ndɛ’n i kpa man min.+
Maan ɔ ɲinma’m be wun sa ng’ɔ ti kpa’n.
3 A nianniannin min awlɛn’n nun, a nianniannin min kɔnguɛ,+a yili min nun fiɛn’n.+
A wunnin kɛ sa tɛ fi nunman min nun,yɛ min nuan’n w’a fɔnman.
4 Kannzɛ sa nga sran’m be yo’n ti sɛ ti sɛ’n,kɛ nga a fa kannin’n sa’n, n faman awiefuɛ’m be atin’n su.+
5 Maan min ja’m be ka wɔ atin’m be su,i liɛ’n, min ja su kplaman.+
6 Ee Ɲanmiɛn, n kpan flɛ wɔ, afin n si kɛ á tɛ́ min su.+
Sie ɔ su min nuan bo.* Tie ndɛ nga n kan’n.+
7 Ee, wɔ mɔ a de be nga be kunndɛ fiawlɛ ɔ sa fama su’n,mɔ a de be be nga be yo ɲin kekle ɔ su’n be sa nun’n,yo abonuan sa wie mun fa yi ɔ sran klolɛ dan’n i nglo.+
8 Sasa min kɛ ɔ ɲinma su sran’n sa,+fa min fia ɔ ndɛwa’m be fɔnvɔ’n i bo.+
9 De min klunwifuɛ nga be tɔ min su’n be sa nun,sasa min min kpɔfuɛ nga be bo sin yia min’n, mɔ be kunndɛ kɛ bé kún min’n be lika.+
10 Be awlɛn’n w’a kete,be nuan nun ndɛ’n ti dandan.
11 Siɛn’n, b’a bo b’a sin b’a yia e.+
Be su kunndɛ blɛ mɔ be kwla yi e ase’n.
12 Klunwifuɛ’n ti kɛ asɔmɔli kun m’ɔ kunndɛ kpa kɛ ɔ́ trá nnɛn naan ɔ́ títí i nun’n sa.
Ɔ ti kɛ asɔmɔli gbanflɛn mɔ w’a bu w’a sa’n sa.
13 Ee Zoova, jaso naan a nin i be yia nun,+ naan yi i ase.
Fa ɔ tokofi’n de min klunwifuɛ’n i sa nun.
14 Ee Zoova, fa ɔ sa’n de min,de min mɛn nga nunfuɛ mɔ be mɛn liɛ nga be ko di’n i ngba yɛle nga’n,+ be sa nun.
Ninnge kpakpa nga a man’n, a yo maan ɔ bobo sran sɔ’m be su,+yɛ be yaci aja like man be mma kpanngban mun.
15 Sanngɛ min liɛ’n, kɛ mɔ n yoli sa kpa’n ti’n, ń wún ɔ ɲrun’n.
Kɛ n tinnge ɔ ɲrun lɛ’n, min klun jɔ dan.+
Ja ngua lɔ ndɛ mun
^ Annzɛ “Klu naan tie.”
