Isaia 30:1-33

  • Thuso ya Egepeto ga e na mosola (1-7)

  • Batho ba gana go reetsa boporofeti (8-14)

  • Batho ba nna le maatla fa ba tshepa Modimo (15-17)

  • Jehofa o utlwela batho ba gagwe botlhoko (18-26)

    • Jehofa ke Motlhatlheledi yo Mogolo (20)

    • “Tsela ke e” (21)

  • Jehofa o tla atlhola Asiria (27-33)

30  Jehofa a re, “Ruri go latlhega barwa ba ba tlhogoethata,+Ba ba diragatsang dithulaganyo tse e seng tsa me,+Ba ba dirang dikgolagano,* mme ba sa kaelwa ke moya wa me,E le gore ba oketse boleo ka boleo.   Ba ya kwa Egepeto+ ba sa mpotsa,*+Ba ya go batla tshireletsego kwa go Faro*E bile ba tshabela mo moriting wa Egepeto.   Le fa go ntse jalo, kago e e thata ya ga Faro e tla dira gore ba tlhabiwe ke ditlhong,Le moriti wa Egepeto o ba tshabetseng mo go one o tla dira gore ba tlontlologe.+   Gonne dikgosana tsa gagwe di kwa Soane,+E bile barongwa ba gagwe ba ile ba bo ba fitlha kwa Hanese.   Botlhe ba tla tlhabisiwa ditlhongKe batho ba ba ka se ba tsweleng mosola ka sepe,Ba ba ka se ba thuseng e bile ba ka se ba tswele mosola,Ba ba ba tlhabisang ditlhong le ba ba ba tlontlololang.”+  Molaetsa o o ka ga dibatana tse di kwa borwa: Ba ralala lefatshe la matshwenyego le la mathata,La tau, tau e e kurutlang,La noga ya lebolobolo le noga e e botlhole e e bonakoBa pegile dikhumo tsa bone mo mekwatleng ya ditonkiLe dilo tse ba itlamelang ka tsone ba di pegile mo diroteng tsa dikamela. Mme dilo tseno ga di kitla di solegela setšhaba sa bone molemo.   Gonne thuso ya Egepeto ga e na mosola gotlhelele.+ Ka jalo, yono ke ne ka mmitsa “Rahabe,+ yo o nnang fela a sa dire sepe.”   “Jaanong tsamaya, o kwale molaetsa oo mo sekwalelong ba go lebile,O bo o o kwale mo bukeng,+Gore o tle o dirisiwe mo nakong e e tlangE le bosupi jo bo nnelang ruri.+   Gonne ke batlhanogi,+ barwa ba ba tsietsang,+Barwa ba ba sa batleng go utlwa molao* wa ga Jehofa.+ 10  Ba raya baboni ba re, ‘Lo se ka lwa bona,’ E bile ba raya ba ba bonang diponatshegelo ba re, ‘Lo se ka lwa re bolelela diponatshegelo tse di boammaaruri.+ Re boleleleng dilo tse di forang;* bonang diponatshegelo tsa tsietso.+ 11  Fapogang mo tseleng; tswang mo tselaneng. Tlogelang go bua le rona ka Modimo yo o Boitshepo wa Iseraele.’”+ 12  Ka jalo, seno ke se Modimo yo o Boitshepo wa Iseraele a se buang: “E re ka lo gana lefoko leno+Mme lo ikanya boferefere le tsietsoE bile lo ikaega ka dilo tseno,+ 13  Jaanong ka ntlha ya molato wa lona, lo tshwana le lobota lo lo thubegileng,Jaaka lobota lo lo kwa godimo lo lo kokomogileng. Lo tla wa ka tshoganyetso, ka ponyo ya leitlho. 14  Lobota loo lo tla thubega jaaka nkgo e kgolo ya mmopi wa letsopa,Lo tla thubaganngwa gotlhelele mo go se kitlang go sala kapetla epe mo dikarolwaneng tse di thubagantswengGore go gogolwe molelo mo leisongKgotsa go gelelwe metsi mo mogobenyaneng* ka yone.” 15  Gonne seno ke se Morena Molaodimogolo Jehofa, Modimo yo o Boitshepo wa Iseraele a se buang: “Fa lo boela mo go nna lo bo lo ikhutsa, lo tla bolokwa;Fa lo nna lo ritibetse e bile lo ntshepa, lo tla nna le maatla.”+ Le fa go ntse jalo, lo ne lwa gana.+ 16  Go na le moo, lo ne lwa re: “Nnyaa, re tla tshaba re palame dipitse!” Eleruri lo tla tshaba. Gape lo ne lwa re: “E bile re tla palama dipitse tse di bofefo!”+ Mme ba ba lo lelekisang ba tla bo ba le bofefo.+ 17  Batho ba le sekete ba tla roroma ba boifa motho a le mongwe;+Lo tla tshaba lo boifa batho ba le batlhanoGo fitlha ba ba setseng ba lona ba nna jaaka pilara e le nngwe kwa godimo ga thaba,Le jaaka kota ya sesupo mo thoteng.+ 18  Le fa go ntse jalo, Jehofa o letile ka bopelotelele* gore a lo tlhomogele pelo,+Mme o tla go utlwela botlhoko.+ Gonne Jehofa ke Modimo wa tshiamiso.+ Go itumela botlhe ba ba nnang ba lebeletse* mo go ene.+ 19  Fa batho ba tla bo ba nna kwa Siona, kwa Jerusalema,+ le ka motlha ga lo kitla lo lela.+ Ruri o tla lo tlhomogela pelo fa a utlwa modumo wa selelo sa lona sa go kopa thuso; fela fa a o utlwa, o tla lo araba.+ 20  Le fa gone Jehofa a ka lo naya matshwenyego e le dijo tsa lona le kgatelelo e le dinô tsa lona,+ Motlhatlheledi wa lona yo Mogolo ga a kitla a tlhola a iphitlha, mme lo tla bona Motlhatlheledi wa lona yo Mogolo+ ka matlho a lona. 21  E bile fa go ka direga gore lo fapogele ka fa mojeng kgotsa ka fa molemeng,+ ditsebe tsa lona di tla utlwa lentswe kwa morago ga lona le re, “Tsela ke e.+ Tsamayang ka yone.” 22  Mme lo tla leswafatsa ditshwantsho tsa lona tse di betlilweng ka selefera le difikantswe tsa lona tse di bopilweng ka gauta.+ Lo tla di latlha jaaka letsela le le dirisiwang ke mosadi fa a le mo kgweding lo bo lo di raya lo re, “Tlogang fano!”*+ 23  Mme o tla nesetsa peo e lo e jalang pula,+ e bile dijalo tse di tlhogang mo mmung wa lona di tla bo di le dintsi gape di na le dikotla.*+ Mo letsatsing leo, diruiwa tsa gago di tla fula mo mafulong a a bulegileng.+ 24  Dikgomo le ditonki tse di lemang di tla ja furu e e lokilweng ka sorele, e e neng ya olosiwa ka garawe le ka foroko e e olosang bojang. 25  Mme go tla nna le melatswana le mesele ya metsi mo thabeng nngwe le nngwe e telele le mo thoteng nngwe le nngwe e e kwa godimo,+ mo letsatsing la polao e kgolo fa ditora di wa. 26  Mme lesedi la ngwedi yo o tletseng le tla nna jaaka lesedi la letsatsi; le lesedi la letsatsi le tla nna bogale go menagane ga supa,+ jaaka lesedi la malatsi a le supa, mo letsatsing la fa Jehofa a tla bo a hapa batho ba gagwe ba ba robegileng+ a bo a fodisa ntho e e botlhoko e e nnileng teng fa a ne a ba itaya.+ 27  Jehofa o e tla,O tla a tuka bogale e bile o tla ka maru a magolo. Molomo wa gagwe o tletse tšhakgalo,E bile loleme lwa gagwe lo tshwana le molelo o o lailang.+ 28  Moya* wa gagwe o tshwana le molatswana o o penologang o o fitlhang mo molaleng,Gore o tshikinye ditšhaba ka sêfê ya go senya;*E bile merafe e tla tsenngwa tomo mo ditlhaeng,+ tomo e e dirang gore e fapoge. 29  Mme pina ya lona e tla tshwana le pina e e opelwang bosigoFa lo baakanyetsa* moletlo,+E bile pelo ya lona e tla itumela jaaka mothoYo o tsamayang ka* fulutuA ya kwa thabeng ya ga Jehofa, kwa Lefikeng la Iseraele.+ 30  Jehofa o tla dira gore lentswe la gagwe le legolo+ le utlwiweE bile o tla senola lebogo la gagwe+ fa a ntse a le folosa a tuka bogale,+Ka kgabo ya molelo o o lailang,+Ka tumo ya maru+ le pula ya matlakadibe le sefako.+ 31  Asiria e tla welwa ke poifo ka ntlha ya lentswe la ga Jehofa;+O tla e itaya ka thobane.+ 32  Titeo nngwe le nngwe ya thobane ya ga JehofaE a tla otlhayang Asiria ka yone,E tla tsamaisana le meropana le diharepa+Fa a ntse a kgatikanya lebogo la gagwe a tlhabana le bone mo ntweng.+ 33  Gonne Tofethe*+ ya gagwe e setse e baakantswe;Gape e baakanyeditswe kgosi.+ O dirile gore mokoa wa dikgong o nne kwa godimo o bo o nne bophara,O na le molelo o montsi le dikgong tse dintsi. Mohemo wa ga Jehofa, o o tshwanang le molatswana wa sulefera,O tla o tlhosetsa ka molelo.

Dintlha Tse di Kwa Tlase

Seheb., “Ba ba tshelang senô,” go lebega go tewa go dira tumalano.
Kgotsa “ba sa botsa mo molomong wa me.”
Seheb., “kwa kagong e e thata ya ga Faro.”
Kgotsa “taelo.”
Seheb., “borethe.”
Kgotsa gongwe “mo khuting ya go bolokela metsi.”
Kgotsa “o nna a lebeletse.”
Kgotsa “ba letile ka tlhoafalo.”
Kgotsa gongwe “lo bo lo re di leswe.”
Seheb., “di nonne gape di na le mafura.”
Kgotsa “Mohemo.”
Seheb., “sêfê e e se nang mosola.”
Kgotsa “lo iitshepisetsa.”
Kgotsa “le modumo wa.”
Fano lefoko “Tofethe” le dirisitswe e le lefelo la tshwantshetso le le tukang, le le kayang go senngwa.