Rigters 14:1-20

  • Rigter Simson soek Filistynse vrou (1-4)

  • Jehovah se gees help Simson om leeu dood te maak (5-9)

  • Simson se raaisel by troue (10-19)

  • Simson se vrou aan ander man gegee (20)

14  Toe het Simson na Timna gegaan, en daar het hy ’n Filistynse vrou* gesien.  Hy het toe vir sy ouers gesê: “Ek het in Timna ’n Filistynse vrou gesien, en ek wil hê dat julle haar vir my as ’n vrou moet kry.”  Maar sy ouers het vir hom gevra: “Kan jy nie ’n vrou onder jou familielede en onder ons hele volk vind nie?+ Moet jy onder die onbesnede Filistyne vir jou ’n vrou gaan vat?” Maar Simson het vir sy pa gesê: “Kry haar vir my, want sy is die regte een vir my.”*  Sy ouers het nie geweet dat dit van Jehovah af kom nie. Hy het ’n geleentheid gesoek om teen die Filistyne op te tree, want die Filistyne het op daardie stadium oor Israel regeer.+  Simson het toe saam met sy ouers na Timna gegaan. Toe hy by die wingerde van Timna kom, het ’n leeu* brullend op hom afgestorm!  Toe het Jehovah se gees hom krag gegee,+ en hy het dit in twee geskeur, net soos iemand ’n boklam met sy kaal hande in twee skeur. Maar hy het nie vir sy ouers gesê wat hy gedoen het nie.  Daarna het hy verder gegaan en met die vrou gepraat, en sy was nog steeds die regte een in sy oë.+  Later, toe hy teruggaan om haar huis toe te neem,+ het hy gaan kyk na die leeu se karkas, en daar was ’n swerm bye en heuning in die karkas.  Toe het hy dit in sy hande uitgeskraap en dit geëet terwyl hy geloop het. Toe hy weer by sy ouers kom, het hy vir hulle van die heuning gegee om te eet, maar hy het nie vir hulle gesê dat hy dit uit ’n leeu se karkas geskraap het nie. 10  Simson het saam met sy pa na die vrou toe gegaan, en hy het ’n feesmaal daar gehou, want dit was wat die jong manne gewoonlik gedoen het. 11  Toe hulle hom sien, het hulle 30 jong manne gekies om hom gedurende die feesmaal geselskap te hou. 12  Toe het Simson vir hulle gesê: “Ek wil vir julle ’n raaisel vertel. As julle dit gedurende die sewe dae van die feesmaal oplos en vir my sê wat die antwoord is, dan sal ek vir julle 30 kledingstukke van linne en 30 stelle klere moet gee. 13  Maar as julle my nie die antwoord kan gee nie, dan moet julle vir my 30 kledingstukke van linne en 30 stelle klere gee.” Hulle het gesê: “Vertel ons jou raaisel. Ons wil hoor wat dit is.” 14  Toe het hy vir hulle gesê: “Uit die een wat eet, kom daar iets om te eet,en uit die sterke kom daar iets soets.”+ Hulle kon drie dae lank nie die raaisel oplos nie. 15  Op die vierde dag het hulle vir Simson se vrou gesê: “Oorreed jou man+ om die antwoord op die raaisel vir jou te gee. Anders sal ons jou en jou pa se huis met vuur verbrand. Het julle ons hierheen genooi om ons besittings te vat?” 16  Simson se vrou het by hom gehuil en gesê: “Jy haat my seker. Jy is nie lief vir my nie.+ Jy het vir my mense ’n raaisel vertel, maar jy het nie vir my gesê wat die antwoord is nie.” Toe het hy vir haar gesê: “Ek het nie eers vir my ouers gesê wat die antwoord is nie! Hoekom moet ek vir jou sê wat dit is?” 17  Maar sy het gedurende die res van die sewe dae van die feesmaal by hom bly huil. Uiteindelik, op die sewende dag, het hy vir haar gesê wat die antwoord is, want sy het druk op hom geplaas. Toe het sy vir haar mense gesê wat die antwoord op die raaisel is.+ 18  Op die sewende dag voor sonsondergang* het die manne van die stad dus vir hom gesê: “Wat is soeter as heuning,en wat is sterker as ’n leeu?”+ Hy het hulle geantwoord: “As julle nie met my kalf geploeg het nie,+sou julle nie my raaisel opgelos het nie.” 19  Toe het Jehovah se gees hom krag gegee,+ en hy het na Asʹkelon+ gegaan en 30 van hulle manne doodgemaak en hulle klere geneem en die stelle klere gegee vir dié wat die antwoord op die raaisel gehad het.+ Hy het woedend teruggegaan na sy pa se huis toe. 20  Simson se vrou+ is toe gegee aan een van die jong manne wat hom geselskap gehou het.+

Voetnote

Lett. “’n vrou van die dogters van die Filistyne”.
Lett. “sy is reg in my oë”.
Of “jong maanhaarleeu”.
Of moontlik “voordat hy in die binnekamer ingegaan het”.