Exodo 10:1-29

  • Komawalon salot: duron (1-20)

  • Komasiam a salot: bilunget (21-29)

10  Insan inkuan nen Jehova ed si Moises: “La kad Faraon, ta inabuloyan kon onawet so puso to tan say kapusoan na saray lingkor to,+ pian nipatnag ko irayan tanda a gawaen kod mismon arapan to,+  tan ginawak met iya pian nibagam ed saray ananak mo tan saray apom no panon kon dinusa so Ehipto tan no anto ran tanda so ginawak ed sikara;+ tan naamtaan yo a siak si Jehova.”  Kanian linmoob si Moises tan Aaron ed kawalaan na Faraon tan inkuan dad sikato: “Oniay inkuan nen Jehova a Dios na saray Hebreo, ‘Anggad kapigan so agmo pampasakop ed siak?+ Ibulos mo iray totook pian makapanlingkor ira ed siak.  Ta no agmo nin siansia ibulos iray totook, iyakar ko nabuas iray duroduron diad loob na saray ketegan mo.  Tan sakbongan day tapew na dalin, tan agla nanengneng so dalin. Kanen day antokaman ya inkera na uran a kristal parad sikayo, tan kanen day amin a kiew yo ya ontutubo ed uma.+  Panoen da iray kaabungan mo, saray kaabungan na amin a lingkor mo, tan saray kaabungan ed interon Ehipto, a satan et agnin balot anengneng na atateng mo tan saray inmuunan atateng mo manlapu lad insabi rad sayan dalin ya anggad natan.’”+ Diad saman et sikatoy binmeneg tan tinaynan toy Faraon.  Insan inkuan na saray lingkor na Faraon ed sikato: “Anggad kapigan so panesdes* na sayan too ed sikatayo? Ibulos mo la ray totoo pian makapanlingkor ira ed si Jehova a Dios da. Agmo ta nanenengneng ya aderal lay Ehipto?”  Kanian pinapawil da ra di Moises tan Aaron ed kawalaan na Faraon, tan inkuan tod sikara: “La kayo la, manlingkor kayo ed si Jehova a Dios yo. Balet siopa ray onla?”  Insan inkuan nen Moises: “Onla kami a kaiba iray kalangweran mi, saray mamatatken mi, saray ananak min lalaki tan bibii, saray karnero tan baka mi,+ ta manpiesta kami parad si Jehova.”+ 10  Inkuan tod sikara: “No ibulos ta kayo tan saray ananak yo, seguradon ibaga yon walad sikayo si Jehova!+ Mapatnag a walay mauges a getma yo. 11  Andi! Saray lalaki labat ed sikayo so onlan manlingkor ed si Jehova, ta satan so kinerew yo.” Diad saman et pinapaway da rad arapan na Faraon. 12  Inkuan natan nen Jehova ed si Moises: “Iyunat moy limam diad dalin na Ehipto pian ompaway iray duron, pian ontatdang ira ed dalin na Ehipto tan kanen day amin a tanaman ed dalin, amin ya inkera na uran a kristal.” 13  Tampol ya inyunat nen Moises so baston to diad dalin na Ehipto, tan sanagew tan sanlabin pinasiplog nen Jehova ed sayan dalin so dagem a manlalapud bukig. Sinmabi so kabuasan, tan saray duroduron et inawit na dagem a nanlapud bukig. 14  Tan tinmatdang iray duroduron diad interon dalin na Ehipto tan nanayam ira ed interon nasasakopan na Ehipto.+ Dakdakel iran maong;+ anggapo nin balot so onian karakel na duron nensaman, tan anggapo lay onian karakel ed arapen. 15  Sinakbongan day interon dalin, tan binmilunget so dalin lapud sikara; inupot day amin a tanaman ed dalin tan amin a bunga na kakiewan ya inkera na uran a kristal; anggapoy akera ya anggan sakey a birdin bulong na kiew odino tanaman ed uma diad interon dalin na Ehipto. 16  Kanian tampol ya impatawag na Faraon si Moises tan Aaron tan inkuan to: “Nankasalanan ak ed si Jehova a Dios yo tan ed sikayo. 17  Natan ipangasi yo, perdona yo ak nin maminsan ed kasalanan ko, tan mikasi kayo ed si Jehova a Dios yo pian ekalen tod siak iyan makapatey a salot.” 18  Kanian tinaynan to* lay Faraon tan akikasi ed si Jehova.+ 19  Insan inuman nen Jehova so arap na dagem, tan nagmaliw itan a maksil a dagem a manlalapud sagur, tan intikyab na satan so amin a duroduron a paarap ed Ambalangan Dayat. Anggapoy anggan sakey a duron ya atilak ed interon nasasakopan na Ehipto. 20  Balet inabuloyan nen Jehova ya onawet so puso na Faraon,+ tan agto imbulos iray Israelita. 21  Insan inkuan nen Jehova ed si Moises: “Iyunat moy limam ed tawen, pian niwalay bilunget diad dalin na Ehipto, salanti, agaylay kapal a bilunget.” 22  Tampol ya inyunat nen Moises so lima to ed tawen, tan niwalay makapal a bilunget diad interon dalin na Ehipto ed loob na taloy agew.+ 23  Ag-ira makapannengnengan, tan anggapo ed sikara so inmalis ed kawalaan to diad loob na taloy agew; balet walay liwawa ed ayaman na amin ya Israelita.+ 24  Kanian tinawag na Faraon si Moises tan inkuan to: “La kayo la, manlingkor kayo ed si Jehova.+ Saray karnero tan baka yo labat so natilak. Nayari yon ipila iray ananak yo.” 25  Balet inkuan nen Moises: “Iter mo met ed sikami iray* bagat tan apay a popoolan, tan iyapay mi iratan ed si Jehova a Dios mi.+ 26  Awiten mi met iray ayayep mi. Anggapoy anggan sakey ya ayep a natilak, ta usaren mi so arum ed saratan pian dayewen si Jehova a Dios mi, tan agmi ni amta no antoy iyapay mi diad pandayew mi ed si Jehova ya anggad pakasabi mi diman.” 27  Kanian inabuloyan nen Jehova ya onawet so puso na Faraon, tan agto ra labay ya ibulos.+ 28  Inkuan na Faraon ed sikato: “Ekal kad arapan ko! Agmo la sasalien so onarap ed siak, ta diad agew ya iyarap mod siak et ompatey ka.” 29  Diad saya et inkuan nen Moises: “Unong ya inkuan mo, agko la salien so onarap ed sika.”

Paimanod leksab

Literal, “pagmaliw a patit.”
Mapatnag a si Moises.
Odino “Abuloyan mo kami met a nawalaan na saray.”