Genesis 17:1-27

  • Abraham magigin amay han damu nga nasud (1-8)

    • Abram ginsaliwnan hin Abraham (5)

  • Kasabotan ha pagturi (9-14)

  • Sarai ginsaliwnan hin Sarah (15-17)

  • Iginsaad an anak nga hi Isaac (18-27)

17  Han hi Abram 99 anyos, hi Jehova nagpakita kan Abram ngan nagsiring ha iya: “Ako an Dios nga Makagarahum-ha-ngatanan. Lakat ha akon atubangan ngan ipakita nga waray ka sayop.*  Maghihimo ako hin kasabotan butnga ha akon ngan ha imo,+ ngan padadamuon ko ikaw hin damu gud hinduro.”+  Tungod hito hi Abram linuhod nga nahapa, ngan an Dios padayon nga nagyakan ha iya nga nasiring:  “Ha akon bahin, kitaa! naghimo ako hin kasabotan ha imo,+ ngan magigin amay ka gud han damu nga nasud.+  An imo ngaran diri na Abram;* an imo ngaran magigin Abraham,* kay hihimoon ko ikaw nga amay han damu nga nasud.  Pahihinaboon ko nga magkaada ka hin damu hinduro nga anak ngan hihimoon ko ikaw nga magin mga nasud, ngan magtitikang ha imo an mga hadi.+  “Ngan tutumanon ko an kasabotan nga akon ginhimo butnga ha akon ngan ha imo+ ngan ha imo tulin* nga masunod ha imo ha ngatanan nira nga henerasyon sugad nga waray kataposan nga kasabotan, basi magin Dios nimo ngan han imo tulin* nga masunod ha imo.  Ngan ihahatag ko ha imo ngan ha imo tulin* nga masunod ha imo an tuna diin nag-ukoy ka sugad nga dayo+—an bug-os nga tuna han Canaan—basi magin nagpapadayon nga panag-iya, ngan ako magigin ira Dios.”+  An Dios nagsiring pa kan Abraham: “Ha imo bahin, tumana an kasabotan nga akon ginhimo, ikaw ngan an imo katulinan* nga masunod ha imo ha ngatanan nira nga henerasyon. 10  Ini an kasabotan nga akon ginhimo butnga ha akon ngan ha iyo, nga imo tutumanon ngan han imo katulinan* nga masunod ha imo: An tagsa nga lalaki ha iyo kinahanglan turion.+ 11  Kinahanglan magpaturi kamo ngan magigin tigaman ito han kasabotan butnga ha akon ngan ha iyo.+ 12  Ha ngatanan niyo nga henerasyon, an tagsa nga lalaki ha iyo nga walo ka adlaw an edad kinahanglan turion,+ an bisan hin-o nga natawo ha panimalay ngan an bisan hin-o nga diri mo katulinan* ngan ginpalit pinaagi hin kwarta tikang ha usa nga dayo. 13  An tagsa nga lalaki nga matatawo ha imo panimalay ngan an tagsa nga lalaki nga ginpalit pinaagi han imo kwarta kinahanglan turion,+ ngan ini nga tigaman ha iyo unod magigin pamatuod han nagpapadayon nga kasabotan nga akon ginhimo ha iyo. 14  Kon may diri turi nga lalaki nga diri magpaturi, ito nga tawo* kinahanglan patayon.* Iya gintalapas an kasabotan nga akon ginhimo.” 15  Katapos, an Dios nagsiring kan Abraham: “Mahitungod han imo asawa nga hi Sarai,*+ ayaw hiya pagtawaga nga Sarai, kay Sarah* an iya magigin ngaran. 16  Bibendisyonan ko hiya ngan tatagan ko liwat ikaw hin anak nga lalaki pinaagi ha iya;+ bibendisyonan ko hiya ngan hiya magigin mga nasud; magtitikang ha iya an mga hadi han mga katawohan.” 17  Tungod hini hi Abraham linuhod nga nahapa ngan nagtawa ngan nagsiring ha iya kasingkasing:+ “Magkakaada pa ba hin anak an tawo nga 100 anyos, ngan mag-aanak pa ba hi Sarah nga 90 anyos na?”+ 18  Salit hi Abraham nagsiring ha tinuod nga Dios: “Makarawat unta ni Ismael an imo bendisyon!”+ 19  An Dios binaton: “Hi Sarah nga imo asawa sigurado nga mag-aanak hin lalaki nga imo anak, ngan kinahanglan ngaranan mo hiya hin Isaac.*+ Ngan maghihimo ako hin kasabotan ha iya. Ito magigin waray kataposan nga kasabotan ha iya tulin* nga masunod ha iya.+ 20  Pero mahitungod kan Ismael, nabatian ko ikaw. Kitaa! Bibendisyonan ko hiya ngan pahihinaboon ko nga magkaada hiya hin damu nga anak ngan padadamuon ko gud hiya hinduro. Ha iya magtitikang an 12 nga lider ngan hihimoon ko hiya nga magin daku nga nasud.+ 21  Pero, maghihimo ako hin kasabotan kan Isaac+ nga ig-aanak ni Sarah ha imo ha pariho hini nga panahon ha sunod nga tuig.”+ 22  Katapos han ira pag-istorya, an Dios binaya kan Abraham. 23  Katapos, ginkuha ni Abraham an iya anak nga hi Ismael ngan an ngatanan nga lalaki nga natawo ha iya panimalay ngan an ngatanan nga iya ginpalit pinaagi hin kwarta, an tagsa nga lalaki ha panimalay ni Abraham, ngan iya ginpanuri hira hito mismo nga adlaw, sugad han ginsiring ha iya han Dios.+ 24  Hi Abraham 99 anyos han nagpaturi hiya.+ 25  Ngan hi Ismael nga iya anak 13 anyos han nagpaturi hiya.+ 26  Hito mismo nga adlaw, hi Abraham ginturi, ngan pati an iya anak nga hi Ismael. 27  An ngatanan nga lalaki ha iya panimalay, an bisan hin-o nga natawo ha iya panimalay ngan an bisan hin-o nga ginpalit pinaagi hin kwarta tikang ha usa nga dayo, ginpanuri liwat kaupod niya.

Mga footnote

O “waray ikasaway ha imo.”
Nangangahulogan nga “An Amay Hitaas (Gindayaw).”
Nangangahulogan nga “Amay han Damu nga Tawo (Kadam-an); Amay han Damu.”
Lit., “binhi.”
Lit., “binhi.”
Lit., “binhi.”
Lit., “binhi.”
Lit., “binhi.”
Lit., “binhi.”
O “kalag.”
Lit., “utdon tikang ha iya katawohan.”
Posible nga nangangahulogan nga “Makilarison.”
Nangangahulogan nga “Prinsesa.”
Nangangahulogan nga “Pagtinawa.”
Lit., “binhi.”