Genesis 13:1-18

  • Abram bumalik ha Canaan (1-4)

  • Abram ngan Lot nagbulag (5-13)

  • Saad han Dios kan Abram gin-unabi utro (14-18)

13  Katapos, ginawas hi Abram ha Ehipto ngan sinagka ngadto ha Negeb,+ hiya ngan an iya asawa ngan an ngatanan niya nga panag-iya, upod hi Lot.  Hi Abram may-ada damu hinduro nga hayop, silber, ngan bulawan.+  Nagkampo hiya ha iba-iba nga lugar samtang nagbibiyahe hiya tikang ha Negeb ngadto ha Bethel, tubtob nga inabot hiya ha lugar diin nakadto hadto an iya tolda ha butnga han Bethel ngan Ai,+  ha lugar diin naghimo hiya hadto hin halaran. Didto nagtawag hi Abram ha ngaran ni Jehova.  Yana hi Lot nga kaupod ni Abram ha pagbiyahe, nagtatag-iya liwat hin mga karnero, mga baka, ngan mga tolda.  Salit diri na igo an tuna para umukoy hira ngatanan ha usa nga lugar; an ira mga panag-iya nagdamu na hinduro salit diri na hira puydi umukoy nga tarampo.  Sugad nga resulta, nag-araway an mga magbarantay han mga hayop ni Abram ngan an mga magbarantay han mga hayop ni Lot. (Hito nga panahon an mga Canaanita ngan an mga Perizita an naukoy hito nga tuna.)+  Salit hi Abram nagsiring kan Lot:+ “Alayon, diri kita angay mag-away sugad man an akon mga magbarantay ngan an imo mga magbarantay, kay magburugto kita.  Diri ba an bug-os nga tuna aada para ha imo? Alayon, bulag ha akon. Kon kumadto ka ha wala, mapakadto ako ha too; pero kon kumadto ka ha too, mapakadto ako ha wala.” 10  Salit iginsiplat ni Lot an iya mga mata ngan nakita niya nga an bug-os nga distrito han Jordan+ usa nga natutubigan hin maopay nga rehiyon (antes ni Jehova bungkagon an Sodoma ngan Gomorra), pariho han garden ni Jehova,+ pariho han tuna han Ehipto, tubtob ha Zoar.+ 11  Katapos, ginpili ni Lot an bug-os nga distrito han Jordan, ngan ginbalhin ni Lot an iya kampo ngadto ha este. Salit nagbulag hira. 12  Hi Abram nag-ukoy ha tuna han Canaan, pero hi Lot nag-ukoy hirani ha mga syudad han distrito.+ Ha urhi iya gintindog an iya tolda hirani ha Sodoma. 13  Yana an mga tawo ha Sodoma magraot, duro ka magpakasasala kontra kan Jehova.+ 14  Hi Jehova nagsiring kan Abram han binulag na hi Lot ha iya: “Alayon, isiplat an imo mga mata ngan kitaa tikang ha imo hinmumutangan, an norte ngan sur, este ngan weste, 15  kay an bug-os nga tuna nga imo nakikita, ihahatag ko ha imo ngan ha imo tulin* sugad nga nagpapadayon nga panag-iya.+ 16  Akon pahihinaboon nga an imo tulin* magin sugad kadamu han mga tapotapo ha tuna, salit kon may bisan hin-o nga makaihap han mga tapotapo ha tuna, kon sugad an imo tulin* maiihap.+ 17  Buhát, latasa an kahilaba ngan kahaluag han tuna, kay ihahatag ko ito ha imo.” 18  Salit hi Abram padayon nga nag-ukoy ha mga tolda. Ha urhi inabot hiya ngan nag-ukoy ha butnga han dagku nga kakahoyan han Mamre,+ nga aadto ha Hebron,+ ngan didto naghimo hiya hin halaran para kan Jehova.+

Mga footnote

Lit., “binhi.”
Lit., “binhi.”
Lit., “binhi.”