Jue Mun 102:1-28
Ɲrɛnnɛnfuɛ kun mɔ i wla w’a bo’n, m’ɔ kan sa kwlaa ng’ɔ o i su’n i ndɛ kle Zoova’n i srɛlɛ’n.+
102 Ee Zoova, tie min srɛlɛ’n.+
Maan kpanlɛ mɔ n kpan n kunndɛ ukalɛ’n ɔ towɔ lɔ.+
2 Min ɲrɛnnɛn blɛ’n nun’n, nán fa ɔ ɲrun’n fia min wun.+
Sie ɔ su min nuan bo.*
Kɛ n flɛ wɔ’n tɛ min su ndɛndɛ.+
3 Afin min cɛn’m be wie kɛ sin wunsrɛn sa,yɛ min owie’m b’a lu tuun kɛ sin trɔwlɛ wie sa.+
4 Min awlɛn’n w’a yo kɛ ijre mɔ w’a glɔ mɔ w’a wu kee’n sa.+
Afin min wla fili min aliɛ’n i dilɛ’n su.
5 Kplinlɛ mɔ n kplin dan’n ti’n,+min nnɛn ba’n w’a mantan min owie’m be wun.+
6 M’an yo kɛ aawlɛ flɛnnɛn’n nun lɔ pelikan’n* sa.
M’an yo kɛ klɔ nvuɛn su akpatue kan wie sa.
7 N kwlá lafiman,*
m’an yo kɛ anunman kun mɔ i ngunmin wo sua kun i ti su’n sa.+
8 Aliɛ ba kwlaa nun’n, min kpɔfuɛ’m be yo min finfin.+
Be nga be sri min’n, be fa min dunman’n be bo sannzan.
9 Afin n di nzuɛn’n kɛ kpanwun sa,+yɛ min ɲinmuɛn nzue’n sanngan like nga n nɔn’n nun,+
10 ɔ ya’n nin ɔ ya dan’n be ti.
Afin a mannin min su naan á yí min blo.
11 Min cɛn’m be ti kɛ fɔnvɔ m’ɔ wie blɛblɛblɛ’n sa,+yɛ m’an glɔ kɛ ijre sa.+
12 Sanngɛ Zoova, ɔ liɛ’n a o lɛ tititi,+yɛ ɔ dunman’n fú blɛ kwlaa nun.+
13 N si kɛ saan á jáso, yɛ á sí Siɔn i aunnvɔɛ,+afin i aunnvɔɛ silɛ blɛ’n w’a ju.+
Blɛ ng’ɔ ti i su’n w’a ju.+
14 Afin ɔ sufuɛ’m be klo i yɔbuɛ mun,+yɛ be klo i ndutre’n bɔbɔ.+
15 Nvlenvle’m bé sró Zoova i dunman’n,yɛ asiɛ’n su famiɛn’m be kwlaa bé wún kɛ a le ɲrun dan.+
16 Afin Zoova kplán Siɔn i uflɛ,+ɔ́ yí i aɲrunɲan’n i nglo.+
17 Ɔ́ síe i su tíe be nga be leman wie’n be srɛlɛ’n.+
Ɔ su kpaloman be srɛlɛ’n.+
18 Be nga bé wá jáso su’n be ti yɛ be klɛli ndɛ nga-ɔ,+kɛ ɔ ko yo naan nvle kun m’ɔ́ wá jáso su’n* w’a manman Ya’n ti.
19 Afin kɛ ɔ o ɲanmiɛn m’ɔ ti i liɛ klonglo’n su lɔ’n, ɔ nian ngua wa.+
Kɛ Zoova o ɲanmiɛn su lɔ’n, ɔ fɛ i ɲin sie i asiɛ’n su,
20 naan ɔ́ tíe bisuafuɛ’n i kplinlɛ’n,+naan ɔ́ dé be nga be buli be fɔ kɛ be kun be’n.+
21 I liɛ’n, bé bó Zoova i dunman’n Siɔn lɔ,+yɛ bé mɛ́nmɛ́n i Zerizalɛmun lɔ
22 blɛ mɔ nvlefuɛ mun nin famiɛn diwlɛ mun
bé yía likawlɛ bé sú Zoova’n.+
23 Ɔ yoli maan min wunmiɛn’n wieli ndɛ nun,ɔ kpɛli min cɛn’m be sin.
24 N seli kɛ: “Ee, min Ɲanmiɛn,blɛ mɔ n wo min nguan’n i afiɛn’n nán kun min.
Ɔ liɛ’n, ɔ afuɛ’m be o lɛ blɛ kwlaa nun.+
25 A wlali asiɛ’n i bo ase w’a cɛ kpa,yɛ ɲanmiɛn m’ɔ la nglo lɔ plaii’n ti ɔ sa nuan like.+
26 Bé núnnún, sanngɛ ɔ liɛ’n, á ká lɛ.
Bé yó nvuɛn kɛ nga tralɛ fa yo nvuɛn’n sa.
Á wá káci be kɛ tralɛ wie sa, yɛ bé núnnún.
27 Sanngɛ ɔ liɛ’n, a kaciman le, yɛ ɔ afuɛ’m be suwieman le.+
28 Ɔ sufuɛ’m be mma’m bé trán fɔuun,yɛ be osu’n táka kpa ɔ ɲrun.”+
