Exodo 19:1-25

  • Ha Bukid Sinai (1-25)

    • Israel magigin ginhadian han mga saserdote (5, 6)

    • Katawohan ginbaraan basi tapoon an Dios (14, 15)

19  Ha ikatulo ka bulan katapos makagawas an mga Israelita ha tuna han Ehipto, hito mismo nga adlaw, inabot hira ha kamingawan han Sinai.  Binaya hira ha Refidim+ ngan nakaabot ha kamingawan han Sinai ngan nagkampo ha kamingawan. An Israel nagkampo didto ha atubangan han bukid.+  Katapos, hi Moises sinagka ngadto ha tinuod nga Dios, ngan gintawag hiya ni Jehova tikang ha bukid,+ nga nasiring: “Ini an imo igsisiring ha panimalay ni Jacob ngan isusumat ha mga Israelita,  ‘Iyo mismo nakita an akon ginbuhat ha mga Ehiptohanon.+ Ginbuhat ko ini basi dad-on kamo pinaagi hin mga pako han mga agila ngan igkadi kamo ha akon.+  Yana kon masugot gud kamo ha akon ngan magtutuman han kasabotan nga akon ginhimo, sigurado nga kamo magigin akon espesyal nga propyedad* tikang ha ngatanan nga mga katawohan,+ kay akon an bug-os nga tuna.+  Kamo magigin usa nga ginhadian han mga saserdote ngan usa nga baraan nga nasud para ha akon.’+ Ini an mga pulong nga imo igsisiring ha mga Israelita.”  Salit hi Moises linugsad ngan iginpatawag an mga tigurang han katawohan ngan iginpahayag ha ira ini ngatanan nga pulong nga iginsugo ha iya ni Jehova.+  Katapos hito, an ngatanan nga katawohan nagkakaurosa nga binaton: “Andam kami ha pagbuhat han ngatanan nga ginsiring ni Jehova.”+ Iginsumat dayon ni Moises kan Jehova an baton han katawohan.  Ngan hi Jehova nagsiring kan Moises: “Kitaa! Makada ako ha imo pinaagi hin masirom nga dampog, basi an katawohan makabati kon ako makiistorya ha imo ngan basi pirme liwat hira tumoo ha imo.” Katapos, iginsumat ni Moises kan Jehova an ginsiring han katawohan. 10  Katapos, hi Jehova nagsiring kan Moises: “Kadto ha katawohan ngan baraana hira yana nga adlaw ngan buwas, ngan kinahanglan labhan nira an ira mga bado. 11  Ngan kinahanglan andam hira para ha ikatulo ka adlaw, kay ha ikatulo ka adlaw hi Jehova malusad ngada ha Bukid Sinai ha atubangan han ngatanan nga katawohan. 12  Kinahanglan magbutang ka hin mga tubtoban para ha katawohan ha palibot hito ngan sidnga hira, ‘Ayaw gud kamo pagsagka ha bukid o pagtamak ha ligid hito. An bisan hin-o nga tumamak ha bukid sigurado nga papatayon. 13  Waray kamot nga makapot ha iya, lugod babatuhon hiya o titirahon.* Hayop man o tawo, diri hiya mabubuhi.’+ Pero pagtunog han sungay han karnero nga lalakí+ mahimo na hira sumagka ha bukid.” 14  Katapos, hi Moises linugsad tikang ha bukid ngadto ha katawohan, ngan iya ginbaraan an katawohan, ngan ira ginlabhan an ira mga bado.+ 15  Nagsiring hiya ha katawohan: “Pag-andam kamo para ha ikatulo ka adlaw. Ayaw kamo pakighilawas ha iyo asawa.”* 16  Ha aga han ikatulo ka adlaw, nagdalugdog ngan nagkidlat, ngan may madakmol nga dampog+ ha bukid ngan daku hinduro nga tunog hin sungay, ngan an ngatanan nga katawohan ha kampo nagtikang pangurog.+ 17  Yana an katawohan igin-gawas ni Moises ha kampo basi tapoon an tinuod nga Dios, ngan pumwesto hira ha ubos han bukid. 18  Nag-aso an bug-os nga Bukid Sinai, kay hi Jehova linusad ngada hito nga napapalibotan hin kalayo;+ ngan an aso hito nagtipaigbaw pariho han aso hin hudno, ngan an bug-os nga bukid nabay-og hinduro.+ 19  Han mas nagtikadaku an tunog han sungay, hi Moises nagyakan, ngan ginbaton hiya han tingog han tinuod nga Dios. 20  Salit hi Jehova linusad ngada ha Bukid Sinai ha bawbaw han bukid. Katapos, gintawag ni Jehova hi Moises ngadto ha bawbaw han bukid, ngan sinagka hi Moises.+ 21  Yana hi Jehova nagsiring kan Moises: “Lugsad ngan pahamangnoi an katawohan nga diri magpirit nga lumahos basi makita hi Jehova, kay kon buhaton nira ito, damu ha ira an mamamatay. 22  Ngan magbaraan han ira kalugaringon an mga saserdote nga regular nga nahirani kan Jehova, basi diri hira patayon ni Jehova.”+ 23  Katapos, hi Moises nagsiring kan Jehova: “An katawohan diri makakasagka ha Bukid Sinai kay imo na kami ginpahamangnoan nga nasiring, ‘Pagbutang hin mga tubtoban ha palibot han bukid, ngan baraana ito.’”+ 24  Pero hi Jehova nagsiring ha iya: “Kadto, lugsad, ngan balik nganhi, ikaw ngan hi Aaron, pero ayaw tuguti an mga saserdote ngan an katawohan nga magpirit nga lumahos basi sumagka ngadto kan Jehova, basi diri niya hira patayon.”+ 25  Salit hi Moises linugsad ngadto ha katawohan ngan ginsumatan hira.

Mga footnote

O “ginpapabilhan gud nga panag-iya.”
Bangin titirahon pinaagi hin pana.
Lit., “Ayaw pagdaop ha babaye.”