Zɔbu 8:1-22
8 Yɛ Bildadi+ m’ɔ ti Sua i osu’n nunfuɛ’n+ tɛli su kɛ:
2 “?Cɛn onin ko naan w’a yaci ndɛ kɛ ngalɛ sa’n i kanlɛ?+Ɔ nuan nun ndɛ’m be ti kɛ aunmuan dan kun m’ɔ su fita’n sa.
3 ?Ɲanmiɛn wá bú ndɛ kwlɛ??Annzɛ Sran m’ɔ Kwla Like Kwlaa Yo’n, ɔ́ wá kpɛ́ ndɛ ng’ɔ ti su’n i wun?
4 Kɔlɛ’n ɔ mma’m be yoli i sa wie.I sɔ’n ti yɛ ɔ yacili be lɛ be kleli be ɲrɛnnɛn-ɔn, ɲin kekle nga be yoli’n ti.*
5 Sanngɛ sɛ a fa ɔ wun wla Ɲanmiɛn sa nun’n,+naan a kpata Sran m’ɔ Kwla Like Kwlaa Yo’n kɛ ɔ si wɔ aunnvɔɛ’n,
6 yɛ sɛ a ti sanwun sakpasakpa naan a ti sran ndɛnmanfuɛ’n,+ɔ́ nían ɔ su,*kpɛkun ɔ́ fá ɔ síe i lika ng’ɔ fata kɛ a tran lɛ’n nun.
7 Yɛ kannzɛ a boli i bo kaan’n,sanngɛ ɔ ɲrun lɔ liɛ’n yó dan.+
8 Yaci, usa laa sran mun nian,ninnge nga be si’m be wunnin be’n, bu i akunndan nian.+
9 Afin anunman yɛ be wuli e-ɔ, yɛ e siman like fi,afin cɛn nga e di i asiɛ’n su’n ti kɛ fɔnvɔ sa.
10 ?Be su kleman ɔ like??Like nga be si i’n, be su kan kleman wɔ?*
11 ?Kan fɔkɔ nunman lɛ’n, papirisi’n* kwla fifi lɛ??Sɛ nzue nunman lɛ’n, ndɛma’n kwla bua?
12 Kɛ ɔ te yo nɔnman mɔ be nin-a kpɛman’n,ɔ́ wú kee ijre onga’m be ɲrun.
13 Be kwlaa nga be wla fi Ɲanmiɛn su’n, kɛ awieliɛ’n wie be sɔ-ɔ,*afin like nga sran nga i ɲin yiman Ɲanmiɛn’n,* ɔ lafi su’n ɔ́ kpí ase,
14 like ng’ɔ fɛ i wla gua su’n ti ngbɛnyɛ like ng’ɔ lafi su’n ti kɛ akɛndɛwa sua sa, i sacilɛ yoman ya.
15 Ɔ́ kísɛ i sua’n su, sanngɛ sua’n su kɛmɛn i osu’n nun lɛ.Ɔ́ kúnndɛ trɛ́ i kekle kpa, sanngɛ sua’n su cɛman.
16 Ɔ ti kɛ waka mɔnnɛnmɔnnɛn kun m’ɔ jin wia nun’n sa,yɛ w’a trɛ fie wunmuan’n nun.+
17 I olui’m be o yɔbuɛyɔbuɛ’m be nun, yɛ be to blabla nun.Ɔ kunndɛ sua kun yɔbuɛyɔbuɛ’m be nun.*
18 Sanngɛ kɛ bé wá tú i bo* lika ng’ɔ taka lɛ’n nun’n,lika sɔ’n wá sé kɛ ɔ simɛn i kun. Ɔ́ sé kɛ: ‘N nin-a wunman ɔ le.’+
19 Nian, kɛ ɔ́ wá núnnún kɛ ngalɛ’n sa.+Kpɛkun uflɛ wie’m bé fífí ndutre’n nun.
20 Ɲanmiɛn su yiman be nga be nanti seiin* titi’n be blo.Asa kusu’n, ɔ su ukaman* klunwifuɛ mun,
21 afin ɔ́ wá yó maan á srí lelele,yɛ aklunjɔɛ’n kún wɔ kpo ekun.
22 Ɲannzuɛn kún ɔ kpɔfuɛ mun,yɛ be su wunman klunwifuɛ’m be tannin sua’n kun.”
Ja ngua lɔ ndɛ mun
^ Ebr., “Ɔ fa be ɔli be ɲin kekle’n i sa nun.”
^ Annzɛ “ɔ dunman nun ti’n, ɔ́ tínnge.”
^ Ebr., “?Be su yiman ndɛ ng’ɔ o be awlɛn’n nun lɔ’n fiteman?”
^ Nian Ndɛ’m be bo tulɛ lika’n nun lɔ.
^ Ebr., “kɛ be atin’n ti sɔ-ɔ.”
^ Annzɛ “sran ng’ɔ nin Ɲanmiɛn b’a bu’n.”
^ Annzɛ “Ɔ nian sua kun mɔ yɔbuɛ yɛ be fa kplannin’n.”
^ Annzɛ “mɛ́n i gla.”
^ Annzɛ “be kwlá saciman be wun.”
^ Ebr., “traman be sa’n.”
