Job 42:1-17
42 Katapos, hi Job binaton kan Jehova:
2 “Yana maaram na ako nga mahihimo mo an ngatanan nga butang
Ngan waray bisan ano nga imo ginhuhunahuna nga buhaton nga imposible para ha imo.+
3 Nagsiring ka, ‘Hin-o ini nga nagtatabon han akon katuyoan pinaagi han pagyakan nga waray kahibaro?’+
Salit nagyakan ako, pero diri ko nasasabtanAn mga butang nga urusahon gud para ha akon, nga diri ko hinbabaroan.+
4 Nagsiring ka, ‘Alayon pamati, ngan magyayakan ako.
Papakianhan ko ikaw, ngan sumati ako.’+
5 An akon mga talinga nakabati mahitungod ha imo,Pero yana an akon mga mata nakita gud ha imo.
6 Ito an hinungdan nga ginbabawi ko an akon ginsiring,+Ngan nagbabasol ako nga nalingkod ha tapotapo ngan abo.”+
7 Katapos ni Jehova makiistorya kan Job, hi Jehova nagsiring kan Elipaz nga Temanita:
“An akon kasina naglalaga kontra ha imo ngan ha imo duha nga kaupod,+ kay waray niyo iyakan an tinuod mahitungod ha akon+ sugad han ginbuhat han akon surugoon nga hi Job.
8 Yana pagdara kamo hin pito nga todo nga baka ngan pito nga karnero nga lalakí ngan pakadto ha akon surugoon nga hi Job, ngan paghalad para ha iyo kalugaringon hin halad nga sinunog. Ngan an akon surugoon nga hi Job mag-aampo para ha iyo.+ Sigurado nga kakarawaton ko an iya hangyo nga* diri kamo trataron uyon ha iyo kalurongan, kay waray niyo iyakan an tinuod mahitungod ha akon sugad han ginbuhat han akon surugoon nga hi Job.”
9 Salit hi Elipaz nga Temanita, hi Bildad nga Shuhita, ngan hi Zopar nga Naamatita kinadto ngan ginbuhat an iginsugo ni Jehova ha ira. Ngan ginkarawat ni Jehova an pag-ampo ni Job.
10 Katapos mag-ampo ni Job para ha iya mga kaupod,+ ginkuha ni Jehova an kasakitan ni Job+ ngan iginbalik an iya kahuraan.* Gintagan hiya ni Jehova hin doble nga kadamu han iya mga panag-iya hadto.+
11 An ngatanan niya nga bugto nga lalaki ngan mga bugto nga babaye ngan an ngatanan niya nga sangkay hadto+ kinadto ha iya ngan nangaon kaupod niya ha iya balay. Nakisimpatiya hira ha iya ngan ginliaw hiya tungod han ngatanan nga trahedya nga igintugot ni Jehova nga mahitabo ha iya. An tagsa ha ira naghatag ha iya hin kwarta ngan hin bulawan nga singsing.
12 Salit ginbendisyonan ni Jehova an urhi nga bahin han kinabuhi ni Job hin labaw pa kay han una,+ ngan hi Job nagkaada 14,000 nga karnero, 6,000 nga kamelyo, 1,000 ka padis nga baka, ngan 1,000 nga asno nga babayé.+
13 Ngan nagkaada utro hiya hin pito nga anak nga lalaki ngan tulo nga anak nga babaye.+
14 Iya ginngaranan an suhag nga anak nga babaye hin Jemima, an ikaduha hin Kezia, ngan an ikatulo hin Keren-hapuc.
15 Ha bug-os nga tuna waray kababayin-an nga sugad kahusay han mga anak ni Job, ngan gintagan hira han ira tatay hin panurundon pariho han ira mga bugto nga lalaki.
16 Katapos hini nabuhi hi Job hin 140 ka tuig, ngan nakita niya an iya mga anak ngan an iya mga apo—upat ka henerasyon.
17 Ha urhi namatay hi Job katapos han hilawig ngan kontento nga pagkinabuhi.*
