Zɔbu 15:1-35
15 Elifazi+ m’ɔ ti Temanfuɛ’n tɛli su kɛ:
2 “?Ngwlɛlɛfuɛ’n kán ndɛ ngbɛnngbɛn fá tɛ́ sran su??Annzɛ ɔ́ mɛ́n aunmuan ng’ɔ fin wia afiliɛ lɔ’n lele i ku’n yí?
3 Ndɛ ngbɛn nga be kan fa tu sran fɔ’n ɔ timan like fi,yɛ ijɔlɛ ngunmin mɔ be ijɔ’n yoman sa fi ye.
4 Afin a yo maan sran’m be sroman Ɲanmiɛn kun,yɛ a yo maan Ɲanmiɛn i ndɛ loman be kun.
5 Afin ɔ sa tɛ’n ti yɛ a ijɔ kɛ nga sa-ɔ,yɛ gblɛ ndɛ mun yɛ a kpa be kan-ɔn.
6 Ɔ bɔbɔ ɔ nuan’n yɛ ɔ bu ɔ fɔ-ɔ, nán min-ɔn.Ndɛ nga ɔ bɔbɔ a kan’n, ɔ kle kɛ a yoli sa tɛ.+
7 ?Wɔ yɛ a ti sran klikli nga be wuli i’n niɔn??Annzɛ be wuli ɔ naan b’a yi oka mun?
8 ?A sie ɔ su tie ndɛ nga Ɲanmiɛn kɛn i nvialiɛ nun’n??Annzɛ a bu i kɛ ɔ kunngba yɛ a si ngwlɛlɛ-ɔ?
9 ?Ngue cɛ yɛ a si i mɔ e simɛn i wie-ɔ?+?Ngue cɛ yɛ a wun i wlɛ mɔ e wunmɛn i wlɛ wie-ɔ?
10 Be nga be ti w’a bo je’n nin kpɛnngbɛn’m be o e nun,+I sɔfuɛ’m be kpɛnngbɛn tra ɔ si lelele.
11 ?Fɔnvɔlɛ nga Ɲanmiɛn fɔnvɔ sran’n, ɔ juman wɔ??Yɛ ndɛ ng’ɔ kɛn i amanniɛn su kle wɔ’n nin?
12 ?Ngue ti yɛ ɔ awlɛn’n ɔ mlin wɔ-ɔ??Yɛ ngue ti yɛ ɔ ɲinma’m b’a sɔ kɛ sran mɔ w’a fa ya’n sa-ɔ?
13 Afin w’a fa Ɲanmiɛn bɔbɔ i wun ya,yɛ a yaci ndɛ kɛ ngalɛ’n sa’n nun ɔ fin ɔ nuan fite.
14 ?Wan yɛle klɔ sran mɔ i ti yɛ ɔ́ kó yó sanwun-ɔn??Annzɛ wan yɛle sran mɔ bla yɛ ɔ wuli i’n, mɔ i ti yɛ ɔ́ kó yó sran kpa-ɔ?+
15 Nian! Ɔ lafimɛn i anzi’m be su,yɛ ɲanmiɛn m’ɔ la nglo lɔ plaii bɔbɔ’n ɔ timan sanwun i ɲrun.+
16 Yɛ ɔ waan sran mɔ i wun yo tɛ’n, mɔ w’a saci’n,+sran m’ɔ yo sa tɛ’n kɛ nzue yɛ ɔ su nɔn’n sa’n.
17 Ń má bó sa wie su ń klé wɔ. Sie ɔ su min nuan bo!Ń má kán like nga n wunnin i’n i ndɛ ń klé wɔ,
18 be nga be si ngwlɛlɛ’n, be si mun yɛ be kan kleli be-ɔ,+yɛ be kusu b’a fiaman su.
19 Be ngunmin yɛ be fali mɛn’n wlali be sa nun-ɔn,yɛ aofuɛ fi w’a sinman be afiɛn.
20 Klunwifuɛ’n ɔ wun i ɲrun cɛn kwlakwla,sran ng’ɔ miɛn i wiengu kplɔlɔlɔ’n, ɔ wun i ɲrun afuɛ kwlakwla.
21 Ndɛ nga be guɛ i su’n nun’n ti’n, ɔ usu sa tututu.+Kɛ lika’n ti fɔun’n, awiefuɛ’m be tɔ i su.
22 Ɔ bumɛn i kɛ ɔ́ fín aosin’n nun fíte.+Ɔ ti tokofi’n i liɛ.
23 Ɔ wlan sa daan kunndɛ aliɛ.* ?Ɔ́ ɲán wie nin?Ɔ si kpa kɛ aosin cɛn’n w’a mantan koko.
24 Awlabɔɛ’n nin ngokɔɛ’n ti’n, i klun yacimɛn i titilɛ.Be tɔ i su kɛ famiɛn wie yɛ ɔ su fa alɛ wlɛ i kpɔfuɛ’m be sin sa.
25 Ɔ mɛn i sa’n su kle kɛ w’a jaso Ɲanmiɛn bɔbɔ i wun,Yɛ ɔ kunndɛ kɛ ɔ́ yó ɲin kekle Sran m’ɔ Kwla Like Kwlaa Yo’n i su.*
26 Ɲin kekle m’ɔ yo’n ti’n, ɔ tu tɔ Ɲanmiɛn su,ɔ nin i sa nun ɲrɛn gbugblugbu m’ɔ yo nɔnnin kpa’n.
27 I ɲrun’n ti lui ngunmin,yɛ i afiɛn’n ti lui ngunmin.
28 Klɔ ng’ɔ tran be su’n, bé wá búbú be,yɛ sua ng’ɔ tran be nun’n, sran fi su tranman be nun kun,bé káci yɔbuɛ kwle.
29 Ɔ su ɲɛnmɛn i wun, yɛ ɔ su tianman aɲanbeun ninnge’m be nuan,i ninnge kpakpa’m be kusu be su truman mɛn’n nun.
30 Ɔ su finman aosin’n nun fiteman.Ɔ́ yó kɛ waka’n i wun ng’ɔ fɛfɛli* mɔ sin w’a yrɛ i’n sa.Yɛ aunmuan ng’ɔ fin Ɲanmiɛn* nuan’n nun’n ti’n, ɔ su tranman lɛ kun.+
31 Ɔ fataman kɛ ɔ mlin, yɛ ɔ lafi finfin ninnge’m be su,afin like ng’ɔ́ ɲɛ́n i nun’n, ɔ́ yó ngbɛn.
32 Sa sɔ’n wá jú kwlaa naan i cɛn’n w’a ju,yɛ i sama’m be sufɛfɛman le.+
33 Ɔ́ yó kɛ viɲin waka m’ɔ kpɔngbɔ i mma nga be nin-a bloman’n gua’n sa,kɛ olivie waka m’ɔ kpukpu i nɲrɛ mun gua’n sa.
34 Be nga be ndɛ nunman Ɲanmiɛn i ndɛ nun’n* be akpasua’n ti ngbɛn,+yɛ be nga be sɔ adi ninnge’m be nun’n, sin’n wá dí be tannin sua mun.
35 Be wunnzɛ ɲrɛnnɛn’n, kpɛkun ba nga be wu i’n, yɛle klunwi’n,yɛ sran lakalɛ ngunmin yɛ ɔ o be ku sɛ’n nun-ɔn.”
