Exodo 5:1-23

  • Moises ngan Aaron inatubang ha Paraon (1-5)

  • Nagtikaduro an pagtalumpigos (6-18)

  • Moises ngan Aaron ginbasol han Israel (19-23)

5  Katapos hito, hira Moises ngan Aaron sinulod ngan nagsiring ha Paraon: “Ini an siring ni Jehova, an Dios han Israel, ‘Palargaha an akon katawohan basi hira makagselebrar hin piyesta para ha akon didto ha kamingawan.’”  Pero an Paraon nagsiring: “Hin-o hi Jehova+ nga kinahanglan ko sugton hiya nga palargahon an Israel?+ Diri gud ako nakilala kan Jehova, ngan labot pa, diri ko palalargahon an Israel.”+  Kondi nagsiring hira: “An Dios han mga Hebreo nakigkomunikar ha amon. Alayon tuguti kami nga magbiyahe hin tulo ka adlaw ngadto ha kamingawan ngan maghalad kan Jehova nga amon Dios;+ kay kon diri, sisirotan kami niya pinaagi hin sakit o pinaagi han espada.”  An hadi han Ehipto binaton ha ira: “Moises ngan Aaron, kay ano nga iyo ginkukuha an mga tawo tikang ha ira trabaho? Balik kamo ha iyo trabaho!”*+  Ngan an Paraon nagsiring pa: “Kitaa kon mationan-o kadamu an iyo katawohan hini nga tuna, ngan iyo hira ginpapapahuway tikang ha ira trabaho.”  Hito mismo nga adlaw, ginsugo han Paraon an mga nagdudumara han trabaho ngan an ira mga kapatas:  “Ayaw na niyo pagtagi hin uhot an mga tawo ha paghimo hin mga briks.+ Hira an pakadtoa ngan patiroka han uhot nga ira gagamiton.  Pero kinahanglan amo la gihapon nga kadamu han briks an iyo igpapahimo ha ira sugad han ira ginhihimo ha naglabay. Ayaw ito pag-ibani para ha ira, kay naghihinay-hinay* hira. Ito an hinungdan nga naguliat hira, ‘Karuyag namon lumarga, karuyag namon maghalad ha amon Dios!’  Dugangi an ira trabaho, ngan siguroha nga pirme hira may gintatrabaho basi diri hira magpinamati ha mga buwa.” 10  Salit an mga nagdudumara han trabaho+ ngan an ira mga kapatas ginawas ngan nagsiring ha mga tawo: “Ini an ginsiring han Paraon, ‘Diri ko na kamo tatagan hin uhot. 11  Kadto kamo ngan kamo an paglugaring panguha hin uhot nga iyo gagamiton diin man kamo makaagi hito, pero an iyo trabaho diri gud iibanan.’” 12  Salit an mga tawo nagsarang ha bug-os nga tuna han Ehipto basi manguha hin dagami nga magagamit sugad nga uhot. 13  Ngan an mga nagdudumara han trabaho padayon nga nagsagda ha ira: “Kinahanglan an tagsa ha iyo makahuman han iyo trabaho ha kada adlaw, pariho han gintatagan pa kamo hin uhot.” 14  Ginkastigo liwat an mga kapatas nga mga Israelita, nga ginpili han mga nagdudumara han trabaho han Paraon basi manguna ha mga Israelita.+ Nagpakiana hira ha mga kapatas: “Kay ano nga waray niyo maabot an kadamu han mga briks nga angay niyo himoon sugad han iyo nahihimo ha naglabay? Ito an nahitabo kakulop* ngan yana nga adlaw.” 15  Salit an mga kapatas nga mga Israelita sinulod ngan nagreklamo ha Paraon: “Kay ano nga sugad hini an imo pagtratar ha imo mga surugoon? 16  Waray uhot nga iginhahatag ha imo mga surugoon, pero nasiring hira ha amon, ‘Paghimo kamo hin mga briks!’ Ginkakastigo an imo mga surugoon pero an imo mismo katawohan an may sayop.” 17  Kondi hiya nagsiring: “Naghihinay-hinay* kamo, naghihinay-hinay* kamo!+ Ito an hinungdan nga nasiring kamo, ‘Karuyag namon lumarga, karuyag namon maghalad kan Jehova.’+ 18  Salit yana pakadto kamo, balik ha iyo trabaho! Waray uhot nga ihahatag ha iyo, pero kinahanglan makahimo la gihapon kamo han kadamu han mga briks nga angay niyo himoon.” 19  Katapos, nakita han mga kapatas nga mga Israelita nga daku hinduro an ira problema tungod han sugo: “Ayaw gud niyo pag-ibani an kadamu han mga briks nga angay niyo himoon kada adlaw.” 20  Katapos hito, iginkatapo nira hira Moises ngan Aaron, nga nagtinindog didto basi makigkita ha ira, paggawas nira tikang ha Paraon. 21  Nagsiring dayon hira ha ira: “Hinaot makita ni Jehova an iyo ginbuhat ngan maghukom ha iyo, kay tungod ha iyo nangalas ha amon an Paraon ngan an iya mga surugoon* ngan nagbutang kamo hin espada ha ira kamot basi kami patayon.”+ 22  Katapos, hi Moises dinaop kan Jehova ngan nagsiring: “Jehova, kay ano nga imo ginpapaantos ini nga katawohan? Kay ano nga imo pa ako ginsugo? 23  Tikang han panahon nga kinadto ako ha atubangan han Paraon basi magyakan ha imo ngaran,+ nagin maraot hinduro an iya pagtratar hini nga katawohan,+ ngan waray mo gud talwasa an imo katawohan.”+

Mga footnote

O “mga pinas-an.”
O “mga hubya.”
Ha iba nga lugar, “kahapon.”
O “Mga hubya.”
O “mga hubya.”
O “nagin mabaho kami para ha Paraon ngan ha iya mga surugoon.”