Zɔbu 32:1-22
32 I sɔ’n ti’n, yasua nsan sɔ’m b’a tɛman Zɔbu su kun, afin ɔ jrannin su kpa kɛ ɔ yo sa i nuan su sɛsɛsɛ.*+
2 Sanngɛ Barakɛli m’ɔ ti Bizi i osu’n nunfuɛ’n,+ m’ɔ fin Ramun awlobo’n nun’n i wa Elii fali ya dan kpa. Ɔ fali Zɔbu i wun ya dan kpa. Afin Zɔbu waan ɔ́ klé kɛ i bɔbɔ yo sa i nuan su sɛsɛ tra Ɲanmiɛn.+
3 Ɔ fali Zɔbu i janvuɛ nsan’m be wun ya dan kpa wie. Afin b’a kwlá tɛmɛn i su kɛ ɔ nin i fata’n sa, sanngɛ Ɲanmiɛn yɛ be buli i fɔ-ɔ.+
4 Kɛ mɔ be ti kpɛnngbɛn tra Elii’n ti’n, ɔ minndɛli naan w’a tɛ Zɔbu su.+
5 Kɛ Elii wunnin kɛ yasua nsan’m be leman ndɛ fi kɛnmɛn i kun’n, ɔ fali ya dan kpa.
6 Ɔ maan Barakɛli m’ɔ ti Bizi i osu’n nunfuɛ’n i wa Elii boli ijɔlɛ bo. Ɔ seli kɛ:“Bakan yɛle min*yɛ amun ti kpɛnngbɛn.+I sɔ’n ti yɛ n trali min awlɛn+mɔ m’an kanman sa nga n si i’n m’an kleman amun-ɔn. Afin min ɲin yi amun.
7 N seli min wun kɛ: ‘Maan kpɛnngbɛn’m* be ijɔ,yɛ maan be nga b’a di afuɛ kpanngban’n, be kle ngwlɛlɛ’n.’
8 Sanngɛ Ɲanmiɛn i wawɛ’n niɔn,Sran m’ɔ Kwla Like Kwlaa Yo’n i wunmiɛn ng’ɔ fa man sran mun naan b’a wun sa wlɛ’n niɔn.+
9 Nán sran kun i afuɛ’n i ngunmin* ti yɛ maan ɔ́ yó ngwlɛlɛfuɛ-ɔ,nán kpɛnngbɛn’m be ngunmin yɛ be wun sa ng’ɔ ti kpa’n i wlɛ-ɔ.+
10 I sɔ’n ti’n, min waan yoo: ‘Amun sie amun sunaan n kusu n kan sa nga n si i’n n kle amun.’
11 Kɛ amún kán amun ndɛ’n, n tran minndɛli.Kɛ amún yíyí amun ndɛ’n nun’n, n sieli min su kpa,+kɛ ɔ́ yó sɔ’n, nn amún bú ndɛ nga amun waan amún kán’n i akunndan.+
12 N sieli min su amun nuan bo kpa,sanngɛ amun nun wie fi w’a kwlá kleman Zɔbu kɛ i ndɛ yoman fɛ*yɛ amun a kwlá tɛmɛn i su kɛ ɔ nin i fata’n sa.
13 Ɔ maan nán amun se kɛ: ‘Y’a wun ngwlɛlɛ’n.Ɲanmiɛn yɛ ɔ nin i be su kan-ɔn, nán sran-ɔn.’
14 W’a kanman ndɛ w’a wɔman min,ɔ maan nán amun ndɛ liɛ’n yɛ ń fá tɛ́ i su-ɔ.
15 Be gua bliin, be tɛman su kun.Be leman ndɛ fi be kɛnmɛn i kun.
16 M’an tran m’an minndɛ lele, sanngɛ be kanman ndɛ kun.Be o lɛ sa, be tɛman su kun.
17 N kusu n su wa tɛ su wie.Ń má kán like nga n si i’n i ndɛ,
18 afin ndɛ kpanngban kpa o min klun.Ɲanmiɛn wawɛ m’ɔ o min su’n yɛ ɔ su min bo-ɔ.
19 Min klun lɔ ninnge’m b’a yo kɛ duvɛn mɔ be kɛtɛli i ti kpan’n sa,b’a yo kɛ kplo uflɛuflɛ mɔ duvɛn o nun mɔ be su wa kpuke’n sa.+
20 Maan n ijɔ naan min wun sanndi min.Ń úke min nuan kpɛkun ń tɛ́ su.
21 N su buman sran wie kpa traman wie.+N su faman min nuan nun fɛ n lakaman* sran fi,
22 Afin n siman sran lakalaka.Sɛ n yo sɔ bɔbɔ’n, min Yifuɛ’n kún min ndɛndɛ kpa.
Ja ngua lɔ ndɛ mun
^ Annzɛ “afin i bɔbɔ ɲrun’n, ɔ yo sa i nuan su.”
^ Ebr., “Min cɛn’m be ti kaan sa.”
^ Ebr., “cɛn mun.”
^ Annzɛ “cɛn kpanngban ngunmin.”
^ Annzɛ “w’a kwlá tuman Zɔbu i fɔ.”
^ Annzɛ “N su faman manmanlɛ dunman n flɛman.”
