Exodo 18:1-27

  • Inabot hira Jethro ngan Zipora (1-12)

  • Sagdon ni Jethro nga magpili hin mga hukom (13-27)

18  Yana hi Jethro nga saserdote han Midian, nga ugangan ni Moises,+ nakabati mahitungod han ngatanan nga ginbuhat han Dios para kan Moises ngan para ha Israel nga iya katawohan, kon paonan-o ni Jehova igin-gawas an Israel tikang ha Ehipto.+  Han ginpauli ni Moises an iya asawa nga hi Zipora ngadto kan Jethro nga iya ugangan, ginmangnoan ni Jethro hi Zipora  upod an iya duha nga anak nga lalaki.+ An ngaran han usa nga anak amo hi Gersom,*+ kay hi Moises nagsiring, “Nagin dayo nga residente ako ha iba nga nasud,”  ngan an ngaran han usa amo hi Eliezer,* kay hiya nagsiring, “An Dios han akon tatay amo an akon parabulig, nga nagtalwas ha akon tikang ha espada han Paraon.”+  Salit hi Jethro nga ugangan ni Moises, kaupod an mga anak ni Moises ngan an iya asawa, kinadto kan Moises ha kamingawan diin hiya nagkakampo ha bukid han tinuod nga Dios.+  Katapos, nagpatugon hiya ngadto kan Moises: “Ako, hi Jethro nga imo ugangan,+ makada ha imo upod an imo asawa ngan an imo duha nga anak.”  Ginawas dayon hi Moises basi tapoon an iya ugangan, ngan yinukbo hiya ngan hinarok ha iya. Ginkumusta nira an usa kag usa, katapos sinulod hira ha tolda.  Iginsumat ni Moises ha iya ugangan an ngatanan nga ginbuhat ni Jehova ha Paraon ngan ha Ehipto para ha Israel,+ an ngatanan nga kakurian nga nahitabo ha ira durante han biyahe,+ ngan kon paonan-o hira gintalwas ni Jehova.  Nalipay gud hi Jethro tungod han ngatanan nga mag-opay nga ginbuhat ni Jehova para ha Israel pinaagi han pagtalwas ha ira tikang ha Ehipto.* 10  Katapos, hi Jethro nagsiring: “Pagdayawon hi Jehova, nga nagtalwas ha iyo tikang ha Ehipto ngan tikang ha Paraon, ngan nagtalwas han katawohan tikang ha pagmando han Ehipto. 11  Yana maaram na ako nga hi Jehova mas labaw kay han ngatanan nga iba pa nga dios,+ tungod han iya ginbuhat ha mga ginios nga may pagkaarogante kontra ha iya katawohan.” 12  Katapos, hi Jethro nga ugangan ni Moises, nagdara hin halad nga sinunog ngan iba pa nga mga halad nga hayop para ha Dios, ngan hi Aaron ngan an ngatanan nga tigurang han Israel inabot basi sumaro ha pagkaon kaupod an ugangan ni Moises ha atubangan han tinuod nga Dios. 13  Han sunod nga adlaw, hi Moises liningkod sugad han nahiaraan basi magin hukom para ha katawohan, ngan nagtinindog an katawohan ha atubangan ni Moises tikang ha aga tubtob ha pagsirom. 14  Han nakita han ugangan ni Moises an ngatanan nga iya ginbubuhat para ha katawohan, hiya nagsiring: “Ano ini nga imo ginbubuhat para ha katawohan? Kay ano nga usa ka la nga nalingkod dinhi ngan an ngatanan nga katawohan naninindog ha imo atubangan tikang ha aga tubtob ha pagsirom?” 15  Hi Moises nagsiring ha iya ugangan: “Tungod kay an katawohan padayon nga napakanhi ha akon basi magpakiana ha Dios. 16  Kon nagkakaada hin kaso, gindadara ito ha akon ngan kinahanglan ko maghukom butnga han duha nga tawo, ngan akon iginpapahibaro an mga desisyon han tinuod nga Dios ngan an iya mga balaud.”+ 17  An ugangan ni Moises nagsiring ha iya: “Diri maopay an imo ginhihimo. 18  Sigurado nga kakapuyon ka hinduro, ikaw ngan ini nga katawohan nga kaupod mo, kay daku hinduro ini nga buruhaton para ha imo ngan diri mo ito maaakos nga ikaw la. 19  Yana pamati ha akon. Sasagdonan ko ikaw, ngan an Dios maupod ha imo.+ Magigin representante ka para ha katawohan ha atubangan han tinuod nga Dios,+ ngan kinahanglan imo isumat ha tinuod nga Dios an mga kaso.+ 20  Sadang mo hira pahamangnoan mahitungod han mga regulasyon ngan han mga balaud+ ngan ipahibaro ha ira an dalan nga angay nira laktan ngan an buruhaton nga sadang nira himoon. 21  Pero sadang ka magpili tikang ha katawohan hin may kapas nga mga lalaki+ nga may kahadlok ha Dios, masasarigan nga mga lalaki nga nangangalas ha pakabentaha ha diri tangkod nga paagi,+ ngan itoka hira nga manguna ha ira sugad nga mga lider han kada 1,000, mga lider han kada 100, mga lider han kada 50, ngan mga lider han kada 10.+ 22  Sadang hira maghukom ha katawohan kon nagkakaada hin mga kaso,* ngan dadad-on nira ha imo an tagsa nga makuri nga kaso,+ pero hira an magdidesisyon ha tagsa nga gutiay nga kaso. Himoa ito nga mas masayon para ha imo pinaagi ha pagpabulig ha ira ha imo buruhaton.+ 23  Kon himoon mo ito, sumala han iginsusugo han Dios ha imo, makakaya mo an buruhaton, ngan an ngatanan mauli nga kontento.” 24  Namati dayon hi Moises ha iya ugangan ngan ginbuhat an ngatanan nga iya ginsiring. 25  Nagpili hi Moises hin may kapas nga mga lalaki ha bug-os nga Israel ngan gintuinan hira nga mangulo ha katawohan, sugad nga mga lider han kada 1,000, mga lider han kada 100, mga lider han kada 50, ngan mga lider han kada 10. 26  Salit naghukom hira ha katawohan kon nagkakaada hin mga kaso. An makuri nga kaso ira gindadara kan Moises,+ pero ha tagsa nga gutiay nga kaso hira an naghuhukom. 27  Katapos hito, igindul-ong ni Moises ha gawas an iya ugangan,+ ngan binalik hiya ngadto ha iya lugar.

Mga footnote

Nangangahulogan nga “Usa nga Dayo nga Residente Didto.”
Nangangahulogan nga “An Akon Dios Parabulig.”
Lit., “tikang ha kamot han Ehipto.”
Lit., “ha kada panahon.”