Genesis 19:1-38
19 An duha nga anghel inabot ha Sodoma han pagsirom, ngan hi Lot nagliliningkod ha ganghaan han Sodoma. Han nakita hira ni Lot, binuhát hiya basi tapoon hira ngan yinukbo nga an iya nawong naatubang ha tuna.+
2 Ngan hiya nagsiring: “Alayon, mga ginoo ko, alayon kadi ha balay han iyo surugoon ngan magpalabay kamo han gab-i ngan basi mahimsawan kamo. Katapos, mahimo kamo bumuhát hin temprano ngan magpadayon han iyo pagbiyahe.” Binaton hira: “Diri, ha plasa kami magpapalabay han gab-i.”
3 Pero ginpirit gud niya hira salit inupod hira ha iya ngadto ha iya balay. Katapos, nag-andam hiya hin panagtawo para ha ira, ngan nagluto hiya hin tinapay nga waray libadura, ngan nangaon hira.
4 Antes hira humigda basi kumaturog, an mga tawo ha syudad—an mga lalaki ha Sodoma tikang ha bata tubtob ha lagas, hira ngatanan—nagpalibot ha balay sugad nga usa nga masamok nga grupo.
5 Ngan padayon nga gintinawag nira hi Lot ngan nagsiniring ha iya: “Hain an mga lalaki nga kinanhi ha imo yana nga gab-i? Igawas hira ngadi ha amon basi kami makighilawas ha ira.”+
6 Katapos, hi Lot ginawas ha purtahan ngadto ha ira, ngan iya ginsadhan an purtahan han balay.
7 Nagsiring hiya: “Alayon mga kabugtoan, ayaw kamo pagbuhat hin maraot.
8 Alayon, may-ada ako didi duha nga anak nga babaye nga waray pa makighilawas hin lalaki. Alayon, tuguti ako nga igawas hira nganhi ha iyo basi buhaton niyo ha ira anoman an baga hin maopay ha iyo. Pero ayaw kamo pagbuhat hin bisan ano hini nga mga lalaki, kay kinanhi hira basi sumirong* ha akon atop.”+
9 Katapos, hira nagsiring: “Iwas dida!” Ngan nagsiring pa hira: “Ini nga nag-uusahan nga dayo kinanhi basi mag-ukoy dinhi, ngan nangangahas pa gud hiya ha paghukom ha aton! Yana mas maraot pa an bubuhaton namon ha imo kay ha ira.” Ngan ira ginsuok* hi Lot ngan nagtipakadto ha purtahan basi rub-on ito.
10 Salit gin-unat han mga lalaki an ira mga kamot ngan gindara nira hi Lot ha sulod han balay, ngan ira ginsadhan an purtahan.
11 Pero ginbuta nira an mga tawo nga nakada ha may purtahan han balay, bata ngan lagas, salit nakapoy hira ha pagpinamiling han purtahan.
12 Katapos, an mga lalaki nagsiring kan Lot: “May-ada ka pa ba iba nga kaupod dinhi? Mga umagad nga lalaki, an imo mga anak nga lalaki, an imo mga anak nga babaye, ngan an ngatanan mo nga tawo ha syudad, igawas hini nga lugar!
13 Kay amon bubungkagon ini nga lugar, tungod kay an reklamo kontra ha ira nagduro na gud* ha atubangan ni Jehova,+ amo nga ginpakanhi kami ni Jehova basi bungkagon an syudad.”
14 Salit ginawas hi Lot ngan nakiistorya ha iya mga umagad nga lalaki nga maarasawa han iya mga anak nga babaye, ngan padayon nga nagsiniring hiya: “Pagdagmit! Gawas kamo hini nga lugar, kay bubungkagon ni Jehova an syudad!” Pero para ha iya mga umagad nga lalaki baga hin nagtitinuyaw la hiya.+
15 Han maagahon na, ginpaapura han mga anghel hi Lot, nasiring: “Pagdagmit! Dad-a an imo asawa ngan an imo duha nga anak nga babaye nga kaupod mo, basi diri ka mahiupod kon bungkagon an syudad tungod han kasaypanan hito!”+
16 Han naglalangan pa hiya, hi Jehova nagpakita ha iya hin pagpaid,+ salit ginkaptan han mga lalaki an iya kamot ngan an kamot han iya asawa ngan an mga kamot han iya duha nga anak nga babaye, ngan ira igin-gawas hiya ngan iginkadto hiya ha gawas han syudad.+
17 Han nadara na nira hira ha gawas hito, usa ha ira an nagsiring: “Palagiw basi matalwas an imo kinabuhi!* Ayaw paglingi ha imo luyo+ ngan ayaw pag-undang ha bisan diin nga dapit han distrito!+ Palagiw ngadto ha kabukiran basi diri ka mabungkag!”
18 Katapos, nagsiring hi Lot: “Alayon, diri didto, Jehova!
19 Alayon, yana an imo surugoon nakakarawat han imo pag-uyon ngan nagpapakita ka hin duro nga pagkabuotan* ha akon pinaagi ha pagtipig ha akon* nga buhi,+ pero diri ako makakapalagiw ngadto ha kabukiran kay nahahadlok ako nga bangin may maraot nga mahitabo ha akon ngan mamatay ako.+
20 Alayon, yana ini nga bungto hirani ngan makakapalagiw ako ngadto; gutiay la ito nga lugar. Alayon, puydi ba ako makapalagiw ngadto? Gutiay la ito nga lugar. Ngan matatalwas ako.”*
21 Salit hiya nagsiring ha iya: “Sige, magpapakita liwat ako ha imo hin konsiderasyon+ pinaagi ha diri pagbungkag han bungto nga imo ginsiring.+
22 Dagmita! Palagiw ngadto, kay diri ako makakabuhat hin bisan ano tubtob nga makaabot ka didto!”+ Ito an hinungdan nga ginngaranan niya hin Zoar* an bungto.+
23 Sinirang na an adlaw han inabot hi Lot ha Zoar.
24 Katapos, hi Jehova nagpauran hin asupre ngan kalayo ha Sodoma ngan Gomorra—tikang ito kan Jehova, tikang ha langit.+
25 Salit ginbungkag niya ini nga mga syudad, oo, an bug-os nga distrito, upod na an ngatanan nga umurukoy ha mga syudad ngan an mga tanom ha tuna.+
26 Pero an asawa ni Lot, nga nakada ha iya luyo, liningi, ngan hiya nagin harigi nga asin.+
27 Yana hi Abraham binuhát hin temprano ha aga ngan kinadto ha lugar nga iya gintindogan ha naglabay nga adlaw ha atubangan ni Jehova.+
28 Han nagkita hiya ngadto ha Sodoma ngan Gomorra ngan ha ngatanan nga lugar han distrito, makaharadlok gud an iya nakita. May-ada madakmol nga aso nga nagtitipaigbaw tikang ha tuna pariho han madakmol nga aso han hudno!+
29 Salit han ginbungkag han Dios an mga syudad han distrito, nahinumdom an Dios kan Abraham pinaagi ha pagpagawas kan Lot tikang ha mga syudad nga iya ginbungkag, an mga syudad nga gin-ukyan ni Lot.+
30 Ha urhi sinagka hi Lot tikang ha Zoar upod an iya duha nga anak nga babaye ngan nag-ukoy ha kabukiran,+ kay nahadlok hiya pag-ukoy ha Zoar.+ Salit inukoy hiya ha usa nga lungib upod an iya duha nga anak nga babaye.
31 Ngan an magurang nagsiring ha manghod: “Lagas na an aton tatay, ngan waray lalaki hini nga lugar nga mangangasawa ha aton uyon ha kustomre han bug-os nga tuna.
32 Kadi, tagan naton an aton tatay hin bino nga maiinom, ngan dirig kita ha iya, ngan magkakaada kita hin katulinan tikang ha aton tatay.”
33 Salit hito nga gab-i gintinagan nira an ira tatay hin bino nga maiinom; katapos, sinulod an magurang ngan dinirig ha iya tatay, pero waray mahibaro an iya tatay han iya paghigda ngan han iya pagbuhát.
34 Katapos, han sunod nga adlaw, an magurang nagsiring ha manghod: “Kitaa, dinirig ako ha akon tatay kagab-i. Tagan na liwat naton hiya yana nga gab-i hin bino nga maiinom. Katapos, kadto ha sulod ngan dirig ha iya, ngan magkakaada kita hin katulinan tikang ha aton tatay.”
35 Salit hito liwat nga gab-i, pauroutro nga gintagan nira an ira tatay hin bino nga maiinom; katapos, an manghod kinadto ngan dinirig ha iya tatay, pero waray mahibaro an iya tatay han iya paghigda ngan han iya pagbuhát.
36 Salit an duha nga anak nga babaye ni Lot nagburod pinaagi han ira tatay.
37 An magurang nag-anak hin lalaki ngan ginngaranan niya hin Moab.+ Hiya an amay han ginkikilala yana nga mga Moabita.+
38 An manghod nag-anak liwat hin lalaki, ngan ginngaranan niya hin Ben-ami. Hiya an amay han ginkikilala yana nga mga Ammonita.+
