Isaija 34:1-17
34 Ġnus, ejjew viċin ħalli tisimgħu,U intom il-popli, oqogħdu attenti.
Ħa tismaʼ l-art u kulma fiha,Id-dinja u kull ħaġa li tgħix fiha.
2 Għax Ġeħova hu rrabjat għall-ġnus kollha,U hu inkorlat għall-armati kollha tagħhom.
Hu se jeqridhom għalkollox;Se joqtolhom.
3 Il-maqtulin tagħhom se jintremew,U l-intiena tal-iġsma mejtin tagħhom se tkun kullimkien;Il-muntanji se jinħallu minħabba d-demm* tagħhom.
4 L-armata kollha tas-sema se titħassar,U s-sema se tiġi mgerba bħal skroll.
L-armata kollha tagħhom se tinxef u taqaʼ,Bħalma werqa niexfa taqaʼ mid-dieljaU tina niexfa mis-siġra tat-tin.
5 “Għax fis-sema x-xabla tiegħi se tkun mimlija bid-demm.
Biha se nagħmel ġudizzju fuq Edom,Fuq il-poplu li jien irrid neqred għalkollox.
6 Jien, Ġeħova, għandi xabla; din se tkun miksija bid-demm.
Se tkun miksija bix-xaħam,Bid-demm tal-imtaten żgħar u l-bdabad,Bix-xaħam tal-kliewi tal-imtaten.
Għax jien, Ġeħova, se nagħmel sagrifiċċju f’BosraU qatla kbira fl-art t’Edom.
7 Il-barrin slavaġ se jinżlu magħhom,Il-barrin żgħar mal-barrin kbar u b’saħħithom.
L-art t’Edom se tkun imxarrba għasra bid-demm,U t-trab tagħha se jkun mgħarraq bix-xaħam.”
8 Għax Ġeħova għażel jum biex jagħmel vendetta mill-għedewwa tiegħu,Għażel sena biex jikkastiga lin-nies li għamlu l-ħsara lil Sijon.
9 Ix-xmajjar tagħha* se jinbidlu f’żift,It-trab tagħha f’kubrit,*U l-art tagħha se ssir bħal żift jaqbad.
10 Din mhux se tintefa, la billejl u lanqas binhar;Id-duħħan tagħha se jibqaʼ tielaʼ għal dejjem.
Se tibqaʼ mħarbta minn ġenerazzjoni għal oħra;Ħadd mhu se jgħaddi minnha għal dejjem taʼ dejjem.
11 Se tkun post għall-pellikan u l-porkuspin,*U l-kokka tal-qrun u ċ-ċawlun se jgħixu fiha.
Alla se jkejjilha b’ħabel tal-kejl u b’lenza biċ-ċombBiex juri li se ssir vojta u ma tiswa xejn.
12 M’hemm ħadd min-nies importanti tagħha li se jsir re,U l-mexxejja kollha tagħha se jiġu fix-xejn.
13 Fit-torrijiet iffortifikati tagħha se jitlaʼ x-xewk,U fil-fortizzi tagħha l-ħurrieq u l-għollieq.
Se ssir post fejn jinħbew il-klieb slavaġU post fejn jgħix in-ngħam.*
14 L-annimali tad-deżert se jiltaqgħu mal-annimali li jgħajtu,U l-mogħoż slavaġ* se jgħajtu lil xulxin.
Iva, hemmhekk il-buqrajq* jissetilja u jsib post taʼ mistrieħ.
15 Hemmhekk is-serp se jagħmel il-bejta tiegħu, ibid,Ifaqqas il-bajd, u jipproteġi liż-żgħar.
Iva, hemmhekk se jinġabru l-isqra, kull seqer mas-sieħba tiegħu.
16 Fittxu fil-ktieb taʼ Ġeħova u aqrawh b’leħen għoli:
L-ebda wieħed minnhom mhu se jonqos;Ħadd minnhom mhu se jkun mingħajr is-sieħba,Għax hu Ġeħova li ta l-kmand,U l-ispirtu tiegħu li ġabarhom flimkien.
17 Hu l-Wieħed li tefaʼ x-xorti għalihom,U idu stess kejlet il-post li tahom.*
Dan se jkun tagħhom għal dejjem;Se jibqgħu jgħixu fih, jgħaddi kemm jgħaddi żmien.
Noti taʼ taħt
^ Jew “se jkunu mgħarrqin bid-demm.”
^ Milli jidher qed jirreferi għal Bosra, il-belt kapitali t’Edom.
^ Dan jirreferi għal tip taʼ ġebla li taqbad bin-nar.
^ Dan hu annimal li għandu x-xewk u li jixbah lil qanfud.
^ Jiġifieri ostriches.
^ Jew forsi “d-demonji li qishom mogħoż.”
^ Dan hu għasfur li jixbah lil kokka.
^ Letteralment “qassmitilhom il-post bil-ħabel tal-kejl.”
