Zanafilla 7:1-24
7 Pastaj Jehovai i tha Noesë: «Hyr në arkë ti dhe gjithë familja jote, sepse kam parë se mes këtij brezi ti je i drejtë në sytë e mi.+
2 Nga çdo lloj kafshe të pastër merr shtatë,*+ mashkull dhe femër. Nga çdo kafshë të papastër merr vetëm dy, mashkullin dhe femrën.
3 Po ashtu, nga krijesat fluturuese të qiejve merr shtatë,* mashkull dhe femër, për t’i ruajtur gjallë pasardhësit e tyre në mbarë tokën,+
4 sepse vetëm pas shtatë ditësh do të sjell shi+ mbi tokë për 40 ditë e 40 net+ dhe do të fshij nga faqja e dheut çdo qenie të gjallë që kam bërë.»+
5 Kështu Noeja bëri gjithçka që i urdhëroi Jehovai.
6 Noeja ishte 600 vjeç kur u derdhën ujërat e përmbytjes në tokë.+
7 Kështu Noeja, djemtë e tij, e shoqja dhe gratë e djemve, hynë në arkë para se të derdheshin ujërat e përmbytjes.+
8 Kafshët e pastra dhe të papastra, krijesat fluturuese dhe çdo gjë që lëviz në tokë,+
9 hynë në arkë te Noeja dy nga dy, mashkull e femër, pikërisht siç e urdhëroi Perëndia Noenë.
10 Shtatë ditë më vonë ujërat e përmbytjes u derdhën mbi tokë.
11 Vitin e 600-të të jetës së Noesë, muajin e dytë, ditën e 17-të të muajit, pikërisht atë ditë shpërthyen gjithë burimet e ujërave të thella e të paana dhe u hapën portat e qiejve.+
12 Mbi tokë ra shi për 40 ditë e 40 net.
13 Po atë ditë Noeja hyri në arkë bashkë me djemtë, Semin, Kamin dhe Jafetin,+ të shoqen dhe tri gratë e djemve.+
14 Bashkë me ta hyri edhe çdo kafshë e egër sipas llojit të vet, çdo kafshë e butë sipas llojit të vet, çdo kafshë zvarritëse sipas llojit të vet, çdo krijesë fluturuese sipas llojit të vet, çdo zog dhe çdo krijesë me krahë.
15 Të gjitha krijesat e gjalla që kishin frymën e jetës,* shkuan në arkë te Noeja dy nga dy;
16 hynë mashkull e femër nga çdo lloj krijese e gjallë, pikërisht ashtu siç e urdhëroi Perëndia Noenë. Pas kësaj Jehovai e mbylli derën.
17 Përmbytja vazhdoi për 40 ditë mbi tokë; niveli i ujërave ngrihej e ngrihej dhe ato nisën ta mbanin arkën lart, e cila pluskonte mbi ujëra të thella.
18 Ujërat u bënë gjithnjë e më të furishme dhe vazhduan të ngriheshin, kurse arka pluskonte mbi ujëra.
19 Ujërat e përmbytën tokën aq shumë, sa u mbuluan të gjitha malet e larta nën tërë qiejt.+
20 Ujërat u ngritën deri në 15 kute* mbi male.
21 Kështu mori fund çdo krijesë e gjallë* që lëvizte në tokë:+ krijesat fluturuese, kafshët e buta, kafshët e egra dhe krijesat e vogla që rrinin në tufa,* si dhe të gjithë njerëzit.+
22 Çdo gjë në tokë të thatë që kishte në vrimat e hundës frymën e jetës,* mori fund.+
23 Ai fshiu nga faqja e dheut çdo qenie të gjallë: njerëzit, kafshët,* kafshët zvarritëse dhe krijesat fluturuese të qiejve. Të gjitha u fshinë nga faqja e dheut.+ Mbijetuan vetëm Noeja dhe ata që ishin me të në arkë.+
24 Ujërat e përmbytën tokën për 150 ditë.+
Shënimet
^ Një mundësi tjetër «merr shtatë çifte».
^ Një mundësi tjetër «merr shtatë çifte».
^ Ose «forcën e jetës».
^ Një kut ishte 44,5 cm. Shih Shtojcën B14.
^ Fjalë për fjalë «çdo mish».
^ Ka të ngjarë që kjo fjalë në hebraisht t’u referohet krijesave të vogla që rrinë në tufa të mëdha, të cilat gjenden në ajër, në ujë ose në tokë.
^ Ose «forcën e jetës».
^ Ose «kafshët katërkëmbëshe».
