Exodo 17:1-16
17 An bug-os nga komunidad han mga Israelita linarga ha kamingawan han Sin+ ngan nagburobalhin ha iba-iba nga lugar sumala ha sugo ni Jehova,+ ngan nagkampo hira ha Refidim.+ Pero waray didto tubig nga maiinom han katawohan.
2 Salit an katawohan nagtikang makig-away kan Moises+ ngan nagsiniring: “Tagi kami hin tubig nga maiinom.” Pero hi Moises nagsiring ha ira: “Kay ano nga nakikig-away kamo ha akon? Kay ano nga padayon nga ginsasarihan niyo hi Jehova?”+
3 Pero didto, an katawohan gin-uhaw gud, ngan padayon nga nagngurutob hira kontra kan Moises+ ngan nagsiniring: “Kay ano nga igin-gawas mo kami ha Ehipto basi kami patayon pati an amon mga anak ngan an amon mga hayop tungod han kauhaw?”
4 Ha urhi, hi Moises nangaraba kan Jehova: “Ano an akon angay buhaton hini nga katawohan? Diri mag-iiha ngan babatuhon na ako nira!”
5 Katapos, hi Jehova nagsiring kan Moises: “Pag-una ha katawohan, ngan iupod an iba nga mga tigurang han Israel ngan bitbita an imo tungkod nga imo iginbalbag ha Salog Nilo.+ Kapti ito ngan pagpadayon ha paglakat.
6 Kitaa! Matindog ako ha imo atubangan didto ha bato ha Horeb. Kinahanglan balbagon mo an bato, ngan tikang hito magawas an tubig, ngan iinumon ito han katawohan.”+ Ginbuhat ito ni Moises nga nakikita han mga tigurang han Israel.
7 Salit iya ginngaranan an lugar hin Masah*+ ngan Meriba*+ tungod han pag-araway han mga Israelita ngan tungod kay ira ginsarihan hi Jehova+ pinaagi ha pagsiring: “Aanhi ba ha butnga naton hi Jehova o waray?”
8 Katapos, inabot an mga Amalekita+ ngan nakiggirra ha Israel didto ha Refidim.+
9 Ngan hi Moises nagsiring kan Josue:+ “Pagpili para ha aton hin mga lalaki ngan kadto basi makiggirra ha mga Amalekita. Buwas matindog ako ha bawbaw han bungtod nga kapot an tungkod han tinuod nga Dios.”
10 Katapos, ginbuhat ni Josue an ginsiring ha iya ni Moises,+ ngan nakiggirra hiya ha mga Amalekita. Ngan hira Moises, Aaron, ngan Hur+ sinagka ngadto ha bawbaw han bungtod.
11 Samtang padayon nga gin-aalsa ni Moises an iya mga kamot, an mga Israelita an nagdadaog, pero kon iya igin-uubos an iya mga kamot, an mga Amalekita an nagdadaog.
12 Han an mga kamot ni Moises mabug-at na, kinuha hira hin bato basi iya lingkoran, ngan liningkod hiya dida hito. Katapos, gin-alsa nira Aaron ngan Hur an iya mga kamot ha paluyoluyo, basi magpabilin nga diri nagkikiwa an iya mga kamot tubtob ha katunod han adlaw.
13 Salit napirde ni Josue hi Amalek ngan an iya katawohan pinaagi han espada.+
14 Hi Jehova nagsiring yana kan Moises: “Isurat ini ha libro sugad nga hinumdóman* ngan isumat liwat ito kan Josue, ‘Bug-os nga wawad-on ko an hinumdóman han mga Amalekita ha ilarom han langit.’”+
15 Katapos, hi Moises naghimo hin halaran ngan ginngaranan ito hin Jehova-nissi,*
16 nasiring hiya: “Tungod kay an iya kamot nakontra ha trono ni Jah,+ hi Jehova makikiggirra ha mga Amalekita ha ngatanan nga henerasyon.”+
