Isaia 3:1-26
3 Gonne Morena wa boammaaruri, e bong Jehofa wa masomosomo,O tlosa mofuta mongwe le mongwe wa dilo tse Jerusalema le Juda di ikaegileng ka tsone,E leng metswedi yotlhe ya senkgwe le metsi,+
2 Monna yo o maatla le motlhabani,Moatlhodi le moporofeti,+ yo o dirang boitseanape le mogolwane,
3 Mookamedi wa ba ba 50,+ motlotlegi le mogakolodi,Mankge mo go direng maselamose le motshereanyi yo o setswerere.+
4 Ke tla dira gore basimane e nne dikgosana tsa bone,E bile ba tla busiwa ke batho ba ba nnang ba fetola megopolo ya bone.*
5 Batho ba tla gatelela ba bangwe,Mongwe le mongwe a gatelela yo mongwe.+
Mosimane o tla tlhasela monnamogolo,E bile yo o tseelwang kwa tlase o tla nyatsa yo o tlotlegang.+
6 Mongwe le mongwe o tla tshwara morwarraagwe mo ntlong ya ga rraagwe a bo a re:
“O na le seaparo sa ka fa ntle, ka jalo nna molaodi wa rona.
Okamela mokoa ono wa marope a a digilweng.”
7 Mme mo letsatsing leo o tla gana a re:
“Ga nkitla ke nna yo o hapang dintho tsa lona;*Ga ke na dijo kgotsa diaparo mo ntlong ya me.
Lo se ka lwa ntira molaodi wa batho.”
8 Gonne Jerusalema o kgopilwe,Le Juda o ole,Ka gonne ba tlhanogetse Jehofa ka mafoko le ka ditiro tsa bone;Ga ba itshware sentle fa pele ga matlho a gagwe a a galalelang.*+
9 Difatlhego tsa bone di a ba latofatsa,E bile ba bua fela ka boleo jwa bone jaaka baagi ba Sodoma;+Ga ba leke go bo fitlha.
Ruri go latlhega bone ka gonne ba itlisetsa masetlapelo!
10 Bolelelang basiami gore dilo di tla ba tsamaela sentle;Ba tla duelelwa se ba se dirang.*+
11 Ruri go latlhega motho yo o bosula!
O tla welwa ke masetlapelo,Gonne o tla dirwa se diatla tsa gagwe di se dirileng.
12 Fa e le batho ba me, baokamedi ba bone ba a kgokgontsha,*E bile ba busiwa ke basadi.
Batho ba me, baeteledipele ba lona ba dira gore lo kgarakgatshege,E bile ba tlhakatlhakanya ditselana tse lo tshwanetseng go tsamaya mo go tsone.+
13 Jehofa o ipaakanyetsa gore a ba sekise;O a ema gore a atlhole ditšhaba.
14 Jehofa o tla atlhola bagolwane le dikgosana tsa batho ba gagwe.
O ba raya a re, “Lo fisitse tshimo ya morara,*E bile se lo se utswileng mo bahumaneging se mo matlong a lona.”+
15 Gape Morena Molaodimogolo, Jehofa wa masomosomo a re,“Goreng lo thubaganya batho ba me e bile lo sila difatlhego tsa ba ba humanegileng mo loroleng?”+
16 Jehofa a re: “E re ka bomorwadia Siona ba le mabela,Ba tsamaya ba tsholeditse ditlhogo,*Ba leba ka tsela e e hepisang, ba a tlolatlola,E bile ba dira modumo ka maseka a bone a maoto fa a ntse a itaagana,
17 Jehofa le ene o tla dira gore tlhogo ya bomorwadia Siona e tlale magogo,E bile Jehofa o tla dira gore diphatla tsa bone di nne lefatla.+
18 Mo letsatsing leo Jehofa o tla tlosa bontle jwa maseka a bone,Mabanta a bone a tlhogo le mekgabisa ya bone e e bopegileng jaaka ngwedi,+
19 Manyena,* maseka le masire,
20 Dirwalo tsa tlhogo, maseka a a rwalwang mo maotong le mabanta a sehuba,*Mabotlolo a dinkgisamonate le dikgapetla tse di kgabisang,
21 Dipalamonwana le manyena a nko,
22 Diaparo tse ditelele tsa meletlo, diaparo tsa fa godimo, diaparo tsa ka fa ntle tse di se nang mabogo le dipatšhe,
23 Diipone+ le diaparo tsa letsela le le boleta,*Dituku le masire.
24 Mo boemong jwa leokwane la balema,+ ba tla nkga sebodu;Mo boemong jwa lebanta, ba tla ipofa ka mogala;Mo boemong jwa moriri o o kgabisitsweng bontle, ba tla nna lefatla;+Mo boemong jwa seaparo se se tlhwatlhwakgolo, ba tla apara seaparo se se dirilweng ka letsela la kgetsi;+E bile mo boemong jwa gore ba nne bantle, ba tla nna le letshwao la go baboga.
25 Banna ba Siona ba tla bolawa ka tšhaka,E bile banna ba gagwe ba ba maatla ba tla swela kwa tlhabanong.+
26 Dikgoro tsa gagwe di tla hutsafala di bo di utlwa botlhoko,+E bile o tla nna fa fatshe a kgakgabetse.”+
Dintlha Tse di Kwa Tlase
^ Kgotsa “ba ba sa ikanyegeng.”
^ Kgotsa “yo o lo alafang.”
^ Seheb., “mo matlhong a kgalalelo ya gagwe.”
^ Seheb., “Ba tla ja maungo a ditiro tsa bone.”
^ Kgotsa “bogisa; kgerisa.”
^ Kgotsa “diterebe; moretlwa.”
^ Seheb., “ba goleditse thamo (kgokgotso).”
^ Kgotsa “Mekgabisa e e lepelelang.”
^ Kgotsa “meitlamo ya lotheka.”
^ Kgotsa “diaparo tsa ka fa teng.”
