Job 4:1-21
4 Katapos, hi Elipaz+ nga Temanita binaton:
2 “Kon may magsasari pakiistorya ha imo, mawawad-an ka ba hin pagpailob?
Kay hin-o ba an makakapugong ha iya kalugaringon ha pagyakan?
3 Oo, damu na an imo gintadong,Ngan hadto imo ginpapakusog an magluya nga mga kamot.
4 Ginbabangon han imo mga pulong an bisan hin-o nga nahipapakdol,Ngan imo ginpapakusog adton nanluluya an mga tuhod.
5 Pero yana nahitatabo ito ha imo, ngan nanluluya* ka;Inabot ito ha imo, ngan nahuhulop ka.
6 Diri ba nakakahatag ha imo hin pagsarig an imo hilarom nga respeto ha Dios?
Diri ba nakakahatag ha imo hin paglaom an imo paglakat nga may integridad?+
7 Alayon hinumdumi: May-ada na ba inosente nga tawo nga namatay?
May-ada na ba panahon nga ginbungkag an magtadong?
8 Sugad han akon nakita, an mga nag-aarado* hin karaotan
Ngan an mga nagsasabwag hin kasamok mag-aani liwat hito.
9 Pinaagi han gininhawa han Dios namamatay hira,Ngan pinaagi han pagbuto han iya kasina naabot an ira kataposan.
10 An leon nauwang, ngan an bata pa nga leon nangurob,Kondi bisan an mga ngipon han magkusog nga mga leon nagkakababari.
11 An usa nga leon namamatay kay waray nadadakop nga makakaon,Ngan an mga nati han usa nga leon nagpapatsarang.*
12 Yana usa nga pulong an sekreto nga gindara ha akon,Ngan usa nga huring hito an nakaabot ha akon talinga.
13 Ha nakakapabaraka nga mga panhunahuna durante han mga bisyon ha gab-i,Ha panahon nga hilarom an katurog han mga tawo,
14 Inabot ha akon an duro nga pangurog,Nga nagpuno hin kalisang ha akon mga tul-an.
15 May espiritu nga linabay ha akon atubangan;Nanindog an akon barahibo.
16 Katapos inundang* ito,Pero waray ko makilala an hitsura hito.
May-ada dagway ha atubangan han akon mga mata;Mamingaw an palibot, katapos may nabatian ako nga tingog:
17 ‘An mortal ba nga tawo mahimo magin mas matadong kay ha Dios?
An usa ba nga tawo mahimo magin mas limpyo kay ha naghimo mismo ha iya?’
18 Kitaa! Diri hiya natapod ha iya mga surugoon,Ngan namimiling hiya hin sayop ha iya mga anghel.*
19 Labi na gud ha mga naukoy* ha mga balay nga hinimo ha lapok,Nga an pundasyon aada ha tapotapo,+Ngan masayon madugmok pariho hin insekto!*
20 Buhi hira ha aga pero dugmok na ha pagsirom;Nahahanaw hira ha kadayonan, ngan waray bisan usa nga nakakapanginano.
21 Diri ba pariho hira hin tolda nga ginhulbotan hin higot?
Napatáy hira nga waray kinaadman.
