Exodo 14:1-31

  • Israel nakaabot ha dagat (1-4)

  • Ginlanat han Paraon an Israel (5-14)

  • Israel tinabok ha Dagat nga Pula (15-25)

  • Mga Ehiptohanon nagkalulumos (26-28)

  • Israel tinoo kan Jehova (29-31)

14  Yana hi Jehova nagsiring kan Moises:  “Sidnga an mga Israelita nga kinahanglan bumalik hira ngan magkampo ha atubangan han Pihahirot, ha butnga han Migdol ngan han dagat, nga nakikita an Baal-zepon.+ Magkampo kamo nga naatubang hito ha ligid han dagat.  Katapos, an Paraon masiring mahitungod ha mga Israelita, ‘Naglilinakat-lakat hira ha tuna nga diri maaram kon mapakain. Napapalibotan hira han kamingawan.’  Akon papabay-an nga magin matig-a an kasingkasing han Paraon,+ ngan iya lalanaton hira, ngan akon paghihimayaon an akon kalugaringon pinaagi han Paraon ngan han ngatanan niya nga kasundalohan;+ ngan makikilala gud han mga Ehiptohanon nga ako hi Jehova.”+ Salit ito an ira ginbuhat.  Ha urhi, ginsumatan an hadi han Ehipto nga an katawohan binaya na. Madagmit nga nagbag-o an hunahuna* han Paraon ngan han iya mga surugoon mahitungod han katawohan,+ ngan nagsiring hira: “Kay ano nga ginbuhat naton ini ngan ginpalarga an Israel tikang ha pagserbi ha aton sugad nga mga uripon?”  Salit iya gin-andam an iya pan-girra nga mga karuwahe, ngan igin-upod an iya mga tawo.+  Gindara niya an 600 nga pinili nga karuwahe ngan an ngatanan nga iba pa nga karuwahe han Ehipto, nga may mga girriro nga nasakay ha tagsa hito.  Salit ginpabay-an ni Jehova nga magin matig-a an kasingkasing han Paraon nga hadi han Ehipto, ngan iya ginlanat an mga Israelita, samtang an mga Israelita nagawas nga may kompyansa.*+  Ginlanat hira han mga Ehiptohanon,+ ngan hirani na hira maabtan han ngatanan nga kabayo nga may karuwahe han Paraon ngan han iya nakakabayo nga kasundalohan ngan han iya kasundalohan samtang nagkakampo hira ha ligid han dagat, hirani ha Pihahirot, nga naatubang ha Baal-zepon. 10  Han hirani na an Paraon, siniplat an mga Israelita ngan ira nakita nga ginlalanat hira han mga Ehiptohanon. Nahadlok gud an mga Israelita ngan nagtikang hira pangaraba kan Jehova.+ 11  Nagsiring hira kan Moises: “Tungod ba kay waray mga lubnganan ha Ehipto nga imo kami gindara nganhi basi mamatay ha kamingawan?+ Ano ini nga imo ginbuhat ha amon nga imo kami igin-gawas ha Ehipto? 12  Diri ba ini gud an amon iginyakan ha imo ha Ehipto han nagsiring kami, ‘Pabay-i kami, basi serbihan namon an mga Ehiptohanon’? Kay mas maopay pa nga magserbi kami ha mga Ehiptohanon kay ha mamatay ha kamingawan.”+ 13  Katapos, hi Moises nagsiring ha katawohan: “Ayaw kamo kahadlok.+ Tindog kamo hin marig-on ngan kitaa an pagtalwas ni Jehova nga iya pagbubuhaton ha iyo yana nga adlaw.+ Kay an mga Ehiptohanon nga iyo nakikita yana, diri na gud niyo makikita utro.+ 14  Hi Jehova mismo an makikig-away para ha iyo,+ ngan magpapabilin kamo nga hilom.” 15  Yana hi Jehova nagsiring kan Moises: “Kay ano nga padayon ka nga nangangaraba ha akon? Sidnga an mga Israelita nga manangtang han ira mga tolda ngan magkalarga. 16  Mahitungod ha imo, alsaha an imo tungkod ngan ig-unat an imo kamot ha bawbaw han dagat ngan tungaa ito, basi an mga Israelita makaagi ha butnga han dagat dida ha mamara nga tuna. 17  Pero ako, papabay-an ko nga magin matig-a an kasingkasing han mga Ehiptohanon, basi ira lanaton hira; hito nga paagi paghihimayaon ko an akon kalugaringon pinaagi han Paraon ngan han ngatanan niya nga kasundalohan, han iya pan-girra nga mga karuwahe, ngan han iya nakakabayo nga kasundalohan.+ 18  Ngan makikilala gud han mga Ehiptohanon nga ako hi Jehova kon akon paghimayaon an akon kalugaringon pinaagi han Paraon, han iya pan-girra nga mga karuwahe, ngan han iya nakakabayo nga kasundalohan.”+ 19  Katapos, an anghel han tinuod nga Dios+ nga nag-uuna ha kampo han Israel binaya ngan kinadto ha ira urhi, ngan an harigi nga dampog nga nakada ha ira atubangan binalhin ngadto ha urhi ngan nagpabilin ha ira luyo.+ 20  Salit nahibutnga ito ha kampo han mga Ehiptohanon ngan ha kampo han Israel.+ Ha usa nga bahin, masirom ito nga dampog. Ha luyo nga bahin, naghatag ito hin lamrag ha gab-i.+ Salit an usa nga kampo waray pakahirani ha lain nga kampo ha bug-os nga gab-i. 21  Yana igin-unat ni Moises an iya kamot ha bawbaw han dagat;+ ngan ginpaatras ni Jehova an dagat pinaagi hin makusog nga hangin tikang ha este ha bug-os nga gab-i, tungod hito nagin mamara nga tuna an salad han dagat,+ ngan an katubigan natunga.+ 22  Salit an mga Israelita inagi ha butnga han dagat dida ha mamara nga tuna,+ samtang an katubigan nahimo nga pader ha ira too nga kamot ngan ha ira wala.+ 23  An mga Ehiptohanon naglanat ha ira, ngan an ngatanan nga kabayo han Paraon, an iya pan-girra nga mga karuwahe, ngan an iya nakakabayo nga kasundalohan naglanat ha ira ngadto ha butnga han dagat.+ 24  Durante han pagbantay ha maagahon,* hi Jehova nagkita ha kampo han mga Ehiptohanon tikang ha harigi nga kalayo ngan dampog,+ ngan iya ginsamok an kampo han mga Ehiptohanon. 25  Iya ginpanangtang an mga kaliding han ira mga karuwahe salit nakurian hira ha pagpadalagan hito, ngan an mga Ehiptohanon nagsiniring: “Palagiw kita tikang ha mga Israelita, kay hi Jehova nakikig-away para ha ira kontra ha mga Ehiptohanon.”+ 26  Katapos, hi Jehova nagsiring kan Moises: “Ig-unat an imo kamot ha bawbaw han dagat basi matabonan han katubigan an mga Ehiptohanon, an ira pan-girra nga mga karuwahe, ngan an ira nakakabayo nga kasundalohan.” 27  Igin-unat dayon ni Moises an iya kamot ha bawbaw han dagat, ngan han tikaaga na, an dagat binalik ha normal nga kahimtang hito. Samtang napalagiw an mga Ehiptohanon tikang hito, iginlabog ni Jehova an mga Ehiptohanon ngadto ha butnga han dagat.+ 28  Natabonan han nabalik nga katubigan an pan-girra nga mga karuwahe ngan an nakakabayo nga kasundalohan ngan an ngatanan nga sundalo han Paraon nga naglanat ha ira ngadto ha dagat.+ Waray bisan usa ha ira an ginpabay-an nga makatalwas.+ 29  Pero an mga Israelita naglakat dida ha mamara nga tuna ha butnga han salad han dagat,+ ngan an katubigan nahimo nga pader ha ira too nga kamot ngan ha ira wala.+ 30  Salit gintalwas ni Jehova an Israel hito nga adlaw tikang ha kamot han mga Ehiptohanon,+ ngan nakita han Israel dida ha baybayon an nagkamatay nga mga Ehiptohanon. 31  Nakita liwat han Israel an daku nga gahum* nga gin-gamit ni Jehova kontra ha mga Ehiptohanon, ngan an katawohan nagkaada hin kahadlok kan Jehova ngan tinoo kan Jehova ngan ha iya surugoon nga hi Moises.+

Mga footnote

Lit., “kasingkasing.”
Lit., “nga nakaalsa an kamot.”
Karuyag sidngon, mga alas-2 han maagahon tubtob ha alas-6 han aga.
Lit., “kamot.”