Job 10:1-22
10 “Sinusumhan na ako* ha akon kinabuhi.+
Magpapahungaw ako han akon mga reklamo.
Magyayakan ako kay nasasakit gud ako!*
2 Masiring ako ha Dios: ‘Ayaw ako ipahayag nga salaan.
Sumati ako kon kay ano nga nakikiglantugi ka ha akon.
3 Nagpapahimulos ka ba ha pagtalumpigos,Ha pagtamay ha buhat han imo mga kamot+
Samtang imo gin-uuyonan an sagdon han magraot?
4 May-ada ka ba tawhanon nga mga mata,*O an imo ba pagkita pariho han kanan mortal nga tawo?
5 An imo ba mga adlaw pariho han mga adlaw han mga mortal,O an imo ba mga tuig pariho han kanan tawo,+
6 Nga nangangalimbasog ka nga hiagian an akon sayop
Ngan nagpipinamiling ka han akon sala?+
7 Maaram ka nga waray ako sala;+Ngan waray bisan hin-o nga makakatalwas ha akon tikang ha imo kamot.+
8 An imo mismo mga kamot an nagporma ha akon ngan naghimo ha akon,+Pero yana imo ako bubungkagon hin bug-os.
9 Alayon hinumdumi nga imo ako ginhimo tikang ha lapok,+Pero yana imo ako ginpapabalik ha tapotapo.+
10 Diri ba iginhuwad mo ako pariho hin gatasNgan ginpabagtik ako pariho hin keso?
11 Imo ako ginsul-otan hin panit ngan unod,Ngan imo ako ginturugkop pinaagi hin mga tul-an ngan mga litid.+
12 Imo ako gintagan hin kinabuhi ngan hin maunungon nga gugma;Imo ginbantayan an akon espiritu* pinaagi han imo pagmangno.+
13 Kondi sekreto mo nga katuyoan nga buhaton ini nga mga butang.*
Maaram ako nga tikang ha imo ini nga mga butang.
14 Kon nakasala ako, nakita mo ito ngatanan,+Ngan diri mo ako iaabswelto ha akon sayop.
15 Kon salaan ako, kamakalolooy ko!
Ngan bisan kon inosente ako, diri ko naihahangad an akon ulo,+Kay puno ako hin kaarawdan ngan kasakitan.+
16 Kon ihangad ko an akon ulo, namimiling ka ha akon sugad hin leon+ basi dakpon ako,Ngan nagpapakita ka utro han imo gahum kontra ha akon.
17 Nagdadara ka hin bag-o nga mga testigo kontra ha akon
Ngan gindudugangan an imo kasina ha akon,Samtang an sunod-sunod nga mga kakurian naabot ha akon.
18 Salit kay ano nga igin-gawas mo ako tikang ha tagoangkan?+
Namatay na la unta ako antes pa may mata nga makakita ha akon.
19 Nagin sugad unta ito hin waray gud ako umeksister;Gindiretso na unta ako pagdara tikang ha tagoangkan ngadto ha lubnganan.’
20 Diri ba pipira la an akon mga adlaw?+ Pabay-an na la unta ako han Dios;Ilingiw unta niya an iya mga mata tikang ha akon, basi mag-opay-opay an akon pag-abat*+
21 Antes ako bumaya—ngan diri na ako mabalik+—Ngadto ha tuna nga duro gud an kasisidman,*+
22 Ngadto ha tuna nga madakmol an kasisidman,Usa nga tuna nga masirom gud ngan masamok,Nga didto bisan an kalamrag pariho han kasisidman.”
Mga footnote
^ O “Sinusumhan na an akon kalag.”
^ O “nga may mapait nga kalag!”
^ Lit., “unudnon nga mga mata.”
^ O “gininhawa; kinabuhi.”
^ Lit., “Ngan ini nga mga butang imo igintago ha imo kasingkasing.”
^ O “malipay ako hin gutiay.”
^ O “han kasisidman ngan han lambong han kamatayon.”
