Zɔbu 34:1-37
34 Elii tɛli su ekun.Ɔ seli kɛ:
2 “Amun mɔ amun ti ngwlɛlɛfuɛ’n, amun tie min ndɛ’n.Amun mɔ amun si sa kpanngban’n, amun sie amun su.
3 Afin be taaman’n* yɛ be fa nian aliɛ’n i fɛ’n niɔn,i kunngba’n, be sukpɔ’n yɛ be fa tie ndɛ naan b’a wun ng’ɔ ti kpa nin ng’ɔ ti tɛ’n niɔn.
4 Maan e wun like ng’ɔ ti su’n.Maan e bɔbɔ e afiɛn wa’n e kle sa ng’ɔ ti kpa’n.
5 Afin Zɔbu seli kɛ: ‘Min ndɛ yo fɛ,+sanngɛ Ɲanmiɛn buli min lufle.+
6 ?Wafa ng’ɔ fata kɛ be di min jɔlɛ’n, ń búa su ato?Min kannin’n leman ayre, kusu nn m’an yoman sa tɛ fi.’+
7 ?Sran benin yɛ ɔ ti kɛ Zɔbu sam’ɔ klo i wun finfin yolɛ kɛ nzue yɛ ɔ su nɔn sa-ɔ?
8 Ɔ nin sa tɛ yofuɛ mun yɛ be san nun-ɔn,yɛ ɔ nin klunwifuɛ mun yɛ be nanti-ɔ.+
9 Afin ɔ seli kɛ: ‘Sran ng’ɔ miɛn i ɲin naan Ɲanmiɛn i klun jɔ i wun’n,ɔ ɲanman nun like fi.’+
10 I sɔ’n ti’n, amun mɔ amun wun sa wlɛ’n,* amun sie amun su:Ɲanmiɛn Kpli kwlá yoman klunwi sa mlɔnmlɔn,+Sran m’ɔ Kwla Like Kwlaa Yo’n ɔ kwlá yoman sa tɛ le.+
11 Afin like nga sran kun yo’n i nuan su like yɛ ɔ fa tuɛ i kalɛ-ɔ,+yɛ sran kun i bɔbɔ i ayeliɛ’n i sin sa’n yɛ ɔ fa yi i su-ɔ.
12 Ɲanmiɛn yoman klunwi sa le.+Sran m’ɔ Kwla Like Kwlaa Yo’n ɔ diman ndɛ kwlɛ.+
13 ?Wan yɛ ɔ fali asiɛ’n wlɛli i sa nun-ɔn??Wan yɛ ɔ fɛ i sieli mɛn wunmuan’n* su-ɔ?
14 Sɛ ɔ fɛ i ɲin* sie be su’n,sɛ ɔ yi nguan’n nin aunmuan ng’ɔ o be nun’n fa kɔ i wun lɔ’n,+
15 sran’m be kwlaa bé ká lɛ bé wú kpɛ kunngba,yɛ klɔ sran’m bé sá be sin káci ndutre.+
16 I sɔ’n ti’n, sɛ a wun sa wlɛ’n, fa ɔ ɲin sie i ndɛ nga su.Sie ɔ su kpa tie ndɛ nga n su kan’n.
17 ?Ɔ fata kɛ sran ng’ɔ kloman sa ng’ɔ ti su’n, ɔ sie sran??Annzɛ á bú sran kun m’ɔ le kwlalɛ’n m’ɔ yo sa ng’ɔ ti kpa’n, i fɔ?
18 ?Á kó sé famiɛn kun kɛ: ‘A siman like fi yo’??Annzɛ á sé wlengbi’m be kɛ: ‘Amun klun yo wi’?+
19 Sran kun o lɛ’n, ɔ buman sran dandan’m be sran traman sran onga mun,yɛ ɔ buman aɲanbeunfuɛ’m be kpa traman yalɛfuɛ mun,*+afin be kwlaa be ti i sa nuan like.+
20 Kɔnguɛ afiɛn’n,+ be wu sa puɛɛ.+Be wun usu be tututu kpɛkun b’a wu.Be tu be nga be le kwlalɛ bɔbɔ’n, sanngɛ i sɔ’n finman klɔ sran.+
21 Afin Ɲanmiɛn i ɲinma ta sran kun i ayeliɛ’n,+ɔ wun ajalɛ kwlaa ng’ɔ tu’n.
22 Aosin’n annzɛ lika m’ɔ lu tritri’nmɔ sa tɛ yofuɛ’m be kwla fia nun’n, i wie fi nunman lɛ.+
23 Afin Ɲanmiɛn w’a sieman blɛ kun w’a manman sran fi naan sɛ i sɔ blɛ liɛ’n ju’n,ɔ wɔ i ɲrun lɔ naan ɔ di i jɔlɛ.
24 Ɔ usausaman lele naan w’a bubu be nga be le kwlalɛ’n be nun,yɛ ɔ fa sran uflɛ sie be osu.+
25 Afin ɔ si sa nga be yo’n.+Ɔ yi be ase kɔnguɛ, kpɛkun b’a kpɔtɔ.+
26 Be klunwi’n ti’n, ɔ yo be like yayasran’m be kwlaa beɲrun lɛ,+
27 Afin b’a sumɛn i su kun,+yɛ be bumɛn i ajalɛ’m be like fi.+
28 Be dunman nun ti’n, yalɛfuɛ’m be sun flɛ i.Ɔ maan ɔ ti sran ng’ɔ leman sran’n i kpanlɛ’n.+
29 ?Kɛ Ɲanmiɛn tran bliin’n, wan yɛ ɔ kwla bu i fɔ-ɔ??Kɛ ɔ kɛtɛ i ɲrun’n, wan yɛ ɔ kwla wun i-ɔ?I nvle-o, i sran-o, be agualiɛ’n ti kun.
30 Ɔ kloman kɛ sran nga i ndɛ nunman Ɲanmiɛn ndɛ nun’n* ɔ sie sran mun,+annzɛ ɔ sua be wun aya.
31 ?Afin sran kun kó sé Ɲanmiɛn kɛ:‘B’a tu min fɔ, kusu nn m’an yoman sa fi,+
32 like nga m’an wunmɛn i’n, kle min,sɛ n yoli sa tɛ wie’n, n su yomɛn i kun’?
33 ?Ɔ fata kɛ ɔ yo wɔ mo, kɛ nga ɔ bɔbɔ a fa kan’n sa, kusu nn a kpalo jɔlɛ ng’ɔ di’n?Wɔ yɛ ɔ fata kɛ a fa ajalɛ kun-ɔn, nán min-ɔn.Like kpa nga a si i’n kan maan n ti.
34 Sran nga be wun sa wlɛ’n,*ngwlɛlɛfuɛ nga be ti min ndɛ’n, bé sé min kɛ:
35 ‘Zɔbu kan ndɛ, kusu nn ɔ siman like fi,+i ndɛ’m be timan ngwlɛlɛ ndɛ.’
36 Maan be sa Zɔbu lelele be nian,*afin ɔ tɛ ndɛ’m be su kɛ klunwifuɛ’m be liɛ’n sa.
37 Ɔ yo ɲin kekle fa ukɛ i sa tɛ’n su ekun.+Ɔ bo ndɛ gua e wun naan ɔ́ yó e finfin,yɛ w’a kan Ɲanmiɛn Kpli i wun ndɛ sa lelele.+
Ja ngua lɔ ndɛ mun
^ Ebr., “lalolalo’n.”
^ Ebr., “amun le awlɛn’n.”
^ Annzɛ, “asiɛ mɔ be tran su’n.”
^ Ebr., “i awlɛn.”
^ Annzɛ “wlengbifuɛ’m be kpa traman sran nga be leman ɲrun’n.”
^ Annzɛ “sran ng’ɔ nin Ɲanmiɛn b’a bu’n.”
^ Ebr., “le awlɛn’n.”
^ Be kwla se ekun kɛ “Min si, maan be sa Zɔbu be nian.”
