Exodo 11:1-10
11 Insan inkuan nen Jehova ed si Moises: “Sakey nin salot so idapok ed Faraon tan ed Ehipto. Kayari na satan et ibulos to kayo la.+ Sano ibulos to kayo, talagan pataynanen to kayo la dia.+
2 Natan, ibagam ed saray totoo ya amin a lalaki tan bibii et nepeg dan kerewan so kakaabay da na saray kagawaan a pilak tan balitok.”+
3 Tan inter nen Jehova ed totoo so pabor na saray Ehipsio. Niarum ni, si Moises et inggalgalang na saray lingkor na Faraon tan saray totoo ed dalin na Ehipto.
4 Insan inkuan nen Moises: “Oniay inkuan nen Jehova, ‘Ondalan ak ed pegley na Ehipto no pegley-labi,+
5 tan ompatey so amin a panguloan ed dalin na Ehipto,+ manlapud panguloan na Faraon ya akayurong ed trono to ya anggad panguloan na aripen a bii a mankikimey ed gilingan, tan amin a panguloan na saray ayayep.+
6 Diad interon dalin na Ehipto et walay maksil a panugaog ya agnin balot agawa tan aglan balot nagawa.+
7 Balet anggapoy anggan sakey ya aso ya ondangol* ed saray Israelita, ed saray totoo odino ayayep da, pian naamtaan yo a nayarian nen Jehova a pandumaan iray Ehipsio tan saray Israelita.’+
8 Tan onlad siak so amin a lingkor mo tan ondakmomo rad siak, a kuan da, ‘La kayo la, sika tan amin a totoon ontutumbok ed sika.’+ Tan kayari na satan et ompaway ak la.” Diad saman et tinaynan to lay Faraon a mamapasnok.
9 Insan inkuan nen Jehova ed si Moises: “Agkayo dengelen na Faraon,+ pian ondakel iray gawaen kon milagro ed dalin na Ehipto.”+
10 Ginawa nen Moises tan Aaron irayan amin a milagro diad arapan na Faraon,+ balet inabuloyan nen Jehova ya onawet so puso na Faraon, kanian agto imbulos iray Israelita manlapud dalin to.+
Paimanod leksab
^ Literal, “pataremen toy dila to.”
