Exodo 36:1-38

  • Nagsobra an kontribusyon (1-7)

  • Pagtukod han tabernakulo (8-38)

36  “Hi Bezalel magtatrabaho kaupod ni Oholiab ngan han tagsa nga eksperto nga tawo* nga gintagan ni Jehova hin kinaadman ngan pagsabot basi mahibaro ha pagbuhat han ngatanan nga buruhaton ha baraan nga pag-alagad sugad han iginsugo ni Jehova.”+  Katapos, gintawag ni Moises hira Bezalel ngan Oholiab ngan an tagsa nga eksperto nga tawo nga ha iya kasingkasing iginbutang ni Jehova an kinaadman,+ an bisan hin-o nga ginpagios han iya kasingkasing nga magboluntaryo ha pagbuhat han buruhaton.+  Katapos, ginkuha nira kan Moises an ngatanan nga kontribusyon+ nga gindara han mga Israelita para ha buruhaton ha baraan nga pag-alagad. Pero padayon nga nagdara hira ha iya hin boluntaryo nga mga halad, ha kada aga.  Katapos, han gintikangan na nira an baraan nga buruhaton, an ngatanan nga eksperto nga trabahador sunod-sunod nga nagkaabot,  ngan nagsumat hira kan Moises: “Sobra na an gindadara han mga tawo kay han ginkikinahanglan para ha buruhaton nga iginsugo ni Jehova nga pagbuhaton.”  Salit hi Moises nagsugo nga magpahibaro ha bug-os nga kampo, nga nasiring: “Mga lalaki ngan mga babaye, ayaw na kamo pagdara hin bisan ano para ha baraan nga kontribusyon.” Tungod hito napugngan an mga tawo ha pagdara hin bisan ano.  An mga butang igo na para ha ngatanan nga buruhaton nga pagbubuhaton, ngan sobra pa.  Salit an ngatanan nga eksperto nga trabahador+ naghimo han tabernakulo+ gamit an napulo nga pantolda nga tela nga hinimo ha maopay nga klase hin linubid nga lino, inulang nga asul, de-lana nga inulang nga purpura,* ngan inulang nga malamrag an kapula;* iya* ito ginburdahan hin mga kerubin.+  An tagsa nga pantolda nga tela 28 ka siko* an kahilaba ngan 4 ka siko an kahilapad. Parapriho an sukol han ngatanan nga pantolda nga tela. 10  Katapos, iya gintakip-takip an lima nga pantolda nga tela, ngan iya gintakip-takip an lima pa nga pantolda nga tela. 11  Katapos hito, gamit an inulang nga asul naghimo hiya hin mga turotalinga ha sidsid han usa nga pantolda nga tela diin magdudugtong ito. Ito liwat an iya ginhimo ha sidsid han kataposan nga pantolda nga tela ha katugbang nga bahin diin magdudugtong ito. 12  Naghimo hiya hin 50 nga turotalinga ha usa nga pantolda nga tela ngan 50 nga turotalinga ha usa pa nga sidsid han pantolda nga tela ha bahin diin magdudugtong ito basi an mga turotalinga mag-atbangay ha kada tagsa. 13  Ha kataposan, naghimo hiya hin 50 nga bulawan nga sab-itan ngan ginpandugtong an pantolda nga mga tela pinaagi han mga sab-itan, basi mabug-os an pantolda nga tela para ha tabernakulo. 14  Katapos, naghimo hiya hin pantolda nga mga tela tikang ha barahibo han kanding para ha tolda ha bawbaw han tabernakulo. Naghimo hiya hin 11 nga pantolda nga tela.+ 15  An tagsa nga pantolda nga tela 30 ka siko an kahilaba ngan 4 ka siko an kahilapad. An 11 nga pantolda nga tela parapriho an sukol. 16  Katapos, gintakip-takip niya an lima han pantolda nga tela, ngan gintakip-takip niya an unom pa nga pantolda nga tela. 17  Sunod, naghimo hiya hin 50 nga turotalinga ha sidsid han kataposan nga pantolda nga tela diin nagdugtong ito, ngan naghimo hiya hin 50 nga turotalinga ha sidsid han usa pa nga pantolda nga tela nga kadugtong hito. 18  Ngan naghimo hiya hin 50 nga sab-itan nga tumbaga* para pagsumpayon an tolda basi magin usa nga tabon para ha tabernakulo. 19  Naghimo hiya para ha tolda hin tabon tikang ha mga anit han karnero nga lalakí nga gintina hin pula ngan hin tabon nga tikang ha mga anit han poka* nga ibubutang ha bawbaw hito.+ 20  Katapos, naghimo hiya han mga hamba para ha bungbong han tabernakulo tikang ha kahoy nga akasya,+ nga ginpatindog.+ 21  An tagsa nga hamba napulo ka siko an kahitaas ngan usa ngan tunga ka siko an kahilapad. 22  An tagsa nga hamba may-ada duha nga mitsa* nga magkatupad. Sugad hito niya ginhimo an ngatanan nga hamba han tabernakulo. 23  Salit ginhimo niya an mga hamba para ha sur nga ligid han tabernakulo, 20 nga hamba nga naatubang ha sur. 24  Katapos, naghimo hiya hin 40 nga sul-otan han mitsa nga silber ha ilarom han 20 nga hamba, duha nga sul-otan ha ilarom han usa nga hamba para ha duha nga mitsa hito, ngan duha nga sul-otan ha ilarom han tagsa nga masunod nga hamba para ha duha nga mitsa hito.+ 25  Para ha usa pa nga ligid han tabernakulo, ha norte nga ligid, naghimo hiya hin 20 nga hamba 26  ngan hin 40 nga sul-otan nga silber para hito, duha nga sul-otan ha ilarom han usa nga hamba ngan duha nga sul-otan ha ilarom han tagsa nga iba pa nga mga hamba. 27  Para ha luyo nga bahin han tabernakulo ha weste nga dapit, naghimo hiya hin unom nga hamba.+ 28  Naghimo hiya hin duha nga hamba sugad nga mga poste ha eskina han tabernakulo ha duha nga eskina ha luyo. 29  An mga poste gindoble tikang ha ubos ngadto ha igbaw, tubtob ha siyahan nga puropurseras. Ito an iya ginbuhat ha mga poste ha duha nga eskina. 30  Salit ha kabug-osan may-ada walo nga hamba upod na an 16 nga sul-otan nga silber para hito, duha nga sul-otan ha ilarom han tagsa nga hamba. 31  Katapos, naghimo hiya hin mga balabag tikang ha kahoy nga akasya, lima nga balabag para ha mga hamba ha usa nga ligid han tabernakulo+ 32  ngan lima nga balabag para ha mga hamba han usa pa nga ligid han tabernakulo ngan lima para ha mga hamba han tabernakulo para ha luyo nga bahin ha weste. 33  Ginhimo niya an butnga nga balabag nga nakapalhog ha butnga han mga hamba tikang ha usa nga kataposan tubtob ha katugbang nga kataposan. 34  Iya ginhaklapan hin bulawan an mga hamba, ngan naghimo hiya hin mga puropurseras nga bulawan para hito sugad nga mga palhogan han mga balabag, ngan iya ginhaklapan hin bulawan an mga balabag.+ 35  Katapos, naghimo hiya hin kurtina+ tikang ha inulang nga asul, de-lana nga inulang nga purpura, inulang nga malamrag an kapula, ngan maopay nga klase hin linubid nga lino. Iya ito ginburdahan+ hin mga kerubin.+ 36  Katapos, naghimo hiya para hito hin upat nga harigi nga akasya ngan ginhaklapan ito hin bulawan, upod an mga kaw-it nga hinimo tikang ha bulawan, ngan naghurma hin upat nga sul-otan nga silber para hito. 37  Sunod naghimo hiya hin salipod* para ha aragian tipasulod ha tolda tikang ha inulang nga asul, de-lana nga inulang nga purpura, inulang nga malamrag an kapula, ngan maopay nga klase hin linubid nga lino nga hinablon,+ 38  sugad man hin lima nga harigi hito ngan hin mga kaw-it hito. Iya ginhaklapan hin bulawan an mga bawbaw hito ngan an mga pandugtong* hito, pero an lima nga sul-otan para hito hinimo ha tumbaga.

Mga footnote

Lit., “tagsa nga tawo nga maaramon an kasingkasing.”
Ha Ingles, purple.
Lit., “eskarlata.”
Matin-aw nga nagtutudlok kan Bezalel.
An usa ka siko katugbang han 44.5 cm (17.5 in.). Kitaa an Ap. B14.
Ha Ingles, copper.
Ha Ingles, seal.
O “tadong nga mga tiil-tiil.”
O “kurtina.”
O “mga puropurseras” nga gin-gagamit ha pagsurusumpay.