Genesis 45:1-28

  • Nagpakilala hi Jose (1-15)

  • Kabugtoan ni Jose ginkuha hi Jacob (16-28)

45  Diri na mapugngan ni Jose an iya kalugaringon ha atubangan han ngatanan niya nga kabulig.+ Salit ginuliat hiya: “Bayai ako niyo ngatanan!” Waray iba nga nagpabilin kaupod ni Jose samtang nagpapakilala hiya ha iya kabugtoan.+  Katapos, nagtinangis hiya hin makusog gud amo nga nabatian ito han mga Ehiptohanon ngan nabatian ito han panimalay han Paraon.  Ha urhi hi Jose nagsiring ha iya kabugtoan: “Ako hi Jose. Buhi pa ba an akon tatay?” Pero waray gud makabaton an iya kabugtoan, kay nahipausa gud hira tungod ha iya.  Salit hi Jose nagsiring ha iya kabugtoan: “Alayon, daop kamo ha akon.” Ngan dinaop hira ha iya. Katapos, hiya nagsiring: “Ako hi Jose nga iyo bugto, nga iyo iginbaligya ha Ehipto.+  Pero yana ayaw kamo kabaraka ngan ayaw pagbasola an usa kag usa tungod kay iyo ako iginbaligya dinhi; kay iginpadara ako han Dios nga una ha iyo para magtipig han kinabuhi.+  Ini an ikaduha ka tuig han gutom ha tuna,+ ngan may lima pa ka tuig nga diri mag-aarado o mag-aani.  Pero iginpadara ako han Dios nga una ha iyo basi magtipig para ha iyo hin nanhibilin+ dinhi ha tuna ngan para matipigan kamo nga buhi pinaagi hin daku nga katalwasan.  Salit, diri kamo an nagpadara ha akon nganhi, lugod an tinuod nga Dios, basi pilion ako sugad nga nangunguna nga magsaragdon* han Paraon ngan ginoo ha bug-os niya nga panimalay ngan magmarando ha bug-os nga tuna han Ehipto.+  “Balik dayon kamo ngadto ha akon tatay, ngan kinahanglan sidngan niyo hiya, ‘Ini an ginsiring han imo anak nga hi Jose: “Ginpili ako han Dios nga magin ginoo ha bug-os nga Ehipto.+ Lugsad ngadi ha akon. Ayaw paglangan.+ 10  Kinahanglan umukoy kamo ha tuna han Gosen,+ diin magigin hirani kamo ha akon—ikaw, an imo mga anak, an imo mga apo, an imo mga karnero, an imo mga baka, ngan an ngatanan nga imo. 11  Susuplayan ko kamo hin pagkaon didto, kay lima ka tuig pa an gutom.+ Kay kon diri, ikaw ngan an imo panimalay ngan an ngatanan nga imo madangat ha kapobrehan.”’ 12  Kamo mismo ngan an akon bugto nga hi Benjamin nakakakita yana nga ako gud an nagyayakan ha iyo.+ 13  Salit kinahanglan niyo sumatan an akon tatay mahitungod han ngatanan nga akon kadungganan ha Ehipto ngan han ngatanan nga iyo nakita. Yana pagdagmit kamo ngan dad-a nganhi an akon tatay.” 14  Katapos, ginhangkopan niya an* iya bugto nga hi Benjamin ngan nagtinangis, ngan hi Benjamin hinangkop ha iya ngan nagtangis.+ 15  Ngan iya ginharokan an ngatanan niya nga kabugtoan ngan nagtangis ha ira, ngan katapos hito an iya kabugtoan nakiistorya ha iya. 16  An sumat nakaabot ha panimalay han Paraon: “An kabugtoan ni Jose inabot!” Maopay ito ha pagkita han Paraon ngan ha iya mga surugoon. 17  Salit an Paraon nagsiring kan Jose: “Sumati an imo kabugtoan, ‘Buhata niyo ini: Kargahi an iyo mga hayop nga pantrabaho ngan pakadto ha tuna han Canaan, 18  ngan dad-a an iyo tatay ngan an iyo mga panimalay ngan pakanhi kamo ha akon. Ihahatag ko ha iyo an mag-opay nga mga butang ha tuna han Ehipto, ngan makaon* kamo han pinakamatambok nga produkto han tuna.’+ 19  Ngan ginsusugo kamo nga sumatan hira:+ ‘Buhata niyo ini: Pagdara hin mga karomata+ tikang ha tuna han Ehipto para ha iyo mga anak ngan ha iyo mga asawa, ngan kinahanglan isakay niyo an iyo tatay ha usa hito ngan pakanhi kamo.+ 20  Ayaw kamo kabaraka han iyo mga panag-iya,+ kay iyo an pinakamaopay ha bug-os nga tuna han Ehipto.’” 21  Ngan ito an ginbuhat han mga anak ni Israel, ngan gintagan hira ni Jose hin mga karomata sugad han iginsugo han Paraon, ngan iya gintagan hira han ira mga kinahanglanon para ha biyahe. 22  Iya gintagan an kada tagsa ha ira hin bado nga liwanan, pero hi Benjamin iya gintagan hin 300 ka bug-os nga silber ngan hin lima nga bado nga liwanan.+ 23  Ngan iya iginpadara para ha iya tatay an masunod: napulo nga asno nga may karga nga mag-opay nga mga butang han Ehipto ngan napulo nga asno nga babayé nga may karga nga lugas ngan tinapay ngan iba pa nga pagkaon nga pagkikinahanglanon han iya tatay para ha biyahe. 24  Salit iya ginpalarga an iya kabugtoan, ngan samtang nalakat hira, nagsiring hiya ha ira: “Ayaw kamo kasina ha usa kag usa ha dalan.”+ 25  Katapos, sinagka hira tikang ha Ehipto ngan kinadto ha tuna han Canaan ha ira tatay nga hi Jacob. 26  Katapos, ira hiya ginsumatan: “Buhi pa hi Jose, ngan hiya an magmarando ha bug-os nga tuna han Ehipto!”+ Pero an iya kasingkasing namanhod kay diri hiya natoo ha ira.+ 27  Han ginsumatan nira hiya han ngatanan nga pulong nga ginyakan ni Jose ha ira ngan han nakita niya an mga karomata nga iginpadara ni Jose basi sakyan niya, an espiritu han ira tatay nga hi Jacob nagmakusog utro. 28  Hi Israel ginuliat: “Husto na ito! An akon anak nga hi Jose buhi pa! Kinahanglan kumadto ako ngan makigkita ha iya antes ako mamatay!”+

Mga footnote

Lit., “sugad nga amay.”
Lit., “sinubsob hiya ha liog han.”
O “madepende.”