Zɔbu 4:1-21

  • Elifazi i ndɛ klikli’n (1-21)

    • Ɔ buman seiin mɔ Zɔbu nanti’n i like fi (7, 8)

    • Ɔ boli aolia nun sran kun i ndɛ’n su (12-17)

    • ‘Ɲanmiɛn lafimɛn i sufuɛ’m be su’ (18)

4  Yɛ Elifazi+ m’ɔ ti Temanfuɛ’n tɛli su kɛ:  2  “?Sɛ sran kun waan ɔ́ kán ndɛ klé wɔ’n, i wun flán wɔ?Afin e muan e nuan-ɔn, ɔ yoman ye.  3  Nanwlɛ, a tuli sran kpanngban fɔ,be nga be sa’n w’a glɔ’n, a wlali be fanngan.  4  Ndɛ nga a kan’n ti’n, sran ng’ɔ su tɔ’n, ɔ jaso,a wlali be nga be kwlá jranman be ja su’n, be fanngan.  5  Sanngɛ siɛn’n, i sɔ sa’n w’a ju ɔ su. Yɛ wɔ yɛ ɔ sa sin w’a bubu wɔ* yɛ.Sa w’a ɲan wɔ. Yɛ wɔ yɛ ɔ wla w’a bo ɔ wun yɛ.  6  ?Ɔ ɲin m’ɔ yi Ɲanmiɛn’n, nɛ́n i yɛ ɔ ti like mɔ a lafi su’n niɔn??Seiin mɔ a nanti’n,+ nɛ́n i yɛ a fa cici ɔ wla-ɔ?  7  Yaci, maan ɔ wla kpɛn ndɛ nga su: ?Sran ng’ɔ yoman sa tɛ’n, ɔ kpɛ co wu??W’a wun kɛ b’a kun sran ng’ɔ ti kpa’n le?  8  Nga m’an sie i nzɔliɛ’n, yɛle kɛ be nga be di sa tɛ’n i fie’n,*ɔ nin be nga be lua ɲrɛnnɛn’n, i su mma kunngba’n yɛ be ti-ɔ.  9  Kɛ Ɲanmiɛn fita be su’n, kpɛkun b’a nunnun.Kɛ ɔ yi i ya’n i nglo’n, kpɛkun b’a wu. 10  Asɔmɔli’n kpan, yɛ asɔmɔli ba’n i kɔnviabo’n klu.Sanngɛ asɔmɔli nga be yo sro’n,* be je’n bɔbɔ bubu. 11  Kɛ asɔmɔli kun ɲanman nnɛn diman’n, ɔ wu,kpɛkun asɔmɔli ba’m be bo sanndi. 12  Be kannin ndɛ kun kleli min nvialiɛ nun,be tuli min aswre. 13  Kɔnguɛ’n, n wunnin aolia nun ninnge wie mɔ be sanngannin min akunndan-ɔn.Blɛ sɔ’n nun mɔ lafilɛ’n fa sran mun’n, 14  n usuli sa tututu,srɛ dan kpa kunnin min.* 15  Aolia nun sran kun sinnin min ɲrun lɛ.Kpɛkun ayrɛ nzinma ka lɛ guali min wun. 16  Kpɛkun ɔ jrannin bi,sanngɛ m’an wunmɛn i wafa ng’ɔ ti’n i wlɛ.Like kun o min ɲin bo lɛ.Lika’n tɔli bliin, kpɛkun n tili sran kun i nɛn’n. I waan: 17  ‘?Klɔ sran m’ɔ kwla wu’n, ɔ kwla yo sa i nuan su sɛsɛ tra Ɲanmiɛn??Klɔ sran’n kwla yo sanwun trɛ i Yifuɛ’n?’ 18  Nian, ɔ lafimɛn i sufuɛ’m be su,i anzi mun* bɔbɔ’n, ɔ wun fɔ be wun. 19  Yɛ be nga be tran fa sua’m be nun’n,mɔ fa yɛ be fa wlali sua’n i bo ase’n,+be wɛtɛ i sɔfuɛ mun kɛ be fa wɛtɛ siwlisawla’n* sa. 20  Kɛ ɔ fɛ i nglɛmun lele nnɔsua’n, á nían-ɔn, b’a nunkun be sekeseke.B’a nunnun mlɔnmlɔnmlɔn, sran fi siemɛn i nzɔliɛ. 21  Be ti kɛ tannin sua kun mɔ b’a yi i ɲanman’n sa.Be siman ngwlɛlɛ, kpɛkun b’a wu.

Ja ngua lɔ ndɛ mun

^ Ebr., “w’a yo fakafaka.”
^ Annzɛ “be bu sa tɛ yolɛ’n i akunndan’n.”
^ Annzɛ “asɔmɔli gbanflɛn mɔ be kɔmin nun ndrɛ’n ti vɔɔ’n.”
^ Ebr., “min owie mun.”
^ Annzɛ “i ngaliɛ kanfuɛ mun.”
^ Kakaa kun-ɔn. Ɔ ti kɛ abɛbɛ sa, yɛ ɔ saci ninnge mun.

Copyrights for this publication