Exodo 22:1-31
22 “No say sakey a too et nantakew na kalakian a baka odino karnero tan pinarti to odino inlako to, bayaran to na limaran kalakian a baka so sakey a baka tan apatiran karnero so sakey a karnero.+
2 (“No narel so sakey a matakew+ a lolooban toy sakey ya abung tan sikatoy akabil tan inatey, agmankasalanan ed dala imay akapatey ed sikato.
3 Balet no nagawa itan sano binmutay lay agew, mankasalanan ed dala imay akapatey.)
“Nepeg a sikatoy manbayar. No anggapon balot so kayarian to, nepeg a sikatoy ilako parad saray bengatlan tinakew to.
4 No say tinakew to et aromog ed sikato tan mabilay ni, balanglan kalakian a baka odino asno odino karnero, nepeg a doble so bayaran to.
5 “No walay mangipaway na ayayep to pian pankabkaben tod uma odino kaubasan, tan pinaulyan to iratan a mankabkab ed uma na arum, nepeg a bayaran to na sankaabigan manlapud dilin uma to odino dilin kaubasan to.
6 “No walay apoy a dinmangat tan kinmayat ed masabit iran kakiewan, tan apoolan iray abedber ya inani odino saray pagey odino sakey ya uma, samay anelsel na apoy et nepeg ton bayaran iray apoolan.
7 “No walay kuarta odino saray kagawaan ya impaiyatol na sakey a too ed kapara ton too tan atakew iratan ed abung na kapara ton too, nepeg a doble so bayaran na samay anakew no sikatoy narel.+
8 No agnarel so matakew, say akanggawa ed abung so nepeg ya iyakar ed arapan na tuan Dios+ pian nadetermina no kasin inala to iray* kagawaan na samay kapara ton too.
9 Diad amin a kaso nipaakar ed agmanepeg a panag-ala na saray kayarian, a singa say kalakian a baka, asno, karnero, kawes, odino antokaman ya abalang, a nayarin ibaga ton, “Gawak iya!” awiten dan dua so kaso ra ed arapan na tuan Dios.+ Samay iyabawag na Dios a nankasalanan et doble so bayaran to ed kapara ton too.+
10 “No walay asno odino kalakian a baka odino karnero odino antokaman a kokomponien ya ayep ya ipaasikaso na sakey a too ed kapara ton too tan inatey odino apiley odino atakew itan ya anggapoy akanengneng,
11 nepeg a walay gawaen a pansamba ed baetan dan dua diad arapan nen Jehova, ya agto inala imay kayarian na kapara ton too; tan awaten itan na samay akanggawa. Agla manbayar imay sakey a too.+
12 Balet no atakew ed sikato so ayep, nepeg ton bayaran imay akanggawa.
13 No satan et biningkas na atap ya ayep, awiten to itan bilang ebidensya. Agto nepeg a bayaran so biningkas na atap ya ayep.
14 “Balet no walay binmayes na ayep ed kapara ton too, tan alupoy odino inatey itan legan ya anggapo diman imay akanggawa, nepeg a manbayar imay binmayes.
15 No wadman imay akanggawa, agto itan bayaran. No inabangan itan, say pinagkabayar et samay abang.
16 “Natan no ayaten tan akdolan na sakey a laki so marikit ya agni akisipan a miasawa, sikatoy nepeg a manbayar na dasel pian magmaliw ya asawa to.+
17 No agbalot labay na ama ya iter ed sikato so marikit to, bayaran to nin siansia so dasel.
18 “Agmo aabuloyan a manbilay so biin managparles.+
19 “Siopaman a misekso ed ayep et nepeg a pateyen.+
20 “Siopaman a manbagat ed dinanman a dirios nilikud ed si Jehova et nepeg a pateyen.+
21 “Agmo mamaltratoen odino papairapen so sakey a dayo,+ ta nagmaliw kayon dayo ed dalin na Ehipto.+
22 “Agyo papairapen so siopaman a balon bii odino ugaw ya ulilad ama.*+
23 No sikatoy pairapen mo tan sikatoy onakis ed siak, seguradon dengelen koy akis to;+
24 tan ondalang so sanok ko, tan pateyen ta kayo ed espada, tan nabalo iray kaasawaan yo, tan naulilad ama iray ananak yo.
25 “No pabayesen moy kuarta so siopaman a mairap-bilay* ed saray totook, sakey a miaayam ed sika, agka nepeg a magmaliw a singa managpaabang na kuarta* ed sikato. Agyo papatuboan.+
26 “No alaen mo so kawes na kaparam a too bilang garantiya parad utang,+ nepeg mon ipawil itan ed sikato diad iselek na agew.
27 Ta satan labat so sakbong to, say kawes to a pansakbong ed laman* to; antoy dukolan to sano onugip?+ Sano sikatoy onakis ed siak, seguradon dengelen ko, ta maabagey ak.+
28 “Agmo nepeg ya isamba* so Dios+ odino say sakey a pangulo* ed limog na kabaleyan mo.+
29 “Nepeg ya agka masuyat a mangiyapay manlapud daakan ya inanim tan manlapud manleppua iran panagpespesan* mo.+ Nepeg mon iter ed siak so panguloan ed saray ananak mo.+
30 Oniay nepeg mon gawaen ed kalakian a bakam tan ed karnerom:+ Pitoy agew a mansiansia itan ed ina to. Diad komawalon agew et nepeg mon iter itan ed siak.+
31 “Nepeg kayon magmaliw a masanton totook,+ tan agyo nepeg a kanen so karne na antokaman ed uma a biningkas na atap ya ayep.+ Nepeg yon ibuntok itan ed saray aso.
Paimanod leksab
^ Literal, “intapew toy lima tod saray.”
^ Odino “ulila.”
^ Odino “singa mangaalay alablabas ya interes.”
^ Odino “napapairap.”
^ Literal, “baog.”
^ Odino “ayewen.”
^ Odino “manuley.”
^ Salanti, saray panagpespesan na olibo tan ubas.
