Exodo 40:1-38

  • Impangipaalagey ed tabernakulo (1-33)

  • Napnoy gloria nen Jehova so tabernakulo (1-33)

40  Insan inkuan nen Jehova ed si Moises:  “Diad unonan agew na unonan bulan, ipaalagey mo so tabernakulo, say tolda a pantitiponan.+  Iyan mo ditan so kaban na Testimonya,+ tan saniban moy kurtina so Kaban.+  Iloob mo so lamisaan+ tan iliram iray bengatlan kabiangan na satan tan iloob mo so kandelero+ tan selselan mo iray lamparaan na satan.+  Insan mo iyan so balitok ya altar na insenso+ diad arap na kaban na Testimonya tan iyan mo so sanib* na lolooban ed tabernakulo.+  “Iyan mo so altar na apay a popoolan+ diad arap na lolooban ed tabernakulo, say tolda a pantitiponan,  tan iyan mo so palanggana diad baetan na tolda a pantitiponan tan say altar, tan kargaan mo itan na danum.+  Insan igawaan moy sular+ ed liber na satan tan iyan mo so sanib*+ na lolooban ed sular.  Insan alam so larak a panaglana+ tan lanaan mo so tabernakulo tan amin a wadtan,+ tan pasantos mo itan tan amin a kagawaan na satan, pian magmaliw itan a masanton bengatla. 10  Lanaan mo so altar na apay a popoolan tan amin a kagawaan na satan tan pasantos mo so altar, pian magmaliw itan a sankasantosan ya altar.+ 11  Tan lanaan mo so palanggana tan say patoonan ed satan, tan pasantos mo itan. 12  “Insan iyasingger moy Aaron tan saray ananak to diad lolooban ed tolda a pantitiponan, tan ames mo ra.*+ 13  Tan pansulong moy Aaron na saray masanton kawes+ tan sikatoy lanaan mo+ tan pasantos mo, tan sikatoy manlingkor ed siak bilang saserdote. 14  Kayari na satan et iyasingger mo iray ananak to, tan pansulong mo ray andukey a kawes.+ 15  Lanaan mo ra a singa impanlanam ed ama ra,+ ta pian manlingkor ira ed siak bilang saserdote, tan lapud inkalanaan da et mantultuloy ed sikara so kimey na saserdote diad saray henerasyon da.”+ 16  Ginawa nen Moises so amin ya ingganggan nen Jehova ed sikato.+ Ontan so ginawa to. 17  Nipaalagey so tabernakulo diad unonan agew na unonan bulan, ed komaduan taon.+ 18  Sanen impaalagey nen Moises so tabernakulo, inyan to iray patoonan na satan,+ impaalagey to iray hamba,+ insurob to iray baras,+ tan impaalagey to iray lusek na satan. 19  Insakbong to so tolda+ ed tabernakulo tan intapew tod satan so sakbong+ na tolda, unong ya ingganggan nen Jehova ed si Moises. 20  Kayari na satan et inala to so Testimonya+ tan inkarga to itan ed Kaban+ tan insurob to ed Kaban iray panagsakbatan+ tan inyan to so sakob+ ed tapew na Kaban.+ 21  Inloob to so Kaban diad tabernakulo tan inyan to so kurtina+ a pinagkasanib tan sinaniban to so kaban na Testimonya,+ unong ya ingganggan nen Jehova ed si Moises. 22  Insan inloob to so lamisaan+ diad tolda a pantitiponan diad bandad amianen a diking na tabernakulo, diad paway na kurtina, 23  tan inlira to ditan so nantatapewan a tinapay+ diad arapan nen Jehova, unong ya ingganggan nen Jehova ed si Moises. 24  Inyan to so kandelero+ ed tolda a pantitiponan diad arap na lamisaan, diad bandad abalaten a diking na tabernakulo. 25  Sinelselan to iray lamparaan+ ed arapan nen Jehova, unong ya ingganggan nen Jehova ed si Moises. 26  Insan inloob tod tolda a pantitiponan so balitok ya altar,+ diad arap na kurtina, 27  pian paaseweken to+ ditan so ambalingit ya insenso,+ unong ya ingganggan nen Jehova ed si Moises. 28  Insan inyan to so sanib*+ na lolooban ed tabernakulo. 29  Inyan to so altar na apay a popoolan+ diad lolooban ed tabernakulo, say tolda a pantitiponan, pian sikatoy makapangiyapay ditan na apay a popoolan+ tan apay a kakanen, unong ya ingganggan nen Jehova ed si Moises. 30  Insan inyan to so palanggana diad baetan na tolda a pantitiponan tan say altar, tan kinargaan to itan na danum a panuras.+ 31  Ditan et inurasan nen Moises tan Aaron tan saray ananak to iray lima tan sali ra. 32  Manuras ira kapagno onloob ira ed tolda a pantitiponan odino sano onasingger ira ed altar,+ unong ya ingganggan nen Jehova ed si Moises. 33  Diad kaunoran, ginawa to so sular+ ed liber na tabernakulo tan say altar tan inyan to so sanib* na lolooban ed sular.+ Kanian asumpal nen Moises so kimey. 34  Tan sinakbongan na lurem so tolda a pantitiponan, tan say tabernakulo et napnoy gloria nen Jehova.+ 35  Agmakaloob si Moises ed tolda a pantitiponan, lapud nansiansia ed tagey na satan so lurem, tan say tabernakulo et napnoy gloria nen Jehova.+ 36  Tan diad interon panaon na pambiabiahe ra, saray Israelita et ompikal a manbiahe sano onatagey so lurem manlapud tabernakulo.+ 37  Balet no ag-onatagey so lurem, ag-ira ompikal a manbiahe anggad agew ya onatagey itan.+ 38  Ta say lurem nen Jehova et walad tagey na tabernakulo no agew, tan sakey ya apoy so walad tagey na satan no labi, a sankanengneng na interon sankaabungan na Israel, diad interon panaon na pambiabiahe ra.+

Paimanod leksab

Odino “kurtina.”
Odino “kurtina.”
Posiblin tutukoyen na saya ya iganggan ira nen Moises a manames.
Odino “kurtina.”
Odino “kurtina.”