Exodo 24:1-18

  • Katawohan inuyon ha kasabotan (1-11)

  • Hi Moises ha Bukid Sinai (12-18)

24  Katapos, nagsiring hiya kan Moises: “Sagka ngadto kan Jehova, ikaw ngan hi Aaron, hira Nadab ngan Abihu,+ ngan an 70 nga tigurang han Israel, ngan yukbo kamo ha hirayo.  Hi Moises sadang dumaop kan Jehova nga hiya la; pero an iba diri angay dumaop, ngan an katawohan diri maupod ha iya ha pagsagka.”+  Katapos, inabot hi Moises ngan iginsumat ha katawohan an ngatanan nga pulong ni Jehova ngan an ngatanan nga hudisyal nga desisyon,+ ngan ha uusa nga tingog an ngatanan nga katawohan binaton: “Andam kami ha pagbuhat han ngatanan nga pulong nga ginyakan ni Jehova.”+  Salit iginsurat ni Moises an ngatanan nga pulong ni Jehova.+ Katapos, binuhát hiya hin temprano ha aga ngan nagtukod ha ubos han bukid hin halaran ngan 12 nga harigi nga katugbang han 12 nga tribo han Israel.  Katapos hito, nagsugo hiya hin batan-on nga mga lalaki nga Israelita, ngan naghalad hira hin mga halad nga sinunog ngan naghalad hin todo nga mga baka sugad nga mga halad nga ginsasarosaroan+ para kan Jehova.  Katapos, ginkuha ni Moises an katunga han dugo ngan iginbutang ito ha mga yahong,* ngan an katunga han dugo iya iginwisik ha halaran.  Katapos, iya ginkuha an libro han kasabotan ngan ginbasa ito ha daku nga tingog ha katawohan.+ Ngan hira nagsiring: “Andam kami ha pagbuhat han ngatanan nga ginyakan ni Jehova, ngan magigin masinugtanon kami.”+  Salit ginkuha ni Moises an dugo ngan iginwisik ito ha katawohan+ ngan nagsiring: “Ini an dugo han kasabotan nga ginhimo ni Jehova ha iyo uyon hini ngatanan nga pulong.”+  Hira Moises ngan Aaron, hira Nadab ngan Abihu, ngan an 70 nga tigurang han Israel sinagka, 10  ngan nakita nira an Dios han Israel.+ Ha ilarom han iya mga tiil may-ada pariho hin sapiro nga salóg, ngan sugad ito kahayag han langit.+ 11  Waray niya siruti an prominente nga mga lalaki han Israel,+ ngan nakakita hira hin bisyon han tinuod nga Dios ngan nangaon hira ngan nanginom. 12  Yana hi Jehova nagsiring kan Moises: “Sagka ngadi ha akon ha bukid ngan pagpabilin dida hito. Ihahatag ko ha imo an mga papan nga bato nga akon susuratan han mga balaud ngan mga sugo sugad nga instruksyon para ha ira.”+ 13  Salit binuhát hi Moises kaupod an iya kabulig nga hi Josue,+ ngan sinagka hi Moises ha bukid han tinuod nga Dios.+ 14  Pero ha mga tigurang hiya nagsiring: “Hulata kami dinhi tubtob nga makabalik kami ha iyo.+ Aada hira Aaron ngan Hur+ kaupod niyo. An bisan hin-o nga may kaso mahimo dumaop ha ira.”+ 15  Katapos, sinagka hi Moises ha bukid samtang natatabonan ito han dampog.+ 16  An himaya ni Jehova+ nagpabilin ha Bukid Sinai,+ ngan gintabonan ito han dampog ha sulod hin unom ka adlaw. Ha ikapito ka adlaw iya gintawag hi Moises tikang ha butnga han dampog. 17  Ha mga Israelita nga nagkikita, an himaya ni Jehova pariho hin nakakaugtang nga kalayo dida ha pungkay han bukid. 18  Katapos, sinulod hi Moises ngadto ha dampog ngan sinagka ha bukid.+ Ngan hi Moises nagpabilin ha bukid ha sulod hin 40 ka adlaw ngan 40 ka gab-i.+

Mga footnote

Ha iba nga lugar, “makaong; uhataw.”