Genesis 38:1-30
-
Juda ngan Tamar (1-30)
38 Hito nga panahon hi Juda binaya ha iya kabugtoan ngan nagtindog han iya tolda hirani ha usa nga lalaki nga Adulamita nga an ngaran hi Hira.
2 Nakita didto ni Juda an anak nga babaye han usa nga Canaanita+ nga an ngaran hi Shua. Salit iya hiya ginkuha ngan nakighilawas ha iya,
3 ngan nagburod hiya. Ha urhi, nag-anak hiya hin lalaki, ngan ginngaranan hiya ni Juda hin Er.+
4 Nagburod na liwat hiya ngan nag-anak hin lalaki ngan ginngaranan hiya hin Onan.
5 Katapos, nag-anak na liwat hiya hin lalaki ngan ginngaranan hiya hin Shela. Nakadto hiya* ha Aczib+ han igin-anak niya an bata.
6 Paglabay han panahon hi Juda nagkuha hin asawa para kan Er nga iya suhag, ngan Tamar an iya ngaran.+
7 Pero hi Er nga suhag ni Juda nakapasubo kan Jehova; salit ginpatay hiya ni Jehova.
8 Tungod hito hi Juda nagsiring kan Onan: “Pakighilawas ha imo hipag ngan buhata ha iya an obligasyon han usa nga bayaw ngan pangasaw-a hiya ngan tagi hin tulin an imo bugto nga lalaki.”+
9 Pero maaram hi Onan nga an tulin diri magigin iya.+ Salit han nakighilawas hiya ha iya hipag, iya ginkaragan an iya semilya ngada ha tuna basi diri mahatagan hin tulin an iya bugto.+
10 An iya ginbuhat maraot ha pagkita ni Jehova, salit iya liwat ginpatay hiya.+
11 Hi Juda nagsiring kan Tamar nga iya umagad nga babaye: “Pag-ukoy sugad nga balo ha balay han imo tatay tubtob nga dumaku an akon anak nga hi Shela,” kay nagsiring hiya ha iya kalugaringon: ‘Bangin mamatay liwat hiya pariho han iya mga bugto.’+ Salit hi Tamar kinadto ngan inukoy ha balay han iya kalugaringon nga tatay.
12 Paglabay han panahon namatay an asawa ni Juda nga anak nga babaye ni Shua.+ Han natapos ni Juda an panahon han pagtaguminatay, kinadto hiya ha iya mga paraarot han karnero ha Timnah+ upod an iya sangkay nga hi Hira nga Adulamita.+
13 Ginsumatan hi Tamar: “Aadi an imo ugangan nga lalaki nasagka ngadto ha Timnah basi arotan an iya mga karnero.”
14 Ginhukas dayon niya an iya bado sugad nga balo ngan nagpudong ngan nagkurigmos ngan liningkod hiya ha aragian tipasulod ha Enaim, nga nakada ha kalsada ngadto ha Timnah, kay iya nakita nga daku na hi Shela pero waray pa hiya ighatag ha iya sugad nga asawa.+
15 Han nakita hiya ni Juda, naghunahuna dayon hiya nga hostes ini nga babaye kay iya gintabonan an iya nawong.
16 Salit hi Juda dinaop ha iya ha ligid han kalsada ngan nagsiring: “Alayon tuguti ako nga makighilawas ha imo,” kay diri hiya maaram nga hiya an iya umagad nga babaye.+ Pero hiya nagsiring: “Ano an imo ihahatag ha akon para makighilawas ka ha akon?”
17 Hi Juda binaton: “Magpapadara ako hin nati nga kanding tikang ha akon panon.” Pero hiya nagsiring: “Maghahatag ka ba hin garantiya tubtob nga maipadara mo ito?”
18 Hi Juda nagsiring pa: “Ano nga garantiya an akon ihahatag ha imo?” binaton hiya: “An imo panselyo nga singsing+ ngan an imo higot ngan an imo tungkod nga aada ha imo kamot.” Katapos, iya ito iginhatag ha iya ngan nakighilawas ha iya, ngan nagburod hiya pinaagi ha iya.
19 Katapos hito, binuhát hiya ngan linarga ngan ginhukas an iya kurigmos ngan nagsul-ot han iya bado sugad nga balo.
20 Ngan iginpadara ni Juda an nati nga kanding pinaagi han iya sangkay nga Adulamita+ basi bawion an garantiya tikang ha babaye, pero waray gud niya maagii an babaye.
21 Nagpakiana hiya ha mga tawo ha lugar han babaye, nasiring: “Hain adto nga hostes ha templo ha Enaim nga nakada ha ligid han kalsada?” Pero hira nagsiring: “Waray pa gud kinanhi hini nga lugar nga hostes ha templo.”
22 Ha kataposan, binalik hiya ngadto kan Juda ngan nagsiring: “Waray ko gud hiya maagii, ngan labot pa, an mga tawo hito nga lugar nagsiring, ‘Waray pa gud kinanhi hini nga lugar nga hostes ha templo.’”
23 Salit hi Juda nagsiring: “Iya na la adto, basi diri kita mahingada ha kaarawdan. Basta iginpadara ko ini nga nati nga kanding, pero waray mo gud hiya maagii.”
24 Pero paglabay hin mga tulo ka bulan, ginsumatan hi Juda: “Hi Tamar nga imo umagad nga babaye nagpakunokuno nga hostes, ngan nagburod liwat hiya tungod han iya pagin hostes.” Salit hi Juda nagsiring: “Dad-a hiya ha gawas ngan sunugon hiya.”+
25 Samtang gindadara hiya ha gawas, nagpatugon hiya ngadto ha iya ugangan nga lalaki: “An tag-iya hini nga mga butang an nakaburod ha akon.” Ngan nagsiring pa hiya: “Alayon kitaa kon kan kanay ini nga panselyo nga singsing, higot, ngan tungkod.”+
26 Katapos, ginkita ito ni Juda ngan nagsiring: “Mas matadong hiya kay ha akon, kay waray ko hiya ihatag kan Shela nga akon anak.”+ Ngan waray na hiya makighilawas ha iya kahuman hadto.
27 Pag-abot han panahon han iya pag-anak, kambal an sulod han iya tagoangkan.
28 Samtang nag-aanak hiya, igin-gawas han usa nga bata an iya kamot, ngan an partera* kinuha dayon hin inulang nga malamrag an kapula* ngan iginhigot ito ha iya kamot nga nasiring: “Ini an siyahan nga ginawas.”
29 Pero pagbunlota gud niya tipabalik han iya kamot, ginawas an iya bugto, ngan an partera ginuliat: “Naghimo ka gud hin gisi para ha imo kalugaringon!” Salit ginngaranan hiya hin Perez.*+
30 Katapos, ginawas an iya bugto nga lalaki, an ginhigtan ha kamot hin inulang nga malamrag an kapula, ngan ginngaranan hiya hin Zera.+
