Exodo 25:1-40

  • Kontribusyon para ha tabernakulo (1-9)

  • An Arka (10-22)

  • An lamesa (23-30)

  • An burutangan han lampara (31-40)

25  Katapos, hi Jehova nagsiring kan Moises:  “Sumati an katawohan han Israel nga maggahin hin kontribusyon para ha akon; tikang ha tagsa nga tawo nga ginpapagios han iya kasingkasing, iyo titirukon an kontribusyon para ha akon.+  Ini an kontribusyon nga iyo kakarawaton tikang ha ira: bulawan,+ silber,+ tumbaga,*+  inulang nga asul, de-lana nga inulang nga purpura,* inulang nga malamrag an kapula,* maopay nga klase hin lino, barahibo han kanding,  mga anit han karnero nga lalakí nga gintina hin pula, mga anit han poka,* kahoy nga akasya,+  lana para ha mga lampara,+ balsamo para ha lana nga pandihog+ ngan mahamot nga insenso,+  ngan onix nga mga bato ngan iba pa nga mga bato nga ibubutang ha epod+ ngan ha tabon ha dughan.+  Maghihimo hira hin santuaryo para ha akon, ngan ako maukoy* kaupod nira.+  Iyo hihimoon an tabernakulo ngan an ngatanan nga gamit hito, nga ginsusunod hin eksakto an surubdan* nga akon iginpapakita ha imo.+ 10  “Maghihimo hira hin arka* nga tikang ha kahoy nga akasya, duha ngan tunga ka siko* an kahilaba ngan usa ngan tunga ka siko an kahilapad ngan usa ngan tunga ka siko an kahitaas.+ 11  Katapos, imo ito hahaklapan hin puro nga bulawan.+ Hahaklapan mo ito ha sulod ngan ha gawas, ngan hihimoan mo ito hin muldora nga bulawan ha palibot hito.+ 12  Ngan maghuhurma ka hin upat nga puropurseras nga bulawan para hito ngan itataod ito ha igbaw han upat nga tiil-tiil hito, nga may duha nga puropurseras ha usa nga ligid ngan duha nga puropurseras ha luyo nga ligid. 13  Ngan maghihimo ka hin mga bayawan tikang ha kahoy nga akasya ngan hahaklapan ito hin bulawan.+ 14  Ipapalhog mo an mga bayawan ha mga puropurseras dida ha mga ligid han Arka basi madara an Arka pinaagi hito. 15  An mga bayawan magpapabilin dida ha mga puropurseras han Arka; diri ito kukuhaon dida.+ 16  Isusulod mo ha Arka an Pagpamatuod nga ihahatag ko ha imo.+ 17  “Maghihimo ka hin taklob nga tikang ha puro nga bulawan, duha ngan tunga ka siko an kahilaba ngan usa ngan tunga ka siko an kahilapad.+ 18  Maghihimo ka hin duha nga kerubin nga bulawan; tikang ha pinilpig nga bulawan hihimoon mo ito dida ha duha nga kataposan han taklob.+ 19  Himoa an mga kerubin ha duha nga kataposan, usa nga kerubin ha tagsa nga kataposan han taklob. 20  Nakabuklad tipaigbaw an duha nga pako han mga kerubin, nga nasasalipdan han mga pako hito an taklob,+ ngan mag-aatubang ito nga duha. An nawong han mga kerubin matamod ngada ha taklob. 21  Ibubutang mo an taklob+ dida ha Arka, ngan ibubutang mo ha Arka an Pagpamatuod nga akon ihahatag ha imo. 22  Magpapakita ako ha imo didto ngan magyayakan ako ha imo tikang ha bawbaw han taklob.+ Tikang ha butnga han duha nga kerubin nga aada ha arka han Pagpamatuod, ipapahibaro ko ha imo an ngatanan nga akon isusugo ha imo para ha mga Israelita. 23  “Maghihimo ka liwat hin lamesa+ tikang ha kahoy nga akasya, nga duha ka siko an kahilaba ngan usa ka siko an kahilapad ngan usa ngan tunga ka siko an kahitaas.+ 24  Hahaklapan mo ito hin puro nga bulawan ngan maghihimo ka hin muldora nga bulawan ha palibot hito. 25  Maghihimo ka hin sanipa ha palibot hito nga usa ka dapal* an kahilapad ngan hin muldora nga bulawan ha palibot han sanipa. 26  Maghihimo ka para hito hin upat nga puropurseras nga bulawan ngan itataod an mga puropurseras ha upat nga eskina nga gintaoran han upat nga tiil-tiil. 27  Kinahanglan hirani ha sanipa an mga puropurseras sugad nga mga palhogan han mga bayawan para ha pagdara han lamesa. 28  Maghihimo ka hin mga bayawan tikang ha kahoy nga akasya ngan hahaklapan ito hin bulawan ngan an lamesa dadad-on pinaagi hito. 29  “Maghihimo ka liwat hin mga pinggan hito, mga kopa hito, ngan mga pitsel ngan mga yahong hito nga ira gagamiton ha paghuwad han mga halad nga irimnon. Hihimoon mo ito tikang ha puro nga bulawan.+ 30  Ngan pirme mo ibubutang an halad nga tinapay dida ha lamesa ha akon atubangan.+ 31  “Maghihimo ka hin burutangan han lampara+ tikang ha puro nga bulawan. Tikang ha pinilpig nga bulawan hihimoon mo an burutangan han lampara. An tungtongan hito, an lawas hito, an mga sanga hito, an mga dahon-dahon hito ha ilarom han bukad, an mga biyoos hito, ngan an mga bukad hito hihimoon tikang ha usa ka bug-os nga materyales.+ 32  Ngan magkakaada hin unom nga sanga tikang ha lawas hito, tulo nga sanga ha usa nga ligid han burutangan han lampara ngan tulo nga sanga ha luyo nga ligid han burutangan han lampara. 33  Ha usa nga sanga may tulo nga dahon-dahon nga an kurti pariho han mga bukad han almendras nga naglalat-ang-lat-ang ha mga biyoos ngan mga bukad, ngan ha luyo nga sanga may tulo nga dahon-dahon nga an kurti pariho han mga bukad han almendras nga naglalat-ang-lat-ang ha mga biyoos ngan mga bukad. Sugad hini an magigin hitsura han unom nga sanga dida ha burutangan han lampara. 34  Ha lawas han burutangan han lampara may upat nga dahon-dahon nga an kurti pariho han mga bukad han almendras nga naglalat-ang-lat-ang ha mga biyoos hito ngan ha mga bukad hito. 35  Usa nga biyoos an aada ha ilarom han siyahan nga duha nga sanga nga tikang ha lawas, ngan usa nga biyoos ha ilarom han sunod nga duha nga sanga, ngan usa nga biyoos ha ilarom han sunod nga duha nga sanga, para ha unom nga sanga nga tikang ha lawas. 36  An mga biyoos ngan an mga sanga ngan an bug-os nga burutangan han lampara hihimoon ha usa ka bug-os nga materyales nga puro ngan pinilpig nga bulawan.+ 37  Maghihimo ka hin pito nga lampara para hito, ngan kon dagkotan an mga lampara, maglalamrag ito ha lugar ha atubangan hito.+ 38  An mga kimpit hito ngan an mga insensaryo hito hihimoon tikang ha puro nga bulawan.+ 39  Sadang ito himoon upod hini nga mga garamiton, tikang ha usa ka talanton* nga puro nga bulawan. 40  Siguroha nga hihimoon mo ito sumala ha surubdan* hito nga iginpakita ha imo ha bukid.+

Mga footnote

Ha Ingles, copper.
O “de-lana nga inulang nga gintina hin purpura nga may pagkapula.”
An tina nga gin-gamit para hini nga inulang tikang ha kokus nga insekto.
Ha Ingles, seal.
O “magtatabernakulo.”
O “disenyo.”
O “kahon.”
An usa ka siko katugbang han 44.5 cm (17.5 in.). Kitaa an Ap. B14.
Mga 7.4 cm (2.9 in.). Kitaa an Ap. B14.
An usa ka talanton katugbang han 34.2 kg. Kitaa an Ap. B14.
O “disenyo.”