Isaija 38:1-22
38 Dak iż-żmien Ħeżekija marad u kien wasal biex imut. Il-profeta Isaija bin Għamoż daħal ħdejh u qallu: “Hekk jgħid Ġeħova: ‘Agħti istruzzjonijiet lil taʼ darek, għax se tmut; mhux se jgħaddilek.’”
2 Għalhekk, Ħeżekija dar wiċċu mal-ħajt u beda jitlob lil Ġeħova:
3 “Nitolbok bil-ħniena Ġeħova, jekk jogħġbok ftakar kif jien imxejt quddiemek lealment u b’qalb sħiħa, u għamilt dak li hu tajjeb f’għajnejk.” U Ħeżekija beka fuq li beka.
4 Imbagħad Ġeħova qal lil Isaija:
5 “Erġaʼ lura u għid lil Ħeżekija, ‘Hekk jgħid Ġeħova l-Alla tal-antenat tiegħek David: “Jien smajt it-talba tiegħek u rajt id-dmugħ tiegħek. Jien se nżidlek 15-il sena oħra maʼ ħajtek,
6 u neħles lilek u lil din il-belt minn idejn ir-re tal-Assirja, u niddefendi lil din il-belt.
7 Dan hu s-sinjal mingħand Ġeħova biex Ġeħova jurik li se jagħmel dak li qal:
8 Jien se nagħmel li d-dell tax-xemx li niżel fuq it-taraġ* t’Aħaż imur lura għaxar tarġiet.”’” Għalhekk, id-dell li kien diġà niżel mar lura għaxar tarġiet.
9 Kompożizzjoni li ġiet miktuba mir-Re Ħeżekija taʼ Ġuda meta marad u rkupra mill-marda tiegħu.
10 Jien għedt: “F’nofs ħajtiSe jkolli mmur fil-Qabar.*
Se niġi mċaħħad mill-kumplament tas-snin li baqagħli.”
11 Jien għedt: “M’iniex se nara lil Jah,* mhux se nkun fost dawk li huma ħajjin u li jaraw lil Jah.
Mhux se nħares iktar lejn il-bnedminMeta nkun maʼ dawk li qegħdin fil-post fejn m’hemmx ħajja.
12 Il-post fejn noqgħod hu bħat-tinda tar-ragħajjaLi żżarmat u nġarret.
Kebbibt ħajti bħalma xi ħadd li jinseġ bin-newl ikebbeb biċċa drapp li tkun lesta;Hu jaqtagħni bħalma biċċa drapp titneħħa minn man-newl.
Minn filgħodu sa filgħaxija tibqaʼ ġġibni fix-xejn.
13 Jien nipprova nibqaʼ kalm sa filgħodu.
Bħal iljun, hu jibqaʼ jkisser l-għadam tiegħi kollu;Minn filgħodu sa filgħaxija tibqaʼ ġġibni fix-xejn.
14 Bħar-rundun u l-għasfur tal-għana,* jien se nibqaʼ npespes;Jien se nibqaʼ ngorr bħall-ħamiema.
Għajejt nistennieh biex jgħinni u għedt:
‘Ġeħova, jien qed inbati ħafna.
Jekk jogħġbok, għinni.’*
15 X’nistaʼ ngħid?
Hu tkellem miegħi u aġixxa.
Jien se nkun umli sakemm indum ħajMinħabba l-inkwiet kbir li kelli.*
16 ‘Ġeħova, permezz taʼ dawn l-affarijiet* jgħix kull bniedem,U bihom nieħu n-nifs.
Int se tagħtini saħħti lura u żżommni ħaj.
17 Minflok ma kelli l-paċi, kelli inkwiet kbir;Imma għax tħobbni,*Int salvajtni mill-mewt.*
Int tfajt id-dnubiet kollha tiegħi wara dahrek.*
18 Għax il-Qabar* ma jistax jigglorifikak,Il-mewt ma tistax tfaħħrek.
Dawk li jinżlu fil-ħofra ma jistgħux jittamaw fil-lealtà tiegħek.
19 Il-ħajjin biss jistgħu jfaħħruk,Bħalma jien nistaʼ nagħmel dan illum.
Missier jistaʼ jagħti l-għarfien lit-tfal tiegħu dwar il-lealtà tiegħek.
20 Ġeħova, salvani,U l-jiem kollha taʼ ħajjitna ndoqqulek l-għanjietBl-istrumenti tal-korda fid-dar tiegħek, Ġeħova.’”
21 Imbagħad Isaija qal: “Ġibu ċappa tin niexef u ppressat u idilkuha fuq il-musmar tiegħu ħalli jfiq.”
22 Ħeżekija kien staqsa: “X’inhu s-sinjal li se nitlaʼ fid-dar taʼ Ġeħova?”
Noti taʼ taħt
^ Aktarx dan it-taraġ kien jintuża biex ikunu jafu l-ħin, bħalma jintuża arloġġ tax-xemx.
^ Letteralment “fil-bibien taʼ Xeol.” Xeol hu l-qabar komuni tan-nies. Ara Termini tal-Bibbja Spjegati.
^ “Jah” hu forma mqassra tal-isem Ġeħova.
^ Jew forsi “ajrun.”
^ Letteralment “aqbeż għalija.”
^ Jew “taʼ ruħi.”
^ Jiġifieri dak li jgħid u jagħmel Alla.
^ Jew “tħobb lil ruħi.”
^ Jew “mill-ħofra tal-qerda.”
^ Jew “neħħejt id-dnubiet kollha tiegħi minn quddiem għajnejk.”
^ Jew “Xeol,” jiġifieri l-qabar komuni tan-nies. Ara Termini tal-Bibbja Spjegati.
