Genesis 4:1-26

  • Cain ngan Abel (1-16)

  • Katulinan ni Cain (17-24)

  • Set ngan iya anak nga hi Enos (25, 26)

4  Hi Adan nakighilawas kan Eva nga iya asawa, ngan nagburod hiya.+ Han nag-anak hiya kan Cain,+ hiya nagsiring: “Nakahimo* ako hin bata nga lalaki ha bulig ni Jehova.”  Paglabay han panahon, igin-anak liwat niya hi Abel nga bugto ni Cain.+ Hi Abel nagin paraataman hin panon, pero hi Cain nagin parag-uma.  Paglabay hin pipira ka panahon, nagdara hi Cain hin mga produkto tikang ha uma sugad nga halad kan Jehova.  Pero hi Abel nagdara hin pipira nga suhag han iya panon,+ upod an mga tambok hito. Nalipay hi Jehova kan Abel ngan ha iya halad,+  pero waray hiya malipay kan Cain ngan ha iya halad. Salit nasina gud hi Cain ngan nabido.*  Tungod hito, hi Jehova nagsiring kan Cain: “Kay ano nga duro an imo kasina ngan kabido?  Kon magbuhat ka hin maopay, diri ka ba uuyonan utro?* Pero kon diri ka magbuhat hin maopay, an sala naghuhulat ha imo ha purtahan basi atakehon ka,* ngan hingyap hito nga mandoan ka; pero makukontrol mo ba ito?”  Katapos hito, hi Cain nagsiring ha iya bugto nga hi Abel: “Kadto kita ha uma.” Samtang nakadto hira ha uma, gin-atake ni Cain an iya bugto nga hi Abel ngan ginpatay hiya.+  Ha urhi, hi Jehova nagsiring kan Cain: “Hain an imo bugto nga hi Abel?” ngan hiya binaton: “Ambot. Parabantay ba ako han akon bugto?” 10  Salit Hiya nagsiring: “Ano an imo ginbuhat? Pamati! An dugo han imo bugto naggiginuliat ha akon tikang ha tuna.+ 11  Ngan yana iginsumpa ka nga palayason tikang ha tuna nga nagbuka han baba hito basi karawaton an dugo han imo bugto tikang ha imo kamot.+ 12  Kon mag-uma ka, an tuna diri maghahatag ha imo han igo nga produkto* hito. Maglilinayaw-layaw ka ngan magigin pugante ha tuna.” 13  Salit hi Cain nagsiring kan Jehova: “Mabug-at gud pas-anon an sirot ha akon sayop. 14  Yana nga adlaw imo ako ginpapalayas tikang hini nga lugar,* ngan diri mo na ako makikita; maglilinayaw-layaw ako ngan magigin pugante ha tuna, ngan sigurado nga papatayon ako han bisan hin-o nga makakita ha akon.” 15  Salit hi Jehova nagsiring ha iya: “Tungod hito, an bisan hin-o nga magpatay kan Cain, pito ka beses nga mag-aantos han bulos.” Salit hi Jehova nagbutang* hin tigaman kan Cain basi diri hiya patayon han bisan hin-o nga makakita ha iya. 16  Ngan binaya hi Cain ha atubangan ni Jehova ngan inukoy ha tuna han Distyero,* ha este han Eden.+ 17  Katapos hito, nakighilawas hi Cain ha iya asawa,+ ngan nagburod hiya ngan nag-anak kan Enoc. Ngan hi Cain nagtukod hin syudad ngan gintawag ito nga Enoc pariho ha ngaran han iya anak. 18  Paglabay han panahon, hi Enoc nagkaada hin anak nga hi Irad. Ngan hi Irad nagkaada hin anak nga hi Mehujael, ngan hi Mehujael nagkaada hin anak nga hi Metusael, ngan hi Metusael nagkaada hin anak nga hi Lamec. 19  Hi Lamec nag-asawa hin duha. An ngaran han siyahan amo hi Ada, ngan an ngaran han ikaduha amo hi Zila. 20  Hi Ada nag-anak kan Jabal. Hiya an pinakauna nga inukoy ha mga tolda ngan nag-ataman hin mga hayop. 21  An ngaran han iya bugto amo hi Jubal. Hiya an pinakauna ha ngatanan nga nagtutokar han arpa ngan han plawta. 22  Nag-anak liwat hi Zila kan Tubal-cain, nga nagpapanday han ngatanan nga klase hin garamiton nga tikang ha tumbaga* ngan puthaw. Ngan hi Naama an bugto nga babaye ni Tubal-cain. 23  Katapos, hi Lamec nagkomposo hini nga mga pulong para ha iya mga asawa nga hira Ada ngan Zila: “Pamatii an akon tingog, kamo nga mga asawa ni Lamec;Pamatii an akon isisiring: Nakamatay ako hin tawo kay ginsamaran ako,Oo, usa nga batan-on nga lalaki kay ginpasakitan ako. 24  Kon hi Cain 7 ka beses igbubulos,+Kon sugad hi Lamec 77 ka beses.” 25  Hi Adan nakighilawas utro ha iya asawa, ngan nag-anak hiya hin lalaki. Ginngaranan ni Eva an bata hin Set*+ kay siring pa niya, “Gintagan ako han Dios hin usa pa nga anak* nga kasaliwan ni Abel, kay ginpatay hiya ni Cain.”+ 26  Hi Set nagkaada liwat anak nga lalaki ngan iya ginngaranan hiya hin Enos.+ Hito nga panahon an mga tawo nagtikang pagtawag ha ngaran ni Jehova.

Mga footnote

O “Nag-anak.”
Lit., “ngan nagmud-ot an iya nawong.”
O “diri ba magkakaada hin pagdayaw?”
Karuyag sidngon, pariho hin mapintas nga hayop.
Lit., “gahum.”
Lit., “tikang ha bawbaw han tuna.”
O “naghimo.”
O “ha tuna han Nod.”
Ha Ingles, copper.
Nangangahulogan nga “Ginpili; Ginbutang; Igintoka.”
Lit., “binhi.”