Exodo 4:1-31
4 Balet, inmebat si Moises: “Panon to no agda ak panisiaan tan agda ak dengelen+ lapud ibaga ran, ‘Agnampanengneng ed sika si Jehova’?”
2 Insan inkuan nen Jehova ed sikato: “Anto ’tay sankaegnaan mo?” Sikatoy inmebat: “Baston.”
3 Inkuan to: “Ibuntok mo ed dalin.” Kanian imbuntok tod dalin, tan nagmaliw ya uleg;+ tan inarawian itan nen Moises.
4 Natan et inkuan nen Jehova ed si Moises: “Gawat mo tan singkat mo ed ikol.” Kanian ginawat to tan siningkat to, tan nagmaliw itan a baston ed lima to.
5 Insan inkuan na Dios: “Gawam iya pian manisia ran nampanengneng ed sika si Jehova a Dios na saray inmuunan atateng da, say Dios nen Abraham, Dios nen Isaac, tan Dios nen Jacob.”+
6 Inkuan lamet nen Jehova ed sikato: “Ipangasim, isurob moy limam ed kawes mo.” Kanian insurob toy lima to ed kawes to. Sanen impaway to itan, say lima to et akating tan nagmaliw ya amputin singa niebe!+
7 Insan inkuan to: “Isurob mo lamet so limam ed kawes mo.” Kanian insurob to so lima to. Sanen impaway toy lima to, inmabig itan a singa ed samay laman ton dati!
8 Inkuan to: “No agda ka panisiaan odino agda imanoen so unonan tanda, seguradon panisiaan da la so ontumbok a tanda.+
9 No siansia nin agda panisiaan irayan duaran tanda tan agda ka labay a dengelen, mangala kay danum ed Ilog Nilo tan ikalbom itan ed amagan dalin, tan say danum ya inalam ed Nilo et magmaliw a dala ed amagan dalin.”+
10 Inkuan natan nen Moises ed si Jehova: “Dispensa mo ak, Jehova, lapud aliwa ak a marunong a mansalita manlapu lad gapo, balanglan nensaman odino diad sayan pitotongtong mod lingkor mo, ta makapuy ak a mansalita.”+
11 Inkuan nen Jehova ed sikato: “Siopay nanggaway sangi na too, tan siopa so makayarin manggawa ed sikara ya emel, telek, walaay malinew a pakanengneng, odino bulag? Agta siak, si Jehova?
12 Kanian la ka la, ta wala ak ed sika sano mansasalita ka,* tan ibangat ta ka no antoy ibagam.”+
13 Balet inkuan to: “Dispensa mo ak, Jehova, ipangasim a mangibaki ka lay arum a labay mon ibaki.”
14 Diad saman et dinmalang so sanok nen Jehova ed si Moises, tan inkuan to: “Agta wadtay kuyam, si Aaron+ a Levita? Amtak a sikatoy maong a mansalita. Tan sikatoy paarap la dia natan pian abeten to ka. Manliket so puso to sano nanengneng to ka.+
15 Kanian mitongtong kad sikato tan ibagam ed sikato iray imbagak,+ tan wala ak ed sikayon dua legan a mansasalita ka,+ tan ibangat ta kayo no antoy gawaen yo.
16 Sikatoy mansalita ed saray totoo parad sika, tan sikatoy magmaliw a pinagkasangiyan mo, tan magmaliw kan singa Dios ed sikato.*+
17 Tan egnaan mo itan a baston tan usaren mon manggawa na saray tanda.”+
18 Kanian pinmawil si Moises ed katulangan ton Jetro+ tan inkuan tod sikato: “Ipangasim, labay koy ompawil ed saray agagik a walad Ehipto pian nanengneng ko no kasin mabilay ni ra.” Inkuan nen Jetro ed si Moises: “La ka, niwala komon ed sikay kareenan.”
19 Kayari na satan et inkuan nen Jehova ed si Moises diad Midian: “La ka, pawil kad Ehipto, ta inatey la iramay totoon malabay a mamatey ed sika.”*+
20 Insan inawit nen Moises so asawa to tan saray ananak to tan inlugan to rad asno, tan sikatoy pinmawil ed dalin na Ehipto. Ontan met, inawit nen Moises so baston na tuan Dios.
21 Insan inkuan nen Jehova ed si Moises: “Inikdan ta kay pakayarin manggawa na saray milagro. Kapawil mod Ehipto, seguroen mo ya amin iratan et gawaen mod arapan na Faraon.+ Balet abuloyan kon onawet so puso to,+ tan agto ibulos iray totook.+
22 Ibagam ed Faraon, ‘Oniay inkuan nen Jehova: “Say Israel et ana’ko, say panguloan ko.+
23 Ibagak ed sika, Ibulos mo so ana’ko pian sikatoy makapanlingkor ed siak. Balet no sikatoy agmo ibulos, pateyen ko so anak mo, say panguloan mo.”’”+
24 Natan diad dalan sanen wala rad pasen a panagpundoan, nampanengneng ed sikato si Jehova+ tan sikatoy labay ton pateyen.+
25 Diad saman et angalay bato* si Zipora+ tan sinegat toy anak to tan imbuntok to imay katat ed salian na anghel tan inkuan to: “Saya et lapud sakey kan nobyo ed siak diad panamegley na sayan dala.”
26 Kanian sikatoy imbulos To. Diad saman et inkuan to, “sakey a nobyo ed panamegley na dala,” lapud samay ginawan impansegat.
27 Insan inkuan nen Jehova ed si Aaron: “La ka, abet moy Moises diad kalawakan.”+ Kanian sikatoy linma tan inabet to diad palandey na tuan Dios+ tan sikatoy imbano to ed panamegley na angob.
28 Tan insalaysay nen Moises ed si Aaron so amin ya imbaga nen Jehova, ya angibaki ed sikato,+ tan amin a tanda ya ipapagawa To ed sikato.+
29 Kayari na saman et linmay Moises tan Aaron tan tinipon day amin a mamatatken ed saray Israelita.+
30 Insalaysay ed sikara nen Aaron so amin ya imbaga nen Jehova ed si Moises, tan ginawa to iray tanda+ ed pakanengneng na saray totoo.
31 Diad saya et anisia iray totoo.+ Sanen nadngel dan inimano la nen Jehova iray Israelita+ tan anengneng to so paniirap da,+ tinmalimukor tan dinmakmomo ira.
Paimanod leksab
^ Literal, “ed sangim.”
^ Odino “tan irepresentam so Dios ed sikato.”
^ Odino “totoon malabay a maneral ed kamarerwam.”
^ Odino “kutsilyon bato.”
