Job 33:1-33
33 “Kondi yana, Job, alayon pamati ha akon mga pulong;Pamati ha ngatanan ko nga isisiring.
2 Alayon kitaa! Kinahanglan ko ibuka an akon baba;Kinahanglan magyakan an akon dila.*
3 An akon mga pulong nagpapahayag han pagin tangkod han akon kasingkasing,+Ngan an akon mga im-im sinsero nga nagsusumat han akon hinbabaroan.
4 An espiritu mismo han Dios an naghimo ha akon,+Ngan an gininhawa mismo han Makagarahum-ha-ngatanan an naghatag ha akon hin kinabuhi.+
5 Batona ako kon makakahimo ka;Ipresenta an imo mga argumento ha akon atubangan; pag-andam ha pagdepensa.
6 Kitaa! Ha atubangan han tinuod nga Dios pariho la ako ha imo;Ginporma liwat ako tikang ha lapok.+
7 Salit diri ka sadang mahadlok ha akon,O madugmok han kabug-at han akon mga pulong.
8 Kondi nagsiring ka ha akon atubangan,Oo, padayon ko nga nababatian ini nga mga pulong,
9 ‘Putli ako ngan waray pagtalapas;+Malimpyo ako ngan waray sayop.+
10 Kondi an Dios nakakaagi hin mga rason ha pagkontra ha akon;Gintatagad niya ako nga iya kaaway.+
11 Iya iginbubutang an akon mga tiil ha pandugan;Iya gin-uusisa an ngatanan ko nga dalan.’+
12 Kondi diri ka husto ha pagsiring hini, salit babatunon ko ikaw:
An Dios mas harangdon gud kay ha mortal nga tawo.+
13 Kay ano nga nagrireklamo ka kontra ha Iya?+
Tungod ba kay waray hiya bumaton ha ngatanan mo nga ginsiring?+
14 Kay an Dios nagyayakan hin makausa ngan hin makaduha,Kondi waray bisan usa nga namamati,
15 Ha usa nga inop, usa nga bisyon ha gab-i,+Ha panahon nga nangangaturog hin hilarom an mga tawo
Samtang nangangaturog hira ha ira mga higdaan.
16 Katapos, iya gin-aabrihan an ira mga talinga+Ngan iginpapasilsil* an iya instruksyon ha ira,
17 Basi ipahirayo an usa nga tawo tikang ha pagbuhat hin sayop+Ngan basi panalipdan an usa nga tawo tikang ha pagpahitaas.+
18 Gintatalwas han Dios an iya kalag* tikang ha buho,*+An iya kinabuhi tikang ha kamatay pinaagi han espada.*
19 An usa nga tawo ginsasaway liwat pinaagi han kaul-ol dida ha iya higdaanNgan pinaagi han nagpapadayon nga kasakit han iya mga tul-an,
20 Salit an iya mismo pagkatawo* nahingangasuka ha tinapay,Ngan nadiri gud hiya* bisan han makaruruyag nga pagkaon.+
21 An iya unod nagtitikanipis ngan diri na nakikita,Ngan an iya mga tul-an nga diri nakikita hadto nautwal na yana.*
22 An iya kalag* nagtitikahirani ha buho;*An iya kinabuhi nagtitikahirani ha mga nanmamatay.
23 Kon may mensahero* para ha iya,Usa nga paradepensa tikang ha usa ka yukot,Nga magsusumat ha tawo kon ano an matadong,
24 An Dios magpapakita ha iya hin kalooy ngan masiring,‘Talwasa hiya tikang ha kahingadto ha buho!*+
Nakaagi ako hin lukat!+
25 An iya unod magigin mas maopay* kay ha kanan bata;+Mabalik hiya ha mga adlaw han iya kusog sugad nga batan-on.’+
26 Manginginyupo hiya ha Dios,+ nga makarawat ha iya,Ngan makikita niya an Iya nawong nga may mga singgit han kalipay,Ngan ipapahiuli Niya an Iya pagkamatadong ngadto ha mortal nga tawo.
27 Ito nga tawo magpapahayag* ngadto ha mga tawo,‘Nakasala ako+ ngan ginbaliko ko kon ano an husto,Kondi waray ko makarawat an angay ha akon.*
28 Iya gintubos an akon kalag* tikang ha kahingadto ha buho,*+Ngan makikita han akon kinabuhi an kalamrag.’
29 Oo, ginbubuhat han Dios ini ngatanan nga butangHin makaduha, hin makatulo, para ha usa nga tawo,
30 Para ibalik hiya* tikang ha buho,*Basi mahayagan hiya han kalamrag han kinabuhi.+
31 Pamati hin maopay, Job! Pamati ha akon!
Pagpabilin nga hilom, ngan magpapadayon ako ha pagyakan.
32 Kon may isisiring ka, batona ako.
Pagyakan, kay karuyag ko pamatud-an nga husto ka.
33 Kon waray ka isisiring, kinahanglan mamati ka ha akon;Pagpabilin nga hilom, ngan tututdoan ko ikaw hin kinaadman.”
Mga footnote
^ Lit., “an akon dila pati an akon ngalangala.”
^ Lit., “ginsiselyohan.”
^ O “kinabuhi.”
^ O “lubnganan.”
^ O “pinaagi hin armas (pana).”
^ O “an iya kalag.”
^ Lit., “an iya kinabuhi.”
^ O “nakikita na.”
^ O “kinabuhi.”
^ O “lubnganan.”
^ O “anghel.”
^ O “lubnganan.”
^ O “mas mahimsog.”
^ Lit., “magkakanta.”
^ O posible nga “Ngan waray ito maghatag hin kapulsanan ha akon.”
^ O “kinabuhi.”
^ O “lubnganan.”
^ O “an iya kalag.”
^ O “lubnganan.”
