Zɔbu 27:1-23

  • Zɔbu fuali kpa kɛ ɔ́ nánti seiin titi (1-23)

    • “N su yaciman seiin nantilɛ le” (5)

    • Sran nga i ndɛ nunman Ɲanmiɛn ndɛ nun’n ɔ leman like m’ɔ́ fɛ́ i wla gúa su-ɔ (8)

    • ‘?Ngue ti yɛ ndɛ ngbɛnngbɛn ngunmin yɛ amun kan-ɔn?’ (12)

    • Klunwifuɛ’n ɲanman like fi (13-23)

27  Zɔbu guɛli i ndɛ’n* su ekun. Ɔ seli kɛ:  2  “N kan Ɲanmiɛn m’ɔ lafiman’n m’ɔ buli min lufle’n,+n kan Sran m’ɔ Kwla Like Kwlaa Yo’n m’ɔ lafiman’n, i m’ɔ wlali min klunngbɔ,+  3  sɛ n te lo wunmiɛnnaan Ɲanmiɛn i wawɛ’n te o min bue’n nun’n,+  4  ndɛ ng’ɔ timan su’n, ɔ su finman min nuan nun fiteman.Gblɛ ndɛ su finman min nuan nun fiteman.  5  N su seman le kɛ amun ti sran kpa.N su yaciman seiin nantilɛ le naan m’an fa wu.+  6  Ń yó sa i nuan su titi, n su yacimɛn i sɔ yolɛ.+Min awlɛn’n su buman min fɔ lele ń fá wú.*  7  Maan min kpɔfuɛ’m be agualiɛ’n yo kɛ klunwifuɛ’m be liɛ’n sa,maan be nga be fa be ɲin ci min’n be agualiɛ’n yo kɛ sran tɛ’m be liɛ’n sa.  8  ?Afin sran nga i ndɛ nunman Ɲanmiɛn ndɛ nun’n,* kɛ Ɲanmiɛn ko yi nguan ng’ɔ o i nun’n,m’ɔ ko nunnun’n, ngue su yɛ ɔ kwla fɛ i wla’n gua-ɔ?+  9  ?Kɛ i wla’n wá bó i wun’n,Ɲanmiɛn tí i kpanlɛ’n?+ 10  ?Sran m’ɔ Kwla Like Kwlaa Yo’n i wun yó sran sɔ’n i fɛ??Ɔ́ kpán flɛ́ Ɲanmiɛn blɛ kwlaa nun? 11  Ń má kán Ɲanmiɛn i tinmin’n i su ndɛ ń klé amun.*N su faman Sran m’ɔ Kwla Like Kwlaa Yo’n i su ndɛ wie fi n fiaman amun wun. 12  ?Sɛ amun kwlakwla amun wunnin aolia nun like’n,ngue ti yɛ ndɛ ngbɛnngbɛn ngunmin yɛ amun kan kle min-ɔn? 13  Like nga Ɲanmiɛn w’a fa sie klunwifuɛ’n yɛ ɔ o lɛ-ɔ,+aja like nga sran wlɛfuɛ’m be ɲɛn i Sran m’ɔ Kwla Like Kwlaa Yo’n i sa nun’n, yɛ ɔ o lɛ-ɔ. 14  Sɛ i mma’m be sɔn kpanngban kpa’n, tokofi’nkún be,+yɛ aliɛ nga i osu’n nunfuɛ’m bé ɲɛ́n i’n, ɔ su juman be. 15  I osu’n nunfuɛ nga be ka lɛ’n, tukpacɛ m’ɔ kun sran’n yɛ ɔ́ síe be-ɔ,be angbeti’m be su sunman be. 16  Sɛ ɔ tian sika nuan kɛ ndutre sa’n,naan ɔ tiantian tralɛ kpakpa’m be nuan kɛ ufa sa’n, 17  kannzɛ bɔbɔ ɔ tiantian be nuan’n,sanngɛ sran kpa’n yɛ ɔ́ wlá be-ɔ,+yɛ sran nga w’a yoman sa tɛ’n yɛ ɔ́ cɛ́cɛ́ i sika’n nun-ɔn. 18  Sua ng’ɔ kplan’n, ɔ́ sáci ndɛndɛ kɛ siwlisawla i sua’n sa,kɛ gladi difuɛ’n i kpata+ ng’ɔ boli’n sa. 19  Kɛ ɔ́ kó lá’n, ɔ ti aɲanbeunfuɛ, sanngɛ ɔ su ɲanman nun like fi.Kɛ́ ɔ́ tíke i ɲinma’n, like fi nunman lɛ. 20  Ɲrɛnnɛn’n fu i nun kɛ nzue dan wie m’ɔ su di lika’n sa.Kɔnguɛ’n, aunmuan dan kun fɛ i kɔ.+ 21  Aunmuan ng’ɔ fin wia afiliɛ lɔ’n fɛ́ i kɔ́, kpɛkun ɔ su tranman lɛ kun.Ɔ́ fɛ́ i kɔ́ lika uflɛ.+ 22  Ɔ́ tɔ́ i su, ɔ su simɛn i aunnvɔɛ.+Kɛ ɔ́ yó sɔ’n nn ɔ́ kplí kpa naan ɔ́ wánndi i wunmiɛn’n i ɲrun.+ 23  Ɔ bo i su ndɛ,ɔ kɛ i lika’n nun lɔ ɔ bo i su feliman.*+

Ja ngua lɔ ndɛ mun

^ Ebr., “ɲanndra’n.”
^ Annzɛ “min cɛn’m be wie fi nun.”
^ Annzɛ “sran ng’ɔ nin Ɲanmiɛn b’a bu’n.”
^ Be kwla se ekun kɛ “Ń má kán ndɛ ń klé wɔ Ɲanmiɛn fanngan nun.”
^ Be kwla se ekun kɛ “Be bo i su ndɛ yɛ be ka be lika’n nun lɔ be bo i su feliman.”

Copyrights for this publication