Isaia 23:1-18
-
Molaetsa wa go atlholwa ga Ture (1-18)
23 Molaetsa wa go atlholwa ga Ture:+
Bokolelang, lona dikepe tsa Tareshishe!+
Gonne lefelo le dikepe di emang mo go lone le sentswe; ga go ka ke ga tsenwa mo go lone.
Seno se senotswe go tswa kwa lefatsheng la Kitime.+
2 Didimalang, lona batho ba ba agileng fa losing lwa lewatle.
Bagwebi ba Sidona+ ba ba kgabaganyang lewatle ba tletse mo go wena.
3 Korong* ya Shihore* e ne e tsamaisiwa mo metsing a mantsi,+E leng thobo ya Nile, e e mo tlisetsang lotseno,E e tlisang poelo ya ditšhaba.+
4 Tlhajwa ke ditlhong, wena Sidona, wena kago e e thata ya lewatle,Ka gonne lewatle le rile:
“Ga ke ise nke ke nne le ditlhabi tsa pelegi, e bile ga ke ise nke ke belege,Le gone ga ke ise nke ke godise basimane kgotsa basetsana.”*+
5 Batho ba tla tshoga ka ntlha ya pego e e amanang le Ture+Fela jaaka fa ba ne ba utlwa pego e e amanang le Egepeto.+
6 Kgabaganyetsang kwa Tareshishe!
Bokolelang, lona batho ba ba agileng fa losing lwa lewatle!
7 A ono ke motse wa lona o o neng o itumetse go tswa bogologolong, go tloga tshimologong ya one?
Dinao tsa one di ne di tle di o ise kwa dinageng tse di kgakala gore o ye go nna gone.
8 Ke mang yo o dirileng tshwetso eno ya gore Ture e diragalelwe ke seno,E leng motse o o tlhomang dikgosi,O bagwebi ba one e neng e le dikgosana,O barekisi ba one ba neng ba tlotliwa mo lefatsheng lotlhe?+
9 Jehofa wa masomosomo o dirile tshwetso eno,Gore a fedise boikgogomoso jwa Ture ka ntlha ya bontle jotlhe jwa yone,Gore a tlontlolole botlhe ba ba neng ba tlotliwa go ralala lefatshe.+
10 Wena morwadia Tareshishe, kgabaganya lefatshe la gago jaaka Noka ya Nile.
Ga go tlhole go na le lefelo le dikepe di direlwang mo go lone.*+
11 Jehofa o otlolotse seatla sa gagwe mo godimo ga lewatle;O tshikintse magosi.
O laetse gore dikago tse di thata tsa Fonikia di fedisiwe.+
12 Mme a re: “Ga o kitla o tlhola o itumela,+Wena yo o gateletsweng, morwadia Sidona wa kgarebane.
Kgabaganyetsa kwa Kitime.+
Tota le gone koo ga o kitla o bona boikhutso.”
13 Bonang lefatshe la Bakaladia!+
Bakaladia ke bone ba ba neng ba dira gore diphologolo tsa naga di nne mo go ene, e seng Baasiria.+
Ke bone ba neng ba dira gore a nne lefelo la batho ba ba ratang go etela kwa sekakeng.
Ba emisitse dikara tsa ntwa tse e keteng ditora go dikologa motse;Ba thukuthile ditora tsa one tse di sireletsegileng,+Ba o dirile marope.
14 Bokolelang, lona dikepe tsa Tareshishe,Gonne kago ya lona e e thata e sentswe.+
15 Mo letsatsing leo, Ture o tla lebalwa ka dingwaga di le 70,+ e leng lobaka lwa botshelo* jwa kgosi e le nngwe. Kwa bokhutlong jwa dingwaga di le 70, Ture o tla diragalelwa ke se se tlhalosiwang mo pineng eno ya mogwebakammele:
16 “Tsaya harepa, o dikologe motse, wena mogwebakammele yo o lebetsweng.
Letsa harepa ya gago ka botswerere;Opela dipina tse dintsiGore ba tle ba go gopole.”
17 Kwa bokhutlong jwa dingwaga di le 70, Jehofa o tla gakologelwa Ture, mme Ture o tla boela kwa tuelong ya gagwe a bo a gweba ka mmele le magosi otlhe a lefatshe.
18 Le fa go ntse jalo, poelo ya gagwe le tuelo ya gagwe di tla nna sengwe se se boitshepo mo go Jehofa. Ga e kitla e bolokwa kgotsa e beelwa kwa thoko, ka gonne tuelo ya gagwe e tla nna ya batho ba ga Jehofa, gore ba tle ba je ba bo ba kgotsofale le gore ba apare diaparo tse dintle.+
Dintlha Tse di Kwa Tlase
^ Seheb., “Peo.”
^ Go tewa molapo o o tswang mo Nokeng ya Nile.
^ Seheb., “makgarebane.”
^ Kgotsa gongwe “lefelo le dikepe di emang mo go lone.”
^ Seheb., “malatsi.”
