Isaias 58:1-14

  • Umiso ken di umiso a panagayunar (1-12)

  • Maragsakan a mangngilin iti Sabbath (13, 14)

58  “Ipapatim ti agpukkaw; dika agsardeng! Ipigsam ti timekmo a kas iti tangguyob. Ibagam iti ilik ti panagrebeldeda,+Ken iti sangakabbalayan ni Jacob dagiti basolda.   Inaldaw a sapsapulendak,Ken inyebkasda ti ragsakda a mangammo kadagiti dalanko,Kas man la maysada a nasion a nagaramid iti kinalintegKen saan a nangtallikud iti kinahustisia ti Diosda.+ Nagkiddawda kaniak iti nalinteg a panangukom,A naragsakanda nga immasideg iti Dios:+   ‘Apay a saanmo a nakita ti panagayunarmi?+ Ken apay a saanmo a nadlaw ti panangparigatmi iti bagimi?’*+ Gapu ta idi aldaw a nagayunarkayo, inaramidyo ti bukodyo a paginteresan,*Ken pinarigatyo dagiti trabahadoryo.+   Nagbanag iti panagririri ken panagaapa ti panagayunaryo,Ken nakaro ti panagdidinnanogyo. Saan a mangngeg ti timekyo idiay langit uray agayunarkayo a kas iti ar-aramidenyo ita.   Kastoy kadi ti piliek a panagayunar,Kas aldaw a parigaten ti maysa ti bagina,*Nga agdumog kas iti lidda,Nga agidda iti nakersang a lupot ken dapdapo? Daytoy kadi ti aw-awaganyo iti panagayunar ken aldaw a makaay-ayo ken Jehova?   Saan, daytoy ti panagayunar* a piliek: Maikkat dagiti posas ti kinadakes,Mawarwar dagiti galut ti sangol,+Mawayawayaan dagidiay maparparigat,+Ken matukkol ti tunggal sangol;   Ibingaymo ti tinapaymo iti mabisin,+Padagusem ti napanglaw ken awanan pagtaengan,Kawesam ti makitam nga awan badona,+Ken saanmo a tallikudan ti kabagiam.   Iti kasta, agsilnagto ti lawagmo kas iti parbangon,+Ken alistonto ti panagimbagmo. Mapanto iti sanguanam ti kinalintegmo,Ken ti dayag ni Jehova ti mangbantayto iti likudam.+   Umawagkanto, ket sumungbat ni Jehova;Agpatulongkanto, ket ibagana, ‘Adtoyak!’ No ikkatem ti sangol iti tengngamKen isardengmo ti agitudo ken agsao iti makadangran,+ 10  No itedmo iti mabisin ti banag a tartarigagayam*+Ken pennekem dagidiay marigrigatan,*Agsilnagto ti lawagmo uray iti kasipngetan,Ken lumawagto ti kinalidemmo a kas iti tengnga ti aldaw.+ 11  Kanayonto nga idalannaka ni JehovaKen pennekennaka uray iti natikag a daga;+Patibkerennanto dagiti tulangmo,Ket agbalinkanto a kas iti hardin a napadanuman a naimbag,+Kas iti ubbog a saan a pulos maatianan. 12  Ibangondanto dagiti nagkauna a rebba gapu kenka,+Ket tarimaanemto ti pundasion dagiti napalabas a henerasion.+ Maawagankanto iti managtarimaan kadagiti nadadael a pader,*+Ken managtarimaan kadagiti kalsada tapno pagnaedan. 13  No gapu iti Sabbath a saanmo* nga aramiden dagiti bukodmo a paginteresan* iti nasantuan nga aldawko+Ken ibagam a makaparagsak unay ti Sabbath, maysa a nasantuan nga aldaw ni Jehova, maysa nga aldaw a maipadayag,+Ket ipadayagmo dayta imbes nga aramidem dagiti bukodmo a paginteresan ken agsaoka iti awan serserbina, 14  Maragsakankanto ngarud ken Jehova,Ket pagturayenkanto kadagiti nangato a disso ti daga.+ Pakanenkanto iti* tawid ni Jacob a kapuonam,+Ta imbaga dayta ni Jehova.”

Footnotes

Wenno “kararuami.”
Wenno “pagragsakan.”
Wenno “kararuana.”
Kitaem ti Glosario.
Wenno “tartarigagayan ti kararuam.”
Wenno “dagiti marigrigatan a kararua.”
Lit., “kadagiti giwang.”
Lit., “nga iyatrasmo ti sakam.”
Wenno “pagragsakan.”
Wenno “Tagiragsakemto ti.”