Exodo 13:1-22

  • Kayarian nen Jehova so amin a panguloan a laki (1, 2)

  • Piesta na Andi-lebaduran Tinapay (3-10)

  • Iyapay ed Dios so amin a panguloan a laki (11-16)

  • Intonton so Israel paonlad Ambalangan Dayat (17-20)

  • Lusek a lurem tan apoy (21, 22)

13  Onia ni inkuan nen Jehova ed si Moises:  “Pasantos* mo parad siak so amin a panguloan a laki* ed limog na saray Israelita. Kayarian ko so panguloan a laki ya iyanak na too odino ayep.”+  Insan inkuan nen Moises ed saray totoo: “Tandaan yo iyan agew a pinmaway kayo ed Ehipto,+ manlapud abung ya akaaripenan yo, ta impaway kayo dia nen Jehova diad panamegley na mabiskeg a lima to.+ Kanian anggapoy alebaduraan a nayarin kanen.  Ompaway kayo ed sayan agew, diad bulan na Abib.*+  Sano niyakar kayo la nen Jehova ed dalin na saray Canaanita, Heteo, Amoreo, Heveo, tan saray Jebuseo,+ a satan et insipan tod saray inmuunan atateng yo ya iter tod sikayo,+ sakey a dalin a manag-agus so gatas tan dilo,+ gawaen yo iyan selebrasyon diad sayan bulan.  Pitoy agew a mangan kayoy andi-lebaduran tinapay,+ tan diad komapiton agew et walay nagawan piesta parad si Jehova.  Andi-lebaduran tinapay so nepeg a kanen ed pitoy agew;+ tan nepeg ya anggapoy alebaduraan a naromog ed sikayo,+ tan nepeg ya anggapoy pinaakseng a masa a naromog ed sikayo diad amin a teritorya* yo.  Tan nepeg yon ibaga ed anak yo diad satan ya agew, ‘Lapu iyad samay ginawa nen Jehova ed siak sanen pinmaway ak ed Ehipto.’+  Tan onkana iyan tanda parad sikayo diad lima yo tan bilang sakey a pakanodnonotan* diad moling yo,*+ pian say ganggan nen Jehova et niwala ed sangi yo, ta diad panamegley na mabiskeg a lima nen Jehova et impaway to kayo ed Ehipto. 10  Nepeg yon unoren iyan ganggan diad aturon panaon na satan ed kada taon.+ 11  “Sano iyakar kayo nen Jehova ed dalin na saray Canaanita, ya insipan to ed sikayo tan ed saray inmuunan atateng yo ya iter to ed sikayo,+ 12  iyapay yod si Jehova so amin a panguloan a laki,* ontan met ed amin a panguloan ya anak na ayayep a nakayarian yo. Kien nen Jehova iray lalaki.+ 13  Amin a panguloan ya asno et nepeg yon dondonen ed panamegley na sakey a karnero, tan no agyo dondonen itan et nepeg yon pakgeran. Tan amin a panguloan a laki ed saray ananak yo et nepeg yon dondonen.+ 14  “No bilang ta diad arapen et tepetan ka na anak mo, ‘Antoy kabaliksan na saya?’ diad satan et ikuan mod sikato, ‘Impaway kami nen Jehova ed Ehipto ed panamegley na mabiskeg a lima to, manlapud abung ya akaaripenan mi.+ 15  Sanen agkami ibulos na Faraon,+ pinatey nen Jehova so amin a panguloan diad dalin na Ehipto, manlapud panguloan na too ya anggad panguloan na ayep.+ Kanian ibabagat ko ed si Jehova so amin a panguloan a lalaki,* tan dodondonen ko so amin a panguloan na saray ananak kon lalaki.’ 16  Onkana iyan tanda ed lima yo tan bedber ed moling yo,*+ ta impaway itayo nen Jehova ed Ehipto diad panamegley na mabiskeg a lima to.” 17  Natan sanen imbulos na Faraon iray totoo, ag-ira intonton na Dios ed dalan a mamaarap ed dalin na saray Filisteo, anggaman asingger itan. Ta inkuan na Dios: “Ompano manguman so nonot na saray totoo sano nipaarap ira ed guerra, tan ompawil ira ed Ehipto.” 18  Kanian pinaliber ira na Dios ed dalan diad kalawakan ya asingger ed Ambalangan Dayat.+ Balet nandarasig a pinmaway iray Israelita ed dalin na Ehipto a singa ra miguerra. 19  Inawit met nen Moises iray pukel nen Jose, ta impansamba nen Jose iray ananak nen Israel, ya inkuan to: “Seguradon tulongan kayo na Dios, kanian ipila yon ipaway iray pukel ko dia.”+ 20  Tinaynan day Sucot tan nankampo ra ed Etam, diad gilig na kalawakan. 21  Si Jehova so walad unaan da pian iwanwan to ra ed dalan. No agew et diad panamegley na singa lusek a lurem,+ tan no labi et iikdan to ray liwawa ed panamegley na singa lusek ya apoy, ta pian makapanbiahe ra ed agew tan labi.+ 22  Ag-onaalis ed arapan na totoo so singa lusek a lurem legan na agew, odino say singa lusek ya apoy legan na labi.+

Paimanod leksab

Odino “Ibiig.”
Literal, “amin a panguloan a mangilukas ed kada eges.”
Nengnengen so Apendise B15.
Literal, “saray ketegan.”
Odino “panonot.”
Literal, “nanleetan na saray mata yo.”
Literal, “amin a mangilukas ed eges.”
Literal, “amin a mangilukas ed eges.”
Literal, “nanleetan na saray mata yo.”