Isaia 39:1-8
-
Barongwa ba ba tswang kwa Babelona (1-8)
39 Ka nako eo, kgosi ya Babelona e bong Berodake-baladane morwa Baladane, o ne a romelela Hesekia+ makwalo le mpho ka gonne o ne a utlwile gore o ne a ntse a lwala mme jaanong o fodile.+
2 Hesekia o ne a amogela* barongwa bao ka boitumelo a bo a ba bontsha ntlo ya gagwe ya matlotlo:+ selefera, gauta, leokwane la balema le leokwane le lengwe le le tlhwatlhwakgolo, dibetsa tsa gagwe tsotlhe le sengwe le sengwe se se neng se le mo mabolokelamatlotlong a gagwe. Go ne go se na sepe se Hesekia a neng a sa se ba bontsha mo ntlong ya gagwe* le mo pusong yotlhe ya gagwe.
3 Morago ga moo, moporofeti Isaia o ne a tla kwa go Kgosi Hesekia mme a mmotsa jaana: “Banna bano ba go reile ba reng, mme ba ne ba tswa kae?” Ka jalo, Hesekia o ne a re: “Ba ne ba tswa kwa lefatsheng le le kgakala, kwa Babelona.”+
4 Go tswa foo, o ne a mmotsa jaana: “Ba bone eng mo ntlong ya gago?”* Hesekia o ne a araba a re: “Ba bone sengwe le sengwe se se mo ntlong ya me.* Ga go na sepe se ke sa se ba bontshang mo mabolokelamatlotlong a me.”
5 Jaanong Isaia o ne a raya Hesekia a re: “Utlwa lefoko la ga Jehofa wa masomosomo,
6 ‘Metlha e etla, mme sengwe le sengwe se se mo ntlong ya gago* le sotlhe se borragomogolo ba se bolokileng go tla go fitlha mo letsatsing leno se tla isiwa kwa Babelona. Ga go na sepe se se tla tlogelwang,’+ go bua Jehofa.+
7 ‘E bile bangwe ba bomorwao ba o tla nnang rraabone ba tla tsewa mme ba tla nna badiredibagolo mo ntlong ya segosi ya kgosi ya Babelona.’”+
8 Foo Hesekia o ne a raya Isaia a re: “Lefoko la ga Jehofa le o le buileng le molemo.” Go tswa foo, gape o ne a re: “Ka gonne go tla nna le kagiso le boiketlo* fa ke sa ntse ke tshela.”*+
