Isaias 21:1-17

  • Mensahe maibusor iti let-ang iti baybay (1-10)

    • Panagbantay iti pagwanawanan (8)

    • “Naabaken ti Babilonia!” (9)

  • Mensahe maibusor iti Duma ken iti desierto (11-17)

    • “Parabantay, napaut pay kadi ti rabii?” (11)

21  Ti mensahe maibusor iti let-ang iti baybay:*+ Um-umay a kas iti angin ti bagyo manipud abagatan,Manipud iti let-ang, iti nakabutbuteng a daga.+   Adda nakaam-amak a sirmata a naibaga kaniak: Mangal-allilaw ti manangallilaw,Ken mangdaddadael ti manangdadael. Dumarupka, O Elam! Rumautka, O Media!+ Pagpatinggaekto ti amin a panagsennaay a pinataudna.+   Isu a nakaro ti ladingitko.*+ Nakariknaak iti ut-ot,Kas iti babai nga agpaspasngay. Mariribukanak a dumngeg;Maamakak a kumita.   Nagkibbayo ti barukongko; nagpigergerak iti buteng. Kabutengkon ti padpadaanak a panagsipnget.   Isaganayo ti lamisaan ken dagiti tugaw! Mangan ken uminumkayo!+ Tumakderkayo, dakayo a prinsipe, dutokanyo* ti kalasag!   Ta daytoy ti kinuna kaniak ni Jehova: “Mangipuestoka iti agguardia a mangipadamag iti makitana.”   Ket nakakita iti karuahe a pakigubat a guyguyoden ti dua a kabalio,Karuahe a pakigubat a guyguyoden dagiti asno,Karuahe a pakigubat a guyguyoden dagiti kamelio. Nagbantay ken nagsiput a naimbag.   Ket nagpukkaw a kas iti leon: “Iti aldaw O Jehova, kanayon a nakatakderak iti pagwanawanan,Ken rinabii nga agpuestoak iti pagguardiaak.+   Kitaem dagiti um-umay: Lallaki a nakalugan iti karuahe a pakigubat a guyguyoden ti dua a kabalio!”+ Kalpasanna, kinunana: “Naabaken ti Babilonia! Naabaken!+ Naburakburak iti daga ti amin a kinitikitan nga imahen dagiti diosna!”+ 10  Naipayatpayatka, O ilik,Ti produkto* ti pagirikak,+Impadamagko kadakayo ti nangngegko ken Jehova a panguluen dagiti armada, ti Dios ti Israel. 11  Ti mensahe maibusor iti Duma:* Adda agpukpukkaw kaniak manipud Seir:+ “Parabantay, napaut pay kadi ti rabii? Parabantay, napaut pay kadi ti rabii?” 12  Insungbat ti parabantay: “Um-umayen ti bigat, kasta met ti rabii. No agsaludsodkayo, agsaludsodkayo. Agsublikayto manen!” 13  Ti mensahe maibusor iti desierto: Umyankayto iti kakaykaywan iti desierto,Dakayo a grupo dagiti biahero a taga-Dedan.+ 14  Mangyegkayo iti danum para iti mawaw,Dakayo a taga-Tema,+Ken mangyegkayo iti tinapay para iti agliblibas. 15  Ta tinarayanda dagiti espada, ti naasut nga espada,Ti nakabiat a pana, ken ti kinaranggas ti gubat. 16  Ta daytoy ti kinuna kaniak ni Jehova: “Iti uneg ti makatawen, kas iti tawtawen ti matangtangdanan a trabahador,* agpatingganto ti dayag ti Kedar.+ 17  Manmanonto ti mabati a pumapana a mannakigubat ti Kedar, ta kasta ti kinuna ni Jehova a Dios ti Israel.”

Footnotes

Nalabit tumukoy iti rehion ti nagkauna a Babilonia.
Lit., “nakaut-ut-ot ti patongko.”
Wenno “lanaanyo.”
Lit., “anak.”
Kaipapananna, “Kinaulimek.”
Wenno “siaannad a nabilang kas iti panagbilang ti matangtangdanan a trabahador”; kayatna a sawen, eksakto a maysa a tawen.