Isaias 64:1-12

  • Tuloy ti kararag ti panagbabawi (1-12)

    • Ni Jehova ti “Agdamdamili” (8)

64  No koma laeng pisangem ti langit ket bumabaka,Tapno magunggon dagiti bantay gapu kenka,   Kas no puoran ti apuy ti ruting,Ken paburekenna ti danum,Iti kasta, maammuanto dagiti kabusormo ti naganmo,Ken agpigergerto dagiti nasion iti sanguanam!   Idi nagaramidka kadagiti nakaskasdaaw a banag a saanmi a ninamnama,+Bimmabaka ket nagunggon dagiti bantay iti sanguanam.+   Sipud pay idi, awan dimngeg ken nangipangag,Awan met ti nakitada a Dios, malaksid kenka,Nga agtigtignay para kadagiti agtultuloy a mangnamnama* kenkuana.+   Inawatmo dagidiay maragragsakan nga agaramid iti umiso,+Dagidiay manglaglagip kenka ken sumursurot kadagiti dalanmo. Nakapungtotka, bayat nga agbasbasolkami,+Nabayag a kasta ti inar-aramidmi. Maisalakankami kadi itan?   Nagbalinkami amin a kas iti maysa a narugit,Ken dagiti nalinteg nga aramidmi ket kas iti lupot ti agregla.+ Malaylaykamto amin a kas iti bulong,Ken itayabnakami dagiti biddutmi a kas iti angin.   Awan ti umaw-awag iti naganmo,Awan ti agtigtignay a kumpet kenka,Ta inlingedmo ti rupam kadakami,+Ken pinagkapsutnakami* gapu iti biddutmi.*   Ngem ita, O Jehova, sika ti Amami.+ Dakami ti pila, ket sika ti Agdamdamili;*+Aramidnakami amin ti imam.   Dika unay agpungtot, O Jehova,+Ken dimo lagipen ti biddutmi iti agnanayon. Kitaennakami, pangngaasim, ta dakami ti ilim. 10  Nagbalin a let-ang dagiti nasantuan a siudadmo. Nagbalin a let-ang ti Sion,Nalangalang ti Jerusalem.+ 11  Ti balaymi* a nasantuan ken nadayag,*A nangidaydayawan kenka dagidi ammami,Ket napuoran iti apuy,+Ken nadadael ti amin a banag nga ipatpategmi. 12  Gapu iti daytoy, saanka kadi latta nga agtignay, O Jehova? Agulimekka kadi latta ket ipalubosmo a nakaro ti panagrigatmi?+

Footnotes

Wenno “siaanus nga agur-uray.”
Lit., “rinunawnakami.”
Lit., “ti ima ti biddutmi.”
Wenno “Daydiay nangporma kadakami.”
Wenno “templomi.”
Wenno “napintas.”