Exodo 2:1-25

  • Inkiyanak nen Moises (1-4)

  • Tinagibi na biin anak na Faraon si Moises (5-10)

  • Batik ed Midian si Moises tan inasawa toy Zipora (11-22)

  • Dinengel na Dios so panakis na saray Israelita (23-25)

2  Kaleganan na satan, walay sakey a laki ed abung nen Levi ya angasaway sakey a marikit ed poli nen Levi.+  Tan nanlukon so bii tan angiyanak na sakey a laki. Sanen anengneng ton agaylay limgas na ugaw, taloy bulan ton inyamot.+  Sanen agto la niyamot so ugaw,+ sikatoy angala na baskit* a papiro tan pinuraporan to itan na aspalto tan alkitran tan inkarga to ditan so ugaw tan inyan to itan ed kawalaan na saray tanubong diad gilig na Ilog Nilo.  Balet nanalagey so atsi na ugaw+ diad bandad arawi pian nanengneng to no antoy nagawa ed sikato.  Sanen linmasur a manames so biin anak na Faraon diad Nilo, manaakar iray lingkor ton bibii diad gilig na Nilo. Tan anengneng to so baskit ed pegley na saray tanubong. Tampol ton impaala itan ed aripen ton bii.+  Sanen nilukasan to, anengneng to so ugaw, tan say ugaw et manak-akis. Sikatoy akasian to, balet inkuan to: “Sakey iya ed saray ananak na saray Hebreo.”  Insan inkuan na atsi na ugaw ed anak na Faraon: “Labay mon manawag ak na sakey a Hebreon bii pian mankomis ed ugaw?”  Inkuan ed sikato na anak na Faraon: “La ka!” Diad saman et linman tampol so ugaw a bii tan tinawag to so ina na ugaw.+  Insan inkuan na anak na Faraon ed sikato: “Alam iyan ugaw tan komisan mo parad siak, tan upaan ta ka.” Kanian inala na bii so ugaw tan kinomisan to. 10  Sanen binmaleg la so ugaw, sikatoy inawit tod anak na Faraon, tan sikatoy impasen ton anak.+ Sikatoy inngaran ton Moises* tan inkuan to: “Saya et lapud sikatoy inagwat ko ed danum.”+ 11  Natan diad saraman ya agew, sanen baleg lay Moises,* sikatoy linma ed saray agagi to pian nengnengen to no panoy kabelat na trabaho ra,+ tan anengneng toy sakey ya Ehipsio a manisiplat ed sakey a Hebreo, sakey ed saray agagi to. 12  Kanian sikatoy nanlingaw-lingaw, tan sanen anengneng ton anggapoy too, pinatey to imay Ehipsio tan inyamot to ed kabueran.+ 13  Balet sanen sikatoy pinmaway diad tinmumbok ya agew, walay duaran Hebreo a manlalaban. Kanian inkuan tod samay akankasalanan: “Akin et kakabilen moy kaibam?”+ 14  Diad saya et inkuan to: “Siopay anuro ed sikan magmaliw a prinsipe tan ukom mi? Labay mo ak met amon pateyen a singa impamatey mo ed samay Ehipsio?”+ Diad saman et tinmakot si Moises tan inkuan to: “Seguradon naamtaan da lay agawa!” 15  Insan nadngelan itan na Faraon, tan sinali ton pateyen si Moises; balet imbatikan nen Moises so Faraon tan linmad dalin na Midian+ pian manayam diman, tan sikatoy yinmurong ed abay na bobon. 16  Natan, say saserdote na Midian+ et walaan na pitoran mamarikit, tan sinmabi iraya pian onasol na danum tan panoen da iray panagpainuman ta pian makainum so pulok nen ama ra. 17  Balet singa dati et sinmabi iray managpastol tan pinataynan da ra. Diad saya et tinulongan* nen Moises iray bibii tan pinainum toy pulok da. 18  Sanen pinmawil ira ed si Reuel*+ ya ama ra, oniay inkuan to: “Akin et akasempet kayon tampol natan?” 19  Inyebat da: “Walay Ehipsio+ ya angiyagel ed sikami ed saray managpastol, tan inyasolan to kami ni ingen tan pinainum to so pulok.” 20  Inkuan tod saray mamarikit to: “Kawalaan to balet ey? Akin et tinaynan yo? Tawag yo, pian makapidungo ed sikatayo.” 21  Kayari na saman et inmabobon si Moises a miayam ed sayan too, tan inter tod si Moises so marikit ton si Zipora+ pian magmaliw ya asawa to. 22  Agnambayag et sikatoy angiyanak na sakey a laki, tan sikatoy inngaran nen Moises a Gersom,*+ lapud inkuan to: “Nagmaliw ak a dayon manaayam ed sananey a pasen.”+ 23  Kayari na andukey a panaon* et inatey so ari na Ehipto,+ balet maer-ermen nin siansia iray Israelita lapud pakakaaripen da tan iyaakis day paniirap da, tan onsasabi ed tuan Dios so ikekerew day tulong lapud pakakaaripen da.+ 24  Sinmabi panaon et dinengel na Dios so akis da+ tan ninonot na Dios so impisipanan to ed si Abraham, Isaac, tan Jacob.+ 25  Kanian ninengneng na Dios iray Israelita; tan inimano toy kipapasen da.

Paimanod leksab

Odino “kaban.”
Kabaliksan toy “Inagwat,” salanti, inliktar manlapud danum.
Odino “sanen ombibiskeg lay Moises.”
Odino “inyagel.”
Salanti, si Jetro.
Kabaliksan toy “Sakey a Dayon Manaayam Diman.”
Literal, “dakel ya agew.”