Job 17:1-16
17 “An akon kusog* naubos na, an akon mga adlaw natapos na;An lubnganan naghuhulat ha akon.+
2 Napapalibotan ako han mga nagmiminos ha akon,+Ngan an akon mata kinahanglan magkinita* ha ira rebelyoso nga panggawi.
3 Alayon karawata an akon garantiya, ngan tipigi ito dida ha imo.
May-ada pa ba makikiglamano ha akon ngan manunumpa para ha akon?+
4 Kay imo igintago tikang ha ira kasingkasing an pagsabot;+Amo nga diri mo hira ginpapasidunggan.
5 An usa nga tawo bangin manhatag ha iya kasangkayan,Pero nagsisirom an pangita han iya mga anak.
6 Ginpapahinabo Niya nga magin irinsultuhon* ako han mga katawohan,+Salit nagin usa ako nga tawo nga an nawong ira gintutuprahan.+
7 Tungod han duro nga kasakit an akon mga mata nahaharap,+Ngan an akon bug-os nga lawas magasa na gud.
8 An magtadong nga katawohan nagkikinita hini nga nahipapausa,Ngan an inosente nasusubo tungod han maraot nga tawo.*
9 An matadong marig-on nga nagpapadayon ha iya dalan,+Ngan an malimpyo an mga kamot mas nagtitikakusog.+
10 Pero kamo ngatanan mahimo kumadi ngan magpadayon ha pakigdiskusyon,Kay waray ako nakita nga bisan usa nga maaramon ha iyo.+
11 An akon mga adlaw natapos na;+An akon mga plano, an mga hingyap han akon kasingkasing, nahanaw na.+
12 Padayon nga ginhihimo nira nga gab-i an adlaw,Nga nasiring, ‘Sigurado nga hirani na an kalamrag kay masirom na.’
13 Kon maghulat ako, an Lubnganan* an akon magigin urukyan;+Ilalatag ko ha kasisidman an akon higdaan.+
14 Masiring ako ha buho,*+ ‘Ikaw an akon tatay!’
Ha ulod, ‘Akon nanay ngan akon bugto nga babaye!’
15 Kon sugad, hain an akon paglaom?+
Hin-o an makakakita hin paglaom para ha akon?
16 Mahingangadto ito* ha Lubnganan* nga trinangkahan an mga ganghaan
Kon kita ngatanan mahingadto na ha tapotapo.”+
