Isaias 19:1-25

  • Mensahe maibusor iti Egipto (1-15)

  • Maam-ammonto ti Egipto ni Jehova (16-25)

    • Altar ni Jehova iti Egipto (19)

19  Ti mensahe maibusor iti Egipto:+ Nakasakay ni Jehova iti napartak nga ulep ket mapan iti Egipto. Agpigerger iti sanguananna dagiti awan serserbina a dios ti Egipto,+Ket agbuteng ti puso dagiti Egipcio.   “Pagbibinnusorekto dagiti Egipcio,Ket aglalabandanto,Tunggal maysa maibusor iti kabsatna ken iti kaarrubana,Siudad maibusor iti siudad, pagarian maibusor iti pagarian.   Mariribukanto ti Egipto,Ket riribukekto dagiti planona.+ Agkonsultadanto kadagiti awan serserbina a dios,Kadagiti engkantador, espiritista, ken mammadles.+   Iyawatkonto ti Egipto iti naranggas nga amo,Ket iturayanto ida ti nauyong nga ari,”+ kuna ti pudno nga Apo, ni Jehova a panguluen dagiti armada.   Maatiananto ti baybay,Ket mamagaan ken maatiananto ti karayan.+   Bumangsitto dagiti karayan;Umababaw ken mamagaanto dagiti kanal ti Nilo iti Egipto. Magangonto dagiti runo ken lidda.+   Magangonto dagiti mula iti igid ti Karayan Nilo, iti wangawangan ti Nilo,Ken iti amin a daga a namulaan iti bin-i iti igid ti Nilo.+ Mayanginto dagita, ket awandanton.   Agladingitto dagiti mangngalap,Aglidayto dagiti agbambanniit iti Nilo,Ken manmanonto dagiti agtabukol sadiay.   Maibabainto dagiti mangsagsagaysay iti lino+Ken dagiti agar-aramid iti puraw a lupot iti pagabelan. 10  Maidadanesto dagiti agab-abel,Agladingitto ti amin a matangtangdanan a trabahador. 11  Maag dagiti prinsipe ti Zoan.+ Saan a nainkalintegan ti balakad dagiti kasisiriban a mamalbalakad ni Faraon.+ Kasano a maibagayo ken Faraon: “Maysaak a kaputotan dagiti masirib,Kaputotan dagiti nagkauna nga ari”? 12  Ayan ngarud dagiti masirib a tattaom?+ Damagem no ammoda ti inkeddeng ni Jehova a panguluen dagiti armada maibusor iti Egipto. 13  Nagtignay a simamaag dagiti prinsipe ti Zoan;Naallilaw dagiti prinsipe ti Nof;*+Dagiti panguluen ti tribuna inyaw-awanda ti Egipto. 14  Riniribuk ni Jehova ti Egipto;+Inyaw-awanda ti Egipto iti aniaman nga aramidenna,Kas iti nabartek nga agibar-ibar iti saruana. 15  Awanto ti aniaman a maaramidan ti Egipto,Uray ti ulo wenno ipus, ti saringit wenno ti lidda.* 16  Iti dayta nga aldaw, agbalinto ti Egipto a kas iti babbai, nga agpigerger ken mabutbuteng gapu iti nakalayat nga ima ni Jehova a panguluen dagiti armada.+ 17  Agbutengto ti Egipto gapu iti Juda. Maamakdanto no madakamat dayta gapu iti desision ni Jehova a panguluen dagiti armada maibusor kadakuada.+ 18  Iti dayta nga aldaw, addanto lima a siudad idiay Egipto nga agsasao iti lengguahe ti Canaan+ ken agsapsapata nga agmatalekda ken Jehova a panguluen dagiti armada. Maawaganto ti maysa a siudad iti Siudad ti Pannakarakrak. 19  Iti dayta nga aldaw, addanto maysa nga altar ni Jehova iti tengnga ti Egipto ken maysa nga adigi ni Jehova iti pagpatinggaan ti Egipto. 20  Agpaayto dayta a pagilasinan ken pangsaksi ken Jehova a panguluen dagiti armada iti Egipto; ta agpakaasidanto ken Jehova gapu kadagiti manangirurumen, ket mangibaonto iti mangisalakan, maysa a naindaklan, a mangispal kadakuada. 21  Ipakitanto ni Jehova ti kinasiasinona kadagiti Egipcio, ket maam-ammodanto ni Jehova iti dayta nga aldaw. Mangipaaydanto kadagiti daton ken sagut ket agkarida ken Jehova sa tungpalenda dayta. 22  Didigraento ni Jehova ti Egipto.+ Didigraen ken paimbagennanto dayta. Agsublidanto ken Jehova, ket denggennanto ti panagpakaasida ken paimbagenna ida. 23  Iti dayta nga aldaw, addanto dakkel a kalsada+ manipud iti Egipto nga agpa-Asiria. Sumrekto ti Asiria iti Egipto, ket sumrekto ti Egipto iti Asiria, ket agkaduadanto nga agserbi iti Dios. 24  Iti dayta nga aldaw, maikatlonto ti Israel iti Egipto ken Asiria,+ maysa a bendision iti tengnga ti daga, 25  ta bendisionanto ida ni Jehova a panguluen dagiti armada, ket kunana: “Mabendisionan koma ti ilik, ti Egipto, ken ti aramid dagiti imak, ti Asiria, ken ti tawidko, ti Israel.”+

Footnotes

Wenno “Memfis.”
Wenno mabalin a, “ti sanga ti palma wenno ti runo.”