Genesis 11:1-32

  • Torre han Babel (1-4)

  • Ginsamok ni Jehova an yinaknan (5-9)

  • Tikang kan Sem tubtob kan Abram (10-32)

    • Pamilya ni Tera (27)

    • Abram binaya ha Ur (31)

11  Yana an bug-os nga tuna padayon nga may uusa nga yinaknan ngan nagamit hin pariho nga mga pulong.*  Han nagbiyahe hira tipakadto ha este, nadiskobrehan nira an usa nga kapatagan ha tuna han Sinar,+ ngan didto hira inukoy.  Katapos, nagsiring hira ha usa kag usa: “Kadi! Paghimo kita hin mga briks ngan lutoon naton ito ha kalayo.” Salit naggamit hira hin briks imbes nga bato, ngan alkitran sugad nga semento.  Yana hira nagsiring: “Kadi! Pagtukod kita hin syudad para ha aton ngan hin torre nga an pungkay abot ha langit, basi magin bantog kita ngan diri kita magsarang ha bawbaw han bug-os nga tuna.”+  Katapos, linusad hi Jehova basi kitaon an syudad ngan an torre nga gintukod han mga anak han mga tawo.  Katapos, hi Jehova nagsiring: “Kitaa! Ini nga katawohan nagkakaurosa nga may usa nga yinaknan,+ ngan ini an ira gintikangan paghimo. Yana waray butang nga ira mahuhunahuna nga buhaton nga magigin imposible para ha ira.  Kadi! Lusad kita+ ngadto ngan samukon naton an ira yinaknan basi diri nira masabtan an yinaknan han usa kag usa.”  Salit tikang didto ginsarang hira ni Jehova ha bawbaw han bug-os nga tuna,+ ngan hinay-hinay nga inundang hira ha pagtukod han syudad.  Ito an hinungdan nga ginngaranan ito nga Babel,*+ kay didto ginsamok ni Jehova an yinaknan han bug-os nga tuna, ngan tikang didto ginsarang hira ni Jehova ha bawbaw han bug-os nga tuna. 10  Ini an kasaysayan ni Sem.+ Hi Sem 100 anyos han natawo an iya anak nga hi Arpacsad+ paglabay hin duha ka tuig katapos han Baha. 11  Katapos matawo an iya anak nga hi Arpacsad, hi Sem padayon nga nabuhi hin 500 ka tuig. Ngan nagkaada hiya hin mga anak nga lalaki ngan mga anak nga babaye.+ 12  Hi Arpacsad nabuhi hin 35 ka tuig ngan katapos, natawo an iya anak nga hi Shela.+ 13  Katapos matawo an iya anak nga hi Shela, hi Arpacsad padayon nga nabuhi hin 403 ka tuig. Ngan nagkaada hiya hin mga anak nga lalaki ngan mga anak nga babaye. 14  Hi Shela nabuhi hin 30 ka tuig ngan katapos, natawo an iya anak nga hi Eber.+ 15  Katapos matawo an iya anak nga hi Eber, hi Shela padayon nga nabuhi hin 403 ka tuig. Ngan nagkaada hiya hin mga anak nga lalaki ngan mga anak nga babaye. 16  Hi Eber nabuhi hin 34 ka tuig ngan katapos, natawo an iya anak nga hi Peleg.+ 17  Katapos matawo an iya anak nga hi Peleg, hi Eber padayon nga nabuhi hin 430 ka tuig. Ngan nagkaada hiya hin mga anak nga lalaki ngan mga anak nga babaye. 18  Hi Peleg nabuhi hin 30 ka tuig ngan katapos, natawo an iya anak nga hi Reu.+ 19  Katapos matawo an iya anak nga hi Reu, hi Peleg padayon nga nabuhi hin 209 ka tuig. Ngan nagkaada hiya hin mga anak nga lalaki ngan mga anak nga babaye. 20  Hi Reu nabuhi hin 32 ka tuig ngan katapos, natawo an iya anak nga hi Serug. 21  Katapos matawo an iya anak nga hi Serug, hi Reu padayon nga nabuhi hin 207 ka tuig. Ngan nagkaada hiya hin mga anak nga lalaki ngan mga anak nga babaye. 22  Hi Serug nabuhi hin 30 ka tuig ngan katapos, natawo an iya anak nga hi Nahor. 23  Katapos matawo an iya anak nga hi Nahor, hi Serug padayon nga nabuhi hin 200 ka tuig. Ngan nagkaada hiya hin mga anak nga lalaki ngan mga anak nga babaye. 24  Hi Nahor nabuhi hin 29 ka tuig ngan katapos, natawo an iya anak nga hi Tera.+ 25  Katapos matawo an iya anak nga hi Tera, hi Nahor padayon nga nabuhi hin 119 ka tuig. Ngan nagkaada hiya hin mga anak nga lalaki ngan mga anak nga babaye. 26  Hi Tera nabuhi hin 70 ka tuig, katapos hito nagkaada hiya hin mga anak nga hira Abram,+ Nahor,+ ngan Haran. 27  Ini an kasaysayan ni Tera. Hi Tera an tatay nira Abram, Nahor, ngan Haran; ngan hi Haran an tatay ni Lot.+ 28  Han buhi pa an iya tatay nga hi Tera, namatay hi Haran ha tuna nga iya natawhan, ha Ur+ nga lugar han mga Caldeo.+ 29  Hira Abram ngan Nahor nag-asawa. An ngaran han asawa ni Abram amo hi Sarai,+ ngan an ngaran han asawa ni Nahor amo hi Milca,+ an anak nga babaye ni Haran nga tatay nira Milca ngan Isca. 30  Ngan hi Sarai baog;+ waray hiya anak. 31  Katapos, ginkuha ni Tera hi Abram nga iya anak nga lalaki ngan hi Lot nga iya apo nga lalaki,+ an anak ni Haran, ngan hi Sarai nga iya umagad nga babaye, an asawa ni Abram nga iya anak, ngan inupod hira ha iya pagbaya ha Ur nga lugar han mga Caldeo basi kumadto ha tuna han Canaan.+ Ha urhi inabot hira ha Haran+ ngan inukoy didto. 32  An mga adlaw ni Tera inabot hin 205 ka tuig. Katapos, namatay hi Tera ha Haran.

Mga footnote

O “hin usa nga bokabularyo.”
Nangangahulogan nga “Kasamok.”