Genesis 5:1-32

  • Tikang kan Adan tubtob kan Noe (1-32)

    • Hi Adan nagkaada mga anak (4)

    • Hi Enoc naglakat kaupod han Dios (21-24)

5  Ini an libro han kasaysayan ni Adan. Ha adlaw nga ginlarang han Dios hi Adan, iya ginhimo hiya nga pariho ha Dios.+  Ginlarang niya hira nga lalaki ngan babaye.+ Ha adlaw nga ginlarang hira,+ iya ginbendisyonan hira ngan gintawag hira nga Tawo.*  Hi Adan nabuhi hin 130 ka tuig ngan katapos, nagkaada hiya hin anak nga lalaki nga pariho ha iya, sugad ha iya dagway, ngan iya ginngaranan hiya hin Set.+  Katapos matawo an iya anak nga hi Set, hi Adan nabuhi hin 800 ka tuig. Ngan nagkaada hiya hin mga anak nga lalaki ngan mga anak nga babaye.  Salit an ngatanan nga adlaw han kinabuhi ni Adan inabot hin 930 ka tuig, ngan katapos, namatay hiya.+  Hi Set nabuhi hin 105 ka tuig ngan katapos, nagkaada hiya hin anak nga hi Enos.+  Katapos matawo an iya anak nga hi Enos, hi Set nabuhi hin 807 ka tuig. Ngan nagkaada hiya hin mga anak nga lalaki ngan mga anak nga babaye.  Salit an ngatanan nga adlaw ni Set inabot hin 912 ka tuig, ngan katapos, namatay hiya.  Hi Enos nabuhi hin 90 ka tuig ngan katapos, nagkaada hiya hin anak nga hi Kenan. 10  Katapos matawo an iya anak nga hi Kenan, hi Enos nabuhi hin 815 ka tuig. Ngan nagkaada hiya hin mga anak nga lalaki ngan mga anak nga babaye. 11  Salit an ngatanan nga adlaw ni Enos inabot hin 905 ka tuig, ngan katapos, namatay hiya. 12  Hi Kenan nabuhi hin 70 ka tuig ngan katapos, nagkaada hiya hin anak nga hi Mahalalel.+ 13  Katapos matawo an iya anak nga hi Mahalalel, hi Kenan nabuhi hin 840 ka tuig. Ngan nagkaada hiya hin mga anak nga lalaki ngan mga anak nga babaye. 14  Salit an ngatanan nga adlaw ni Kenan inabot hin 910 ka tuig, ngan katapos, namatay hiya. 15  Hi Mahalalel nabuhi hin 65 ka tuig ngan katapos, nagkaada hiya hin anak nga hi Jared.+ 16  Katapos matawo an iya anak nga hi Jared, hi Mahalalel nabuhi hin 830 ka tuig. Ngan nagkaada hiya hin mga anak nga lalaki ngan mga anak nga babaye. 17  Salit an ngatanan nga adlaw ni Mahalalel inabot hin 895 ka tuig, ngan katapos, namatay hiya. 18  Hi Jared nabuhi hin 162 ka tuig ngan katapos, nagkaada hiya hin anak nga hi Enoc.+ 19  Katapos matawo an iya anak nga hi Enoc, hi Jared nabuhi hin 800 ka tuig. Ngan nagkaada hiya hin mga anak nga lalaki ngan mga anak nga babaye. 20  Salit an ngatanan nga adlaw ni Jared inabot hin 962 ka tuig, ngan katapos, namatay hiya. 21  Hi Enoc nabuhi hin 65 ka tuig ngan katapos, nagkaada hiya hin anak nga hi Matusalem.+ 22  Katapos matawo an iya anak nga hi Matusalem, hi Enoc padayon nga naglakat upod han tinuod nga Dios* ha sulod hin 300 ka tuig. Ngan nagkaada hiya hin mga anak nga lalaki ngan mga anak nga babaye. 23  Salit an ngatanan nga adlaw ni Enoc inabot hin 365 ka tuig. 24  Hi Enoc padayon nga naglakat upod han tinuod nga Dios.+ Katapos, waray na hiya, kay ginkuha hiya han Dios.+ 25  Hi Matusalem nabuhi hin 187 ka tuig ngan katapos, nagkaada hiya hin anak nga hi Lamec.+ 26  Katapos matawo an iya anak nga hi Lamec, hi Matusalem nabuhi hin 782 ka tuig. Ngan nagkaada hiya hin mga anak nga lalaki ngan mga anak nga babaye. 27  Salit an ngatanan nga adlaw ni Matusalem inabot hin 969 ka tuig, ngan katapos, namatay hiya. 28  Hi Lamec nabuhi hin 182 ka tuig ngan katapos, nagkaada hiya hin anak nga lalaki. 29  Iya ginngaranan hiya hin Noe,*+ nasiring: “Ini hiya magdadara ha aton hin pagliaw* tikang ha aton makuri nga trabaho ngan tikang ha kaguol han aton mga kamot tungod han tuna nga iginsumpa ni Jehova.”+ 30  Katapos matawo an iya anak nga hi Noe, hi Lamec nabuhi hin 595 ka tuig. Ngan nagkaada hiya hin mga anak nga lalaki ngan mga anak nga babaye. 31  Salit an ngatanan nga adlaw ni Lamec inabot hin 777 ka tuig, ngan katapos, namatay hiya. 32  Katapos ni Noe mag-edad hin 500 ka tuig, nagkaada hiya hin mga anak nga hira Sem,+ Ham,+ ngan Japhet.+

Mga footnote

O “Adan; Katawohan.”
Lit., “han Dios.” Kitaa an Glossary.
Posible gud nga nangangahulogan nga “Pagpahuway; Pagliaw.”
O “katalwasan.”